ലണ്ടന്: മാഞ്ചസ്റ്റര് യുണൈറ്റഡിന്റെ പോര്ച്ചുഗീസ് പ്ലേമേക്കര് ബ്രൂണോ ഫെര്ണാണ്ടസിന് ഇംഗ്ലീഷ് പ്രീമിയര് ലീഗിലെ ഈ സീസണിലെ ഏറ്റവും മികച്ച കളിക്കാരനുള്ള ബഹുമതി. ഈ മാസം ആദ്യം ഫുട്ബോള് റൈറ്റേഴ്സ് അസോസിയേഷന്റെ മികച്ച താരത്തിനുള്ള പുരസ്കാരം നേടിയതിന് പിന്നാലെയാണ് പ്രീമിയര് ലീഗിന്റെ ഔദ്യോഗിക പുരസ്കാരവും ബ്രൂണോയെ തേടിയെത്തിയത്. സീസണിലുടനീളം യുണൈറ്റഡിനായി നടത്തിയ തകര്പ്പന് പ്രകടനമാണ് താരത്തെ ഈ നേട്ടത്തിന് അര്ഹനാക്കിയത്.
കഴിഞ്ഞ കുറച്ചുകാലമായി ഫോം കണ്ടെത്താനാകാതെ ഉലഞ്ഞ മാഞ്ചസ്റ്റര് യുണൈറ്റഡ് ഇത്തവണ ലീഗ് പട്ടികയില് മൂന്നാം സ്ഥാനത്താണ് കളി അവസാനിപ്പിച്ചത്. സീസണിന്റെ പകുതിയില് ടീമിന്റെ ഇടക്കാല പരിശീലകനായി ചുമതലയേറ്റ മൈക്കല് കാരിക്കിന് കീഴില് യുണൈറ്റഡ് നടത്തിയ അവിശ്വസനീയമായ തിരിച്ചുവരവിന് ചുക്കാന് പിടിച്ചത് ബ്രൂണോ ഫെര്ണാണ്ടസ് ആയിരുന്നു.
ലീഗില് സഹതാരങ്ങള്ക്കായി 132 ഗോളവസരങ്ങള് സൃഷ്ടിച്ച പോര്ച്ചുഗല് മധ്യനിര താരം, 20 അസിസ്റ്റുകളും തന്റെ പേരില് കുറിച്ചു. പ്രീമിയര് ലീഗ് ചരിത്രത്തില് ഒരു സീസണില് 20 അസിസ്റ്റുകള് നേടുന്ന മൂന്നാമത്തെ താരം മാത്രമാണ് ബ്രൂണോ.
ആഴ്സണലിന്റെ ഇതിഹാസ താരം തിയറി ഹെന്റി, മാഞ്ചസ്റ്റര് സിറ്റിയുടെ കെവിന് ഡി ബ്രൂയിനെ എന്നിവര് മാത്രമാണ് ഇതിന് മുന്പ് ഒരു പ്രീമിയര് ലീഗ് സീസണില് 20 അസിസ്റ്റുകള് നല്കിയിട്ടുള്ളത്. ലീഗ് കിരീടം നേടിയ ആഴ്സണലിന്റെയും റണ്ണേഴ്സ് അപ്പായ മാഞ്ചസ്റ്റര് സിറ്റിയുടെയും പ്രമുഖ താരങ്ങളെ പിന്തള്ളിയാണ് ബ്രൂണോ ഫെര്ണാണ്ടസ് ഈ വ്യക്തിഗത പുരസ്കാരം സ്വന്തമാക്കിയത്.
