ധരംശാല: ഐപിഎല്‍ ഒന്നാം ക്വാളിഫയര്‍ പോരാട്ടത്തില്‍ ഗുജറാത്ത് ടൈറ്റന്‍സിന് മുന്നില്‍ റണ്‍മലയര്‍ത്തി റോയല്‍ ചലഞ്ചേഴ്‌സ് ബെംഗളൂരു. ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ ആര്‍സിബി നിശ്ചിത 20 ഓവറില്‍ 5 വിക്കറ്റ് നഷ്ടത്തില്‍ 254 റണ്‍സെന്ന കൂറ്റന്‍ സ്‌കോര്‍ പടുത്തുയര്‍ത്തി. തകര്‍പ്പന്‍ വെടിക്കെട്ടുമായി മുന്നില്‍ നിന്ന് നയിച്ച രജത് പാട്ടിദാറിന്റെ (93*) ഇന്നിങ്‌സാണ് ബെംഗളൂരുവിന് കരുത്തായത്. മത്സരത്തില്‍ വിജയിക്കുന്നവര്‍ക്ക് നേരിട്ട് ഫൈനലിലേക്ക് പ്രവേശിക്കാം എന്നതിനാല്‍ രണ്ടാം ഇന്നിങ്‌സ് ആവേശകരമാകും.
തുടക്കത്തില്‍ തന്നെ അക്രമണോത്സുക ബാറ്റിങ്ങാണ് ബെംഗളൂരു പുറത്തെടുത്തത്. വെങ്കടേഷ് അയ്യര്‍ 7 പന്തില്‍ 19 റണ്‍സെടുത്ത് വേഗത്തില്‍ മടങ്ങിയെങ്കിലും, പിന്നീട് ഒത്തുചേര്‍ന്ന വിരാട് കോലിയും ദേവദത്ത് പടിക്കലും ചേര്‍ന്ന് റണ്‍റേറ്റ് ഉയര്‍ത്തി. പവര്‍പ്ലേ ഓവറുകളില്‍ ഗുജറാത്ത് ബൗളര്‍മാരെ അതിരൂക്ഷമായി പ്രഹരിച്ച ഈ സഖ്യം ആദ്യ 6 ഓവറില്‍ ടീം സ്‌കോര്‍ 76-ല്‍ എത്തിച്ചു. എന്നാല്‍ ഒന്‍പതാം ഓവറില്‍ ജേസണ്‍ ഹോള്‍ഡര്‍ ഗുജറാത്തിനെ മത്സരത്തിലേക്ക് തിരികെ കൊണ്ടുവന്നു. 25 പന്തില്‍ 43 റണ്‍സെടുത്ത കോലിയെയും, തൊട്ടുപിന്നാലെ 19 പന്തില്‍ 30 റണ്‍സെടുത്ത പടിക്കലിനെയും ഒരേ ഓവറില്‍ പുറത്താക്കി ഹോള്‍ഡര്‍ ഇരട്ട പ്രഹരമേല്‍പ്പിച്ചു. ഇതോടെ ആര്‍സിബി 3 വിക്കറ്റിന് 96 എന്ന നിലയിലായി.
നാലാം വിക്കറ്റില്‍ ഒന്നിച്ച നായകന്‍ രജത് പാട്ടിദാറും ക്രുണാല്‍ പാണ്ഡ്യയും ചേര്‍ന്നാണ് പിന്നീട് കളി തിരിച്ചുപിടിച്ചത്. തുടക്കത്തില്‍ നിലയുറപ്പിച്ചു കളിച്ച ഇരുവരും 15-ാം ഓവര്‍ മുതല്‍ കളിമാറ്റി. കുല്‍വന്ത് എറിഞ്ഞ ഈ ഓവറിലെ രണ്ട് നോബോളുകള്‍ മുതലാക്കി 28 റണ്‍സാണ് ഇവര്‍ അടിച്ചെടുത്തത്. 17-ാം ഓവറില്‍ 28 പന്തില്‍ 43 റണ്‍സുമായി പാണ്ഡ്യ പുറത്തായെങ്കിലും ആര്‍സിബി സ്‌കോര്‍ 200 കടന്നിരുന്നു. ടിം ഡേവിഡ് (4) പരാജയപ്പെട്ടെങ്കിലും ജിതേഷ് ശര്‍മയെ (5 പന്തില്‍ 15) കൂട്ടുപിടിച്ച് പാട്ടിദാര്‍ ടീമിനെ 250 കടത്തി.
33 പന്തില്‍ നിന്ന് 9 സിക്‌സറുകളും 5 ഫോറുകളുമടക്കം 93 റണ്‍സോടെ പാട്ടിദാര്‍ പുറത്താകാതെ നിന്നു. ഗുജറാത്തിന് വേണ്ടി കാഗിസോ റബാദയും ജേസണ്‍ ഹോള്‍ഡറും രണ്ട് വിക്കറ്റുകള്‍ വീതം വീഴ്‌ത്തി. ഈ മത്സരത്തില്‍ പരാജയപ്പെടുന്ന ടീമിന് എലിമിനേറ്റര്‍ മത്സരത്തിലെ വിജയികളുമായി ക്വാളിഫയര്‍ 2-ല്‍ ഏറ്റുമുട്ടാന്‍ ഒരു അവസരം കൂടി ലഭിക്കും.
