കോയമ്പത്തൂർ: പ്രണയാഭ്യർത്ഥന നിരസിച്ചതിന്റെയും സൗഹൃദം ഉപേക്ഷിച്ചതിന്റെയും വൈരാഗ്യത്തിൽ ഇരുപത്തിയൊന്നുകാരിയായ വിദ്യാർത്ഥിനിയുടെ വീടിന് നേരെ പെട്രോൾ ബോംബാക്രമണം. കോയമ്പത്തൂർ തൊണ്ടമുത്തൂരിനടുത്തുള്ള കലിക്കാനായ്‌ക്കൻപാളയത്തിലാണ് നാടിനെ നടുക്കിയ സംഭവം അരങ്ങേറിയത്. സ്വകാര്യ കോളേജിലെ രണ്ടാം വർഷ ബിരുദാനന്തര ബിരുദ വിദ്യാർത്ഥിനിയുടെ വീടിന് നേരെയാണ് ആക്രമണമുണ്ടായത്.
ചെന്നൈ സ്വദേശിയായ കാർത്തി എന്ന യുവാവാണ് ഈ ആക്രമണത്തിന് പിന്നിലെന്ന് പോലീസ് കണ്ടെത്തിയിട്ടുണ്ട്. ഇൻസ്റ്റാഗ്രാം വഴിയാണ് പെൺകുട്ടിയും കാർത്തിയും പരിചയപ്പെടുന്നത്. തുടർന്ന് ഇരുവരും തമ്മിൽ സൗഹൃദത്തിലാവുകയും, കാലക്രമേണ കാർത്തി പെൺകുട്ടിയോട് പ്രണയാഭ്യർത്ഥന നടത്തുകയുമായിരുന്നു. എന്നാൽ യുവാവിനെക്കുറിച്ച് കൂടുതൽ അന്വേഷിച്ച പെൺകുട്ടി കാർത്തിക്കെതിരെ നിരവധി ക്രിമിനൽ കേസുകൾ നിലവിലുണ്ടെന്ന വിവരം അറിഞ്ഞു. ഇതോടെ പെൺകുട്ടി ഇയാളുമായുള്ള എല്ലാത്തരം ബന്ധങ്ങളും പൂർണ്ണമായി ഉപേക്ഷിച്ചു. ഇതിൽ പ്രകോപിതനായ കാർത്തി കഴിഞ്ഞ ശനിയാഴ്ച വൈകുന്നേരം സുഹൃത്തുക്കളുമായി പെൺകുട്ടിയുടെ വീട്ടിലെത്തുകയായിരുന്നു.
🚨 SHOCKING! Coimbatore, Tamil Nadu: Boy throws petrol bomb at girl’s house after love proposal rejection. CCTV footage sparks outrage & safety concerns. pic.twitter.com/RzOCA3jrru
— indiainlast24hr (@indiain24hr) May 25, 2026
പ്രതികാരബുദ്ധിയോടെ പെൺകുട്ടിയുടെ വീടിന്റെ മുൻവാതിലിന് നേരെ സംഘം പെട്രോൾ ബോംബുകൾ എറിയുകയും, തുടർന്ന് ബൈക്കുകളിൽ വേഗത്തിൽ രക്ഷപ്പെടുകയുമായിരുന്നു. സംഭവത്തെക്കുറിച്ച് വിവരമറിഞ്ഞ ഉടൻ തന്നെ തൊണ്ടമുത്തൂർ പോലീസ് സ്ഥലത്തെത്തി പ്രാഥമിക അന്വേഷണം നടത്തി. പ്രതികൾക്കായി പോലീസ് അന്വേഷണം ഊർജിതമാക്കിയിട്ടുണ്ട്.
