കാസര്‍ഗോഡ്: പാണലത്ത് ഇരുപത്തിനാലുകാരിയായ യുവതി ആസിഡ് കഴിച്ച് മരിച്ച സംഭവത്തില്‍ ഭര്‍ത്താവിനെ പൊലീസ് കസ്റ്റഡിയിലെടുത്തു. ചര്‍ലടുക്ക സ്വദേശിനി ഫാത്തിമത്ത് സുഫൈദയുടെ മരണത്തിലാണ് ഭര്‍ത്താവ് ആദിലിനെ വിദ്യാനഗര്‍ പൊലീസ് കസ്റ്റഡിയിലെടുത്ത് ചോദ്യം ചെയ്യുന്നത്. യുവതിയുടെ മരണത്തിന് പിന്നില്‍ ഭര്‍തൃവീട്ടുകാരുടെ ക്രൂരമായ പീഡനമാണെന്ന് ആരോപിച്ച് പെണ്‍കുട്ടിയുടെ കുടുംബം രംഗത്തെത്തിയിട്ടുണ്ട്.
സുഫൈദയുടെ പക്കലുണ്ടായിരുന്ന സ്വര്‍ണം ആവശ്യപ്പെട്ട് ഭര്‍തൃവീട്ടുകാര്‍ നിരന്തരം മാനസികമായും ശാരീരികമായും ഉപദ്രവിച്ചിരുന്നതായി പെണ്‍കുട്ടിയുടെ ബന്ധുക്കള്‍ ആരോപിക്കുന്നു. ഭര്‍തൃവീട്ടുകാരുടെ സാന്നിധ്യത്തിലാണ് യുവതി ആസിഡ് അകത്താക്കിയതെന്നാണ് വിവരം. ഇതാണ് മരണത്തില്‍ വലിയ ദുരൂഹതകള്‍ക്ക് വഴിമാറ്റുന്നത്. ‘ഭര്‍തൃവീട്ടില്‍ സുഫൈദ നേരിട്ടിരുന്നത് കടുത്ത പീഡനങ്ങളാണ്. നിരന്തരമായി സ്വര്‍ണ്ണം ആവശ്യപ്പെട്ട് അവര്‍ അവളെ സമ്മര്‍ദ്ദത്തിലാക്കി. ഇതാണ് മരണത്തിലേക്ക് നയിച്ചത്.’ – ബന്ധുക്കള്‍ ആരോപിച്ചു.
സംഭവത്തില്‍ പെണ്‍കുട്ടിയുടെ കുടുംബം നല്‍കിയ ഔദ്യോഗിക പരാതിയുടെ അടിസ്ഥാനത്തില്‍ വിദ്യാനഗര്‍ പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്. കസ്റ്റഡിയിലായ ഭര്‍ത്താവ് ആദിലിനെ വിശദമായി ചോദ്യം ചെയ്തുവരികയാണ്. സ്ത്രീധന പീഡന നിരോധന നിയമപ്രകാരം ഉള്‍പ്പെടെയുള്ള വകുപ്പുകള്‍ ചുമത്തുന്ന കാര്യത്തില്‍ അന്വേഷണത്തിന് ശേഷം തീരുമാനമുണ്ടാകും.
