ബ്യൂണസ് അയേഴ്‌സ്: കിരീടം നിലനിര്‍ത്തുകയെന്ന ലക്ഷ്യത്തോടെ 2026 ഫിഫ ലോകകപ്പിനായി വടക്കേ അമേരിക്കയിലേക്ക് തിരിക്കുന്ന അര്‍ജന്റീന ടീമിനായി അത്യാധുനിക എയര്‍ബസ് എ330-200 വിമാനം സജ്ജമായി. അര്‍ജന്റീനയുടെ ദേശീയ വിമാനക്കമ്പനിയായ ‘ആരൊലിനിയാസ് അര്‍ജന്റീനാസ്’ ആണ് ആരാധകരെ ആവേശത്തിലാഴ്‌ത്തുന്ന സവിശേഷമായ രൂപകല്‍പ്പനയോടെയുള്ള ഈ ഔദ്യോഗിക വിമാനം പുറത്തിറക്കിയത്. എസൈസ അന്താരാഷ്‌ട്ര വിമാനത്താവളത്തിലെ അഞ്ചാം നമ്പര്‍ ഹാംഗറില്‍ നടന്ന ചടങ്ങിലായിരുന്നു വിമാനത്തിന്റെ അനാച്ഛാദനം. കേവലം നാല് ദിവസത്തെ റെക്കോര്‍ഡ് സമയം കൊണ്ടാണ് വിമാനത്തിന്റെ പെയിന്റിംഗും ഗ്രാഫിക്‌സ് പണികളും പൂര്‍ത്തിയാക്കിയത്.
ദേശീയ പതാകയുടെ ആകാശ നീലയും വെള്ളയും കലര്‍ന്ന നിറങ്ങള്‍ ചാര്‍ത്തിയ ഈ വിമാനത്തില്‍ ടീം ക്യാപ്റ്റനും ഇതിഹാസ താരവുമായ ലയണല്‍ മെസ്സിയോടുള്ള ആദരസൂചകമായി അദ്ദേഹത്തിന്റെ ഐക്കണിക് ‘പത്താം നമ്പര്‍’ ജേഴ്‌സിയുടെ ഡിസൈന്‍ വാലറ്റത്ത് വലിയ രീതിയില്‍ ഉള്‍പ്പെടുത്തിയിട്ടുണ്ട്. കൂടാതെ വിമാനത്തിന്റെ എന്‍ജിനുകളില്‍ ക്യാപ്റ്റന്‍മാരുടെ ‘C’ എന്ന അടയാളവും, അര്‍ജന്റീനയുടെ മൂന്ന് ലോകകപ്പ് വിജയങ്ങളെ ഓര്‍മ്മിപ്പിക്കുന്ന മൂന്ന് സ്വര്‍ണ്ണ നക്ഷത്രങ്ങളും അഡിഡാസ് ജേഴ്‌സിയുടെ ഔദ്യോഗിക രൂപഭംഗിയും വിമാനത്തില്‍ വ്യക്തമായി കാണാം.
ലോകകപ്പ് മത്സരങ്ങള്‍ നടക്കുന്ന യു.എസിലെ പ്രധാന നഗരങ്ങളായ ഡാലസ്, കന്‍സാസ് സിറ്റി എന്നിവിടങ്ങളിലേക്ക് ഈ വിമാനം പ്രത്യേക സര്‍വീസുകള്‍ നടത്തും. ഇതിന് പുറമെ കളി കാണാന്‍ പോകുന്ന ആരാധകര്‍ക്കായി ബ്യൂനസ് ഐറിസില്‍ നിന്നും മയാമിയിലേക്ക് രാപ്പകല്‍ വ്യത്യാസമില്ലാതെ അര്‍ജന്റീനന്‍ എയര്‍ലൈന്‍സിന്റെ പ്രത്യേക സര്‍വീസുകളും ഇതോടൊപ്പം പ്രഖ്യാപിച്ചിട്ടുണ്ട്.
