ന്യൂഡല്‍ഹി: 230 യാത്രക്കാരുമായി സാന്‍ ഫ്രാന്‍സിസ്‌കോയിലേക്ക് പുറപ്പെട്ട എയര്‍ ഇന്ത്യ വിമാനം എട്ട് മണിക്കൂറിലധികം അന്തരീക്ഷത്തില്‍ തുടര്‍ന്ന ശേഷം ഡല്‍ഹിയിലേക്ക് തന്നെ മടങ്ങി. സാങ്കേതിക തകരാറിനെ തുടര്‍ന്നാണ് വിമാനം തിരിച്ചിറക്കിയതെന്ന് എയര്‍ലൈന്‍ അധികൃതര്‍ അറിയിച്ചു. വിമാനം സുരക്ഷിതമായി ലാന്‍ഡ് ചെയ്തതായും കമ്പനി വ്യക്തമാക്കി.
‘മെയ് 27-ന് ഡല്‍ഹിയില്‍ നിന്ന് സാന്‍ ഫ്രാന്‍സിസ്‌കോയിലേക്ക് പുറപ്പെട്ട എഎൈ173 വിമാനം, നിലവിലുള്ള സുരക്ഷാ നടപടിക്രമങ്ങള്‍ പാലിച്ച് സാങ്കേതിക തകരാറിനെ തുടര്‍ന്ന് ഡല്‍ഹിയിലേക്ക് മടങ്ങിയിട്ടുണ്ട്. വിമാനം സുരക്ഷിതമായി ലാന്‍ഡ് ചെയ്തു. എയര്‍ ഇന്ത്യയുടെ സുരക്ഷാ മാനദണ്ഡങ്ങള്‍ക്കനുസൃതമായി വിമാനം വിശദമായ സാങ്കേതിക പരിശോധനയ്‌ക്ക് വിധേയമാക്കും,’ എയര്‍ ഇന്ത്യ പ്രസ്താവനയില്‍ അറിയിച്ചു.
ചൈനീസ് വ്യോമാതിര്‍ത്തിയില്‍ വെച്ച്, മൂന്ന് മണിക്കൂറിലധികം പറന്ന ശേഷമാണ് വിമാനം ഡല്‍ഹിയിലേക്ക് തിരിച്ചുവിട്ടതെന്നാണ് റിപ്പോര്‍ട്ടുകള്‍ സൂചിപ്പിക്കുന്നത്. യാത്രക്കാരുടെയും ജീവനക്കാരുടെയും സുരക്ഷയ്‌ക്കാണ് തങ്ങള്‍ ‘ഏറ്റവും ഉയര്‍ന്ന മുന്‍ഗണന’ നല്‍കുന്നതെന്ന് എയര്‍ലൈന്‍ അടിവരയിട്ടു പറഞ്ഞു.
‘യാത്രക്കാര്‍ക്കുണ്ടായ ബുദ്ധിമുട്ടില്‍ ഞങ്ങള്‍ ഖേദിക്കുന്നു. എത്രയും വേഗം അവരെ ലക്ഷ്യസ്ഥാനത്ത് എത്തിക്കുന്നതിനായി ബദല്‍ ക്രമീകരണങ്ങള്‍ ചെയ്തുവരികയാണ്. ഈ സമയത്ത്, യാത്രക്കാരുടെ താല്പര്യപ്രകാരം അവര്‍ക്ക് ആവശ്യമായ ലഘുഭക്ഷണങ്ങള്‍, ഹോട്ടല്‍ താമസം അല്ലെങ്കില്‍ ടിക്കറ്റ് പുതുക്കി നല്‍കല്‍ എന്നിവയുള്‍പ്പെടെയുള്ള എല്ലാ സഹായങ്ങളും ഞങ്ങളുടെ ഗ്രൗണ്ട് ടീം നല്‍കുന്നുണ്ട്,’ എയര്‍ലൈന്‍ വ്യക്തമാക്കി.
നേരത്തെ, മെയ് 21-ന് ബെംഗളൂരുവില്‍ നിന്ന് ഡല്‍ഹിയിലേക്ക് സര്‍വീസ് നടത്തിയ എയര്‍ ഇന്ത്യ വിമാനത്തിന് ഡല്‍ഹി വിമാനത്താവളത്തില്‍ ലാന്‍ഡ് ചെയ്തതിന് ശേഷം എഞ്ചിനില്‍ തീപിടിത്തം ഉണ്ടായിരുന്നു. ബെംഗളൂരു-ഡല്‍ഹി എഐ2802 വിമാനത്തില്‍ ഉണ്ടായ സംഭവം എയര്‍ ഇന്ത്യ സ്ഥിരീകരിച്ചിരുന്നു.
