ന്യൂഡല്ഹി: ഏറെ നാളായി രാജ്യാന്തര സമൂഹം കാത്തിരിക്കുന്ന ഇന്ത്യ-യു.എസ് വ്യാപാര കരാര് അവസാന ഘട്ടത്തിലേക്ക്. ഇനി വെറും ‘ഒരു ശതമാനം’ ചര്ച്ചകള് മാത്രമാണ് പൂര്ത്തിയാകാനുള്ളതെന്ന് യു.എസ് അംബാസഡര് സെര്ജിയോ ഗോര് വ്യക്തമാക്കി. അടുത്ത ആഴ്ച ന്യൂഡല്ഹിയില് നിര്ണായകമായ ചര്ച്ചകള് നടക്കാനിരിക്കെയാണ് അംബാസഡറുടെ ഈ പ്രസ്താവന. വരും ആഴ്ചകളില് തന്നെ ഇരു രാജ്യങ്ങളും തമ്മിലുള്ള ചരിത്രപരമായ വ്യാപാര കരാര് ഒപ്പുവെച്ചേക്കുമെന്നാണ് സൂചന.
വെള്ളിയാഴ്ച ഇന്ത്യന് ഇന്സ്റ്റിറ്റ്യൂട്ട് ഓഫ് ടെക്നോളജി ഡല്ഹിയില് സംസാരിക്കവെയാണ് സെര്ജിയോ ഗോര് ഇക്കാര്യം വെളിപ്പെടുത്തിയത്. കരാറിലെ അവശേഷിക്കുന്ന തര്ക്കങ്ങള് പരിഹരിക്കുന്നതിനായി അടുത്തിടെ ഒരു ഇന്ത്യന് പ്രതിനിധി സംഘം വാഷിംഗ്ടണ് സന്ദര്ശിച്ചിരുന്നു. ഇതിന്റെ തുടര്ച്ചയായി അമേരിക്കന് പ്രതിനിധി സംഘം അടുത്ത ആഴ്ച ഇന്ത്യയിലെത്തും.
‘നമ്മുടെ മുന്നിലുള്ള ഈ താല്ക്കാലിക വ്യാപാര കരാര് അന്തിമമാകുന്നതോടെ ഇരു രാജ്യങ്ങള്ക്കും അത് വലിയ സാമ്പത്തിക അഭിവൃദ്ധി സമ്മാനിക്കും,’ സെര്ജിയോ ഗോര് പറഞ്ഞു. ‘വ്യാപാര കരാറിന്റെ അവസാന ഒരു ശതമാനം കാര്യങ്ങള് കൂടി പൂര്ത്തിയാക്കാനാണ് ഇന്ത്യന് സംഘം വാഷിംഗ്ടണ് ഡി.സിയില് എത്തിയത്. അടുത്ത ആഴ്ച യു.എസ് സംഘം ചര്ച്ചകള് തുടരാനായി ഇവിടെയെത്തും,’ അദ്ദേഹം കൂട്ടിച്ചേര്ത്തു.
അമേരിക്കയുടെ ചീഫ് ട്രേഡ് നെഗോഷ്യേറ്ററുടെ നേതൃത്വത്തിലുള്ള ഉന്നതതല സംഘം ജൂണ് 1 മുതല് 4 വരെയാണ് ഇന്ത്യ സന്ദര്ശിക്കുന്നത്. ഇരുപക്ഷവും തമ്മിലുള്ള താല്ക്കാലിക ഉഭയകക്ഷി വ്യാപാര കരാര് എത്രയും വേഗം യാഥാര്ത്ഥ്യമാക്കുക എന്ന ലക്ഷ്യത്തോടെയാണ് ഈ സന്ദര്ശനം. കഴിഞ്ഞ ഏപ്രിലില് വാഷിംഗ്ടണില് നടന്ന ചര്ച്ചകളുടെ തുടര്ച്ചയാണിത്.
അവശേഷിക്കുന്ന തര്ക്കവിഷയങ്ങള് എന്തൊക്കെയാണെന്ന് അംബാസഡര് വ്യക്തമാക്കിയിട്ടില്ലെങ്കിലും, വിപണി പ്രവേശനം, നോണ്-താരിഫ് തടസ്സങ്ങള്, കസ്റ്റംസ് ലളിതവല്ക്കരണം, സാമ്പത്തിക സുരക്ഷാ സഹകരണം എന്നിവയിലാണ് ചര്ച്ചകള് തുടരുന്നതെന്നാണ് ഉദ്യോഗസ്ഥര് നല്കുന്ന സൂചന. ആഭ്യന്തര ഉത്പാദകരെയും കര്ഷകരെയും ബാധിക്കുന്ന വിഷയങ്ങളില് ഇന്ത്യ അതീവ ജാഗ്രത പുലര്ത്തുമെന്നാണ് വിലയിരുത്തല്.
കഴിഞ്ഞ രണ്ട് പതിറ്റാണ്ടിനിടെ ഇരു രാജ്യങ്ങളും തമ്മിലുള്ള ചരക്ക്-സേവന വ്യാപാരം 20 ബില്യണ് ഡോളറില് നിന്ന് 220 ബില്യണ് ഡോളറിലധികമായി ഉയര്ന്നതായി സെര്ജിയോ ഗോര് ചൂണ്ടിക്കാട്ടി. ഇത് ഇരുരാജ്യങ്ങളും തമ്മിലുള്ള ശക്തമായ സാമ്പത്തിക ബന്ധത്തെയാണ് കാണിക്കുന്നത്. ബാക്കിയുള്ള ചര്ച്ചകള് കൂടി പൂര്ത്തിയാകുന്നതോടെ കരാര് ഒപ്പുവെക്കാന് വാഷിംഗ്ടണ് സന്നദ്ധമാണെന്നും അദ്ദേഹം ആത്മവിശ്വാസം പ്രകടിപ്പിച്ചു.
വ്യാപാരത്തിന് പുറമെ ആര്ട്ടിഫിഷ്യല് ഇന്റലിജന്സ്, സെമികണ്ടക്ടറുകള്, ഫാര്മസ്യൂട്ടിക്കല്സ്, ക്വാണ്ടം കമ്പ്യൂട്ടിംഗ്, ക്രിട്ടിക്കല് മിനറലുകള് തുടങ്ങിയ തന്ത്രപ്രധാന മേഖലകളിലെ വളര്ന്നുവരുന്ന സഹകരണത്തെക്കുറിച്ചും അദ്ദേഹം എടുത്തുപറഞ്ഞു. ഭാവിയിലെ പുത്തന് സാങ്കേതികവിദ്യകള്ക്ക് രൂപം നല്കാന് ഇരു രാജ്യങ്ങളുടെയും ആഴത്തിലുള്ള സഹകരണത്തിലൂടെ സാധിക്കുമെന്നും അംബാസഡര് കൂട്ടിച്ചേര്ത്തു.
