ന്യൂഡല്ഹി: വിവാഹത്തിന് ശേഷം പെണ്കുട്ടികളെയും അവരുടെ കുടുംബത്തെയും പണത്തിനായി പീഡിപ്പിക്കുന്ന ക്രൂരമായ പ്രവണതയ്ക്കെതിരെ കടുത്ത ഭാഷയില് പ്രതികരിച്ച് സുപ്രീം കോടതി. പതിനാറ് വര്ഷം പഴക്കമുള്ള ഒരു സ്ത്രീധന മരണക്കേസില്, തനിക്ക് ലഭിച്ച ശിക്ഷയില് ഇളവ് നല്കണമെന്ന് ആവശ്യപ്പെട്ട് ഭര്ത്താവിന്റെ സഹോദരന് സമര്പ്പിച്ച ഹര്ജി പൂര്ണ്ണമായും തള്ളിക്കൊണ്ടാണ് രാജ്യത്തെ പരമോന്നത കോടതിയുടെ നിര്ണ്ണായക ഇടപെടല്. വധുവിന്റെ വീട്ടുകാരെ സാമ്പത്തികമായി പിഴിഞ്ഞെടുക്കുന്നവര്ക്ക് നിയമവ്യവസ്ഥ ശക്തമായ സന്ദേശം നല്കേണ്ടതുണ്ടെന്ന് കോടതി വ്യക്തമാക്കി.
വിദ്യാഭ്യാസമുള്ളവര് പോലും വിവാഹശേഷം പണത്തിനായി പെണ്കുട്ടികളുടെ കുടുംബത്തെ അപമാനിക്കുന്ന അവസ്ഥയിലേക്ക് തരംതാഴുന്നത് അങ്ങേയറ്റം ദൗര്ഭാഗ്യകരമാണെന്ന് ജസ്റ്റിസ് ബി.വി. നാഗരത്ന, ജസ്റ്റിസ് ഉജ്ജല് ഭൂയാന് എന്നിവരടങ്ങിയ ബെഞ്ച് നിരീക്ഷിച്ചു. കേസ് പരിഗണിക്കവെ, സമൂഹത്തിലെ ഈ തെറ്റായ പ്രവണതയ്ക്കെതിരെ ബെഞ്ച് രൂക്ഷമായ ചോദ്യങ്ങള് ഉന്നയിച്ചു.
‘എന്തിനാണ് ആണ്കുട്ടികള് വിവാഹം കഴിച്ച ശേഷം പെണ്കുട്ടികളെയും അവരുടെ കുടുംബത്തെയും ഇത്തരത്തില് അപമാനിക്കുന്നത്? ഭര്തൃഗൃഹങ്ങളില് നിന്ന് വധുക്കള് നേരിടുന്ന മാനസികവും ശാരീരികവുമായ പീഡനങ്ങള് ഒരു തരത്തിലും വെച്ചുപൊറുപ്പിക്കാന് സാധിക്കില്ല.’ വിവാഹശേഷം പെണ്കുട്ടിയുടെ കുടുംബത്തിന് മേല് കടുത്ത സാമ്പത്തിക സമ്മര്ദ്ദം ചെലുത്തുന്ന രീതിയാണ് നിലവിലുള്ളതെന്നും കോടതി കുറ്റപ്പെടുത്തി.
കീഴ്ക്കോടതികള് വിധിച്ച ശിക്ഷാ നടപടികള് പൂര്ണ്ണമായും ശരിവെച്ച സുപ്രീം കോടതി, ഇത്തരം കേസുകളില് പ്രതികള്ക്ക് യാതൊരുവിധ ആനുകൂല്യങ്ങളും നല്കാന് കഴിയില്ലെന്ന് തറപ്പിച്ചു പറഞ്ഞു. 2010-ല് ഛത്തീസ്ഗഢിലാണ് ഈ കേസിനാസ്പദമായ സംഭവം നടക്കുന്നത്. വിവാഹം കഴിഞ്ഞ് ഏഴ് വര്ഷത്തിനുള്ളില് ഒരു യുവതിയെ ഭര്തൃവീട്ടില് തൂങ്ങിമരിച്ച നിലയില് കണ്ടെത്തുകയായിരുന്നു. കൂടുതല് പണവും കാറും ആവശ്യപ്പെട്ട് ഭര്ത്താവും കുടുംബാംഗങ്ങളും യുവതിയെ നിരന്തരം ദ്രോഹിച്ചിരുന്നതായി പ്രോസിക്യൂഷന് വ്യക്തമാക്കുകയുണ്ടായി.
മരണപ്പെടുന്നതിന് തൊട്ടുമുന്പുള്ള ദിവസങ്ങളിലും പണച്ചൊല്ലി യുവതി ക്രൂരമായ പീഡനങ്ങള്ക്ക് ഇരയായിരുന്നുവെന്ന് പെണ്കുട്ടിയുടെ കുടുംബവും കോടതിയില് മൊഴി നല്കി. വിവാഹജീവിതത്തിന്റെ ഏഴ് വര്ഷത്തിനുള്ളില് നടന്ന അസ്വാഭാവിക മരണമായതിനാല് ഇതിനെ നിയമപരമായി സ്ത്രീധന മരണമായി തന്നെ കണക്കാക്കാമെന്ന് കോടതി വിലയിരുത്തി. കേസില് ഇന്ത്യന് ശിക്ഷാനിയമത്തിലെ 304ബി (സ്ത്രീധന മരണം), 306 (ആത്മഹത്യാ പ്രേരണ), 498എ (ഗാര്ഹിക പീഡനം) എന്നീ ഗുരുതരമായ വകുപ്പുകള് പ്രകാരം ഭര്ത്താവിനും മറ്റ് കുടുംബാംഗങ്ങള്ക്കും ശിക്ഷ വിധിച്ചിരുന്നു.
ഈ ശിക്ഷ മുന്പ് ഛത്തീസ്ഗഢ് ഹൈക്കോടതിയും ശരിവെച്ചിരുന്നു. ഇതിനെതിരെയാണ് പ്രതികളിലൊരാളായ ഭര്തൃസഹോദരന് സുപ്രീം കോടതിയെ സമീപിച്ചതും ഒടുവില് തിരിച്ചടി നേരിട്ടതും.
