തിരുവനന്തപുരം: കേരളത്തില്‍ കാലവര്‍ഷം സജീവമാകാന്‍ ഇനി മണിക്കൂറുകള്‍ മാത്രം ബാക്കി. അടുത്ത മൂന്ന് അല്ലെങ്കില്‍ നാല് ദിവസത്തിനുള്ളില്‍ തെക്കുപടിഞ്ഞാറന്‍ മാന്‍സൂണ്‍ കേരളതീരത്തും തമിഴ്നാടിന്റെ ചില ഭാഗങ്ങളിലും പ്രവേശിക്കുമെന്നാണ് പുതിയ കാലാവസ്ഥാ പ്രവചനം. അറബിക്കടലിന്റെ തെക്കുകിഴക്കന്‍ മേഖലയിലായി രൂപപ്പെട്ടിരിക്കുന്ന ശക്തമായ അന്തരീക്ഷച്ചുഴിയാണ് നിലവില്‍ സംസ്ഥാനത്ത് മഴ കനക്കാന്‍ കാരണമാകുന്നത്.
മഴ ശക്തമാകുന്നതിന്റെ ഭാഗമായി വിവിധ ജില്ലകളില്‍ ജാഗ്രതാ നിര്‍ദ്ദേശം പുറപ്പെടുവിച്ചിട്ടുണ്ട്. ഇന്ന് ഒന്‍പത് ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. പത്തനംതിട്ട, ആലപ്പുഴ, കോട്ടയം, എറണാകുളം, തൃശൂര്‍, മലപ്പുറം, കോഴിക്കോട്, വയനാട്, കണ്ണൂര്‍ എന്നീ ജില്ലകള്‍ക്കാണ് ജാഗ്രതാ നിര്‍ദ്ദേശം നല്‍കിയിരിക്കുന്നത്. വരും ദിവസങ്ങളില്‍ കനത്ത ഇടിമിന്നലിനൊപ്പം മണിക്കൂറില്‍ 40 മുതല്‍ 50 കിലോമീറ്റര്‍ വരെ വേഗതയുള്ള കാറ്റടിച്ചേക്കാം.
തീരദേശ മേഖലകളില്‍ കാറ്റിന്റെ വേഗത 55 കിലോമീറ്റര്‍ വരെ ഉയരാന്‍ സാധ്യതയുള്ളതിനാല്‍ ജാഗ്രത പാലിക്കണം. കടല്‍ പ്രക്ഷുബ്ധമാകാന്‍ സാധ്യതയുള്ളതിനാല്‍ ജൂണ്‍ 4 വരെ കേരളാ തീരത്തുനിന്നും ലക്ഷദ്വീപ് ഭാഗങ്ങളില്‍ നിന്നും മത്സ്യത്തൊഴിലാളികള്‍ കടലില്‍ പോകരുതെന്ന് കര്‍ശന നിര്‍ദ്ദേശം നല്‍കിയിട്ടുണ്ട്.
