ന്യൂഡല്ഹി: വിദേശകാര്യമന്ത്രി ഡോ. എസ്. ജയശങ്കറും യുഎസ് സ്റ്റേറ്റ് സെക്രട്ടറി മാര്ക്കോ റൂബിയോയും തമ്മിലുള്ള നിര്ണായക ഉഭയകക്ഷി ചര്ച്ച ഇന്ന് ന്യൂഡല്ഹിയിലെ ഹൈദരാബാദ് ഹൗസില് നടക്കും. പ്രാദേശിക-ആഗോള സമാധാനം, സുരക്ഷ എന്നിവയുമായി ബന്ധപ്പെട്ട വിവിധ വിഷയങ്ങള് ഇരുനേതാക്കളും ചര്ച്ച ചെയ്യുമെന്നാണ് പ്രതീക്ഷിക്കുന്നത്. ക്വാഡ് വിദേശകാര്യമന്ത്രിമാരുടെ സമ്മേളനത്തില് പങ്കെടുക്കുന്നതിനായി നാല് ദിവസത്തെ സന്ദര്ശനത്തിനായി ഇന്നലെയാണ് മാര്ക്കോ റൂബിയോ ഇന്ത്യയിലെത്തിയത്. ഇന്നലെ പ്രധാനമന്ത്രി നരേന്ദ്ര മോദിയുമായി യുഎസ് സ്റ്റേറ്റ് സെക്രട്ടറി കൂടിക്കാഴ്ച നടത്തിയിരുന്നു.
പ്രതിരോധം, തന്ത്രപ്രധാന സാങ്കേതികവിദ്യകള്, വ്യാപാര-നിക്ഷേപങ്ങള്, ഊര്ജ്ജ സുരക്ഷ, കണക്റ്റിവിറ്റി, വിദ്യാഭ്യാസം, ജനങ്ങള് തമ്മിലുള്ള സമ്പര്ക്കം തുടങ്ങി വിവിധ മേഖലകളിലെ ഉഭയകക്ഷി സഹകരണത്തില് ഇരുരാജ്യങ്ങളും കൈവരിച്ച പുരോഗതിയെക്കുറിച്ച് അദ്ദേഹം പ്രധാനമന്ത്രിയോട് വിശദീകരിച്ചു. ആഗോള നന്മയ്ക്കായി ഇന്ത്യയും അമേരിക്കയും തുടര്ന്നും ഒന്നിച്ച് പ്രവര്ത്തിക്കുമെന്ന് പ്രധാനമന്ത്രി നരേന്ദ്ര മോദി വ്യക്തമാക്കി. സമാധാന ശ്രമങ്ങള്ക്ക് ഇന്ത്യയുടെ നിരന്തരമായ പിന്തുണ അദ്ദേഹം ആവര്ത്തിച്ചുറപ്പിച്ചു.
ചര്ച്ചകളിലൂടെയും നയതന്ത്രത്തിലൂടെയും മാത്രമേ സംഘര്ഷങ്ങള്ക്ക് ശാശ്വത പരിഹാരം കാണാനാകൂ എന്നും പ്രധാനമന്ത്രി ഓര്മ്മിപ്പിച്ചു. പശ്ചിമേഷ്യന് സാഹചര്യം ഉള്പ്പെടെയുള്ള വിവിധ പ്രാദേശിക, ആഗോള വിഷയങ്ങളില് അമേരിക്കയുടെ കാഴ്ചപ്പാടുകള് മാര്ക്കോ റൂബിയോ പ്രധാനമന്ത്രിയുമായി പങ്കുവെച്ചു. അമേരിക്കയുടെ ഏറ്റവും പ്രധാനപ്പെട്ട പങ്കാളിയാണ് ഇന്ത്യയെന്ന് അദ്ദേഹം വിശേഷിപ്പിച്ചു. സുപ്രധാനമായ ക്വാഡ് വിദേശകാര്യമന്ത്രിമാരുടെ സമ്മേളനം ഈ മാസം 26-ന് നടക്കും.
ഇന്ത്യന് വിദേശകാര്യമന്ത്രി ഡോ. എസ്. ജയശങ്കര്, ഓസ്ട്രേലിയന് വിദേശകാര്യമന്ത്രി പെന്നി വോങ്, ജപ്പാന് വിദേശകാര്യമന്ത്രി തോഷിമിത്സു മൊട്ടേഗി, യുഎസ് സ്റ്റേറ്റ് സെക്രട്ടറി മാര്ക്കോ റൂബിയോ എന്നിവര് സമ്മേളനത്തില് പങ്കെടുക്കും. സ്വതന്ത്രവും തുറന്നതുമായ ഇന്ഡോ-പസഫിക് മേഖല എന്ന ക്വാഡ് കാഴ്ചപ്പാടിന് അനുസൃതമായി, മുന്ഗണനാ മേഖലകളില് സഹകരണം ശക്തമാക്കുന്നതിനെക്കുറിച്ച് മന്ത്രിമാര് ആശയവിനിമയം നടത്തും. നിലവിലുള്ള ക്വാഡ് പദ്ധതികളുടെ പുരോഗതി വിലയിരുത്തുന്നതിനൊപ്പം ഇന്ഡോ-പസഫിക് മേഖലയിലെ സമീപകാല സംഭവവികാസങ്ങളും പരസ്പര താല്പ്പര്യമുള്ള അന്താരാഷ്ട്ര വിഷയങ്ങളും യോഗം ചര്ച്ച ചെയ്യും.
