കോഴിക്കോട്: കടത്തനാട് ലേബര് കോണ്ട്രാക്ട് സഹകരണ ബാങ്കില് നിക്ഷേപിച്ച തുക തിരികെ ലഭിക്കാത്തതിനെ തുടര്ന്ന് വടകരയില് വയോധികനായ ഇബ്രാഹിം ഹാജി ജീവനൊടുക്കിയ സംഭവത്തില് പ്രതികരണവുമായി ബി.ജെ.പി നേതാവ് സി.ആര്. പ്രഫുല് കൃഷ്ണന്. ബാങ്ക് ഭരണസമിതിക്ക് നേതൃത്വം നല്കുന്ന കോണ്ഗ്രസ് നേതാക്കള്ക്കെതിരെ പോലീസ് കര്ശന നടപടിയെടുക്കണമെന്ന് അദ്ദേഹം ആവശ്യപ്പെട്ടു. കോഴിക്കോട് നടത്തിയ വാര്ത്താസമ്മേളനത്തിലാണ് ബി.ജെ.പി നേതാവ് ഈ ആവശ്യങ്ങള് ഉന്നയിച്ചതും നിര്ണായക വിവരങ്ങള് പുറത്തുവിട്ടതും.
മരണപ്പെടുന്നതിന് തൊട്ടുമുമ്പ് ഇബ്രാഹിം ഹാജി തനിക്ക് ചില ശബ്ദസന്ദേശങ്ങള് അയച്ചിരുന്നതായി പ്രഫുല് കൃഷ്ണന് വെളിപ്പെടുത്തി. താന് ഇല്ലാതാവുകയാണെങ്കില് ഈ വിവരങ്ങളെല്ലാം മാധ്യമങ്ങളോട് പറയണമെന്ന് അദ്ദേഹം ആവശ്യപ്പെട്ടിരുന്നതായും ബി.ജെ.പി നേതാവ് വ്യക്തമാക്കി. യു.ഡി.എഫ് നേതൃത്വത്തിലുള്ള കടത്തനാട് കോണ്ട്രാക്ട് സഹകരണ ബാങ്ക് ഉയര്ന്ന പലിശ വാഗ്ദാനം ചെയ്താണ് പ്രദേശവാസികളില് നിന്ന് വന്തോതില് നിക്ഷേപം സമാഹരിച്ചത്. വര്ഷങ്ങളോളം ഗള്ഫില് ജോലി ചെയ്ത് സമ്പാദിച്ച ലക്ഷക്കണക്കിന് രൂപയാണ് തിരുവള്ളൂര് സ്വദേശിയായ ഇബ്രാഹിം ഹാജി ഈ ബാങ്കിലിട്ടത്.
ഹൃദ്രോഗബാധിതനായ ഇബ്രാഹിം ഹാജിക്ക് കാല്മുട്ട് മാറ്റിവെക്കല് ശസ്ത്രക്രിയയ്ക്കായി പണം അടിയന്തരമായി ആവശ്യമുണ്ടായിരുന്നു. തുക തിരികെ ചോദിച്ച് ബാങ്കിനെ സമീപിച്ചെങ്കിലും ഒരു രൂപ പോലും നല്കാന് അവര് തയ്യാറായില്ല. യു.ഡി.എഫ് നേതാക്കളോടും മുഖ്യമന്ത്രി പിണറായി വിജയനോടും ഇബ്രാഹിം ഹാജി സഹായം അഭ്യര്ത്ഥിച്ചിരുന്നെങ്കിലും ആരില് നിന്നും ഫലപ്രദമായ ഇടപെടല് ഉണ്ടായില്ല. ബാങ്ക് ഭാരവാഹിയായ ബഷീര് ഒരിക്കല് ഇബ്രാഹിം ഹാജിക്ക് മടങ്ങിവന്ന ചെക്ക് (വണ്ടിച്ചെക്ക്) നല്കി പറ്റിക്കാന് നോക്കിയതായും ഇതിനെതിരെ ഇബ്രാഹിം ഹാജി കോടതിയെ സമീപിച്ചിരുന്നതായും പ്രഫുല് കൃഷ്ണന് പറഞ്ഞു.
ഇതിന് പുറമെ ബാങ്കിന്റെ വാഹനം ഉപയോഗിച്ച് ഇബ്രാഹിം ഹാജിയെ ഇടിച്ചുകൊല്ലാന് ശ്രമം നടന്നതായും ബി.ജെ.പി നേതാവ് ആരോപിച്ചു. ബാങ്കിലെ നിക്ഷേപം തിരികെ കിട്ടാത്തതിലുള്ള കടുത്ത മനോവിഷമത്തെ തുടര്ന്ന് കോഴിക്കോട് ഡി.സി.സി സെക്രട്ടറിയും ബാങ്ക് മുന് സെക്രട്ടറിയുമായ സുധീര്കുമാറിന്റെ വീട്ടിലെത്തിയാണ് ഇബ്രാഹിം ഹാജി പെട്രോളൊഴിച്ച് തീ കൊളുത്തിയത്.
ഗുരുതരമായി പൊള്ളലേറ്റ ഇദ്ദേഹത്തെ നാട്ടുകാര് ചേര്ന്നാണ് വടകര ജില്ലാ ആശുപത്രിയിലും പിന്നീട് കോഴിക്കോട് മെഡിക്കല് കോളേജ് ആശുപത്രിയിലും എത്തിച്ചത്. ചികിത്സയിലിരിക്കെയാണ് അദ്ദേഹം മരണത്തിന് കീഴടങ്ങിയത്. ഈ സാമ്പത്തിക പ്രതിസന്ധിയെക്കുറിച്ച് നേരത്തെ പോലീസില് പരാതി നല്കിയിരുന്ന കാര്യം ഇബ്രാഹിം ഹാജിയുടെ മരണമൊഴിയിലുണ്ടെന്ന് അധികൃതര് സ്ഥിരീകരിച്ചിട്ടുണ്ട്.
