മുംബൈ: ജപ്പാനിലെ ഐച്ചി നാഗോയയില് ഈ വര്ഷം സെപ്റ്റംബര്-ഒക്ടോബര് മാസങ്ങളിലായി അരങ്ങേറുന്ന ഏഷ്യന് ഗെയിംസിനുള്ള ഇന്ത്യന് പുരുഷ ക്രിക്കറ്റ് ടീമിന്റെ 30 അംഗ സാധ്യതാ പട്ടിക ബി.സി.സി.ഐ പ്രഖ്യാപിച്ചു. ഇന്ത്യന് ഒളിമ്പിക് അസോസിയേഷന്സമര്പ്പിച്ച ഈ പട്ടികയില് ഐ.പി.എല്ലിലൂടെ ശ്രദ്ധേയനായ പതിനഞ്ചുകാരന് വൈഭവ് സൂര്യവംശിയും ഇടംപിടിച്ചിട്ടുണ്ട്.
മലയാളി താരം സഞ്ജു സാംസണ്, ശ്രേയസ് അയ്യര്, തിലക് വര്മ്മ എന്നിവര് സാധ്യതാ പട്ടികയിലുള്ളതിനാല് ഇവരിലൊരാള് ഏഷ്യന് ഗെയിംസില് ഇന്ത്യയെ നയിക്കാനാണ് സാധ്യത. എന്നാല് നിലവിലെ ട്വന്റി-20 ക്യാപ്റ്റന് സൂര്യകുമാര് യാദവ്, ടെസ്റ്റ്-ഏകദിന നായകനായ ശുഭ്മാന് ഗില് എന്നിവര് പട്ടികയ്ക്ക് പുറത്താണ്.
സെപ്റ്റംബര് 27 മുതല് ഒക്ടോബര് 17 വരെ വെസ്റ്റിന്ഡീസിനെതിരായ പരമ്പര നടക്കുന്നതിനാലാണ് ഗില്ലിനെ ഒഴിവാക്കിയത്. അതേസമയം, 2028-ലെ ഒളിമ്പിക്സോ അടുത്ത ട്വന്റി-20 ലോകകപ്പോ ലക്ഷ്യമിട്ടുള്ള ബി.സി.സി.ഐയുടെ ഭാവി പദ്ധതികളില് സൂര്യകുമാര് യാദവിനെ ഇനി പരിഗണിക്കുന്നില്ലെന്നതിന്റെ സൂചനയാണ് അദ്ദേഹത്തിന്റെ ഒഴുവാക്കലെന്ന് വിലയിരുത്തപ്പെടുന്നു.
ഒരേസമയത്ത് ഏഷ്യന് ഗെയിംസും വെസ്റ്റിന്ഡീസ് പരമ്പരയും വരുന്നതിനാല് രണ്ട് വ്യത്യസ്ത ഇന്ത്യന് ടീമുകളെ ബി.സി.സി.ഐക്ക് കളത്തിലിറക്കേണ്ടി വരും. ഋഷഭ് പന്ത്, ഹാര്ദിക് പാണ്ഡ്യ, ജസ്പ്രീത് ബുംറ എന്നീ സീനിയര് താരങ്ങള് 30 അംഗ പട്ടികയിലുണ്ടെങ്കിലും വിദേശ പരമ്പരയിലെ മുന്ഗണന അനുസരിച്ചായിരിക്കും ഇവരുടെ പങ്കാളിത്തത്തില് അന്തിമ തീരുമാനമെടുക്കുക.
സെപ്റ്റംബര് 24 മുതല് ഒക്ടോബര് 3 വരെയാണ് ഏഷ്യന് ഗെയിംസിലെ പുരുഷ ക്രിക്കറ്റ് മത്സരങ്ങള് നടക്കുന്നത്. ഹര്ഷിത് റാണ, പ്രസിദ്ധ് കൃഷ്ണ, അര്ഷ്ദീപ് സിംഗ് എന്നിവരും പേസ് നിരയിലുണ്ട്.
ബി.സി.സി.ഐ സമര്പ്പിച്ച 30 അംഗ പട്ടിക താഴെ പറയുന്നവരാണ്:
യശസ്വി ജയ്സ്വാള്, അഭിഷേക് ശര്മ, വൈഭവ് സൂര്യവംശി, ഇഷാന് കിഷന്, സഞ്ജു സാംസണ്, ശ്രേയസ് അയ്യര്, ഋഷഭ് പന്ത്, ഹാര്ദിക് പാണ്ഡ്യ, റിങ്കു സിംഗ്, തിലക് വര്മ, ജസ്പ്രീത് ബുംറ, അക്ഷര് പട്ടേല്, അര്ഷ്ദീപ് സിംഗ്, കുല്ദീപ് യാദവ്, നിതീഷ് കുമാര് റെഡ്ഡി, പ്രസിദ്ധ് കൃഷ്ണ, വരുണ് ചക്രവര്ത്തി, അനുകുല് റോയ്, ആയുഷ് ബധോനി, ഹര്ഷ് ദുബെ, ധ്രുവ് ജുറെല്, ഖലീല് അഹമ്മദ്, ഋതുരാജ് ഗെയ്ക്വാദ്, രവി ബിഷ്ണോയ്, ഷഹബാസ് അഹമ്മദ്, ശിവം ദുബെ, വിപ്രജ് നിഗം, ഹര്ഷിത് റാണ, യാഷ് താക്കൂര്, വാഷിംഗ്ടണ് സുന്ദര്.
