തൃശ്ശൂര്‍: കേരളത്തില്‍ ഓള്‍ ഇന്ത്യ ഇന്‍സ്റ്റിറ്റ്യൂട്ട് ഓഫ് മെഡിക്കല്‍ സയന്‍സസ് സ്ഥാപിക്കുന്നതുമായി ബന്ധപ്പെട്ട് സംസ്ഥാന സര്‍ക്കാര്‍ സ്വീകരിച്ച പുതിയ സമീപനത്തെ കേന്ദ്രമന്ത്രി സുരേഷ് ഗോപി അഭിനന്ദിച്ചു. എയിംസിനായി കേന്ദ്ര സര്‍ക്കാര്‍ നിര്‍ദ്ദേശിക്കുന്ന ഏത് സ്ഥലവും പരിഗണിക്കാന്‍ തയ്യാറാണെന്ന സംസ്ഥാനത്തിന്റെ നിലപാട് അനുകൂലമായ ചുവടുവെപ്പാണെന്നും ഇത് കേരളത്തിന്റെ എയിംസ് സാധ്യതകളെ കൂടുതല്‍ ശക്തമാക്കുമെന്നും അദ്ദേഹം മാധ്യമങ്ങളോട് പറഞ്ഞു.
താന്‍ 2016-ല്‍ രാജ്യസഭാംഗമായ കാലം മുതല്‍ കേന്ദ്ര മാനദണ്ഡങ്ങള്‍ പാലിച്ച് ഒന്നിലധികം സ്ഥലങ്ങളുടെ പട്ടിക സമര്‍പ്പിക്കാന്‍ സംസ്ഥാനത്തോട് ആവശ്യപ്പെടുന്നുണ്ടെന്ന് അദ്ദേഹം ഓര്‍മ്മിപ്പിച്ചു. കേന്ദ്ര നിര്‍ദ്ദേശങ്ങള്‍ പൂര്‍ണ്ണമായി പാലിച്ച സംസ്ഥാനങ്ങള്‍ക്ക് മാത്രമാണ് പുതിയ പദ്ധതി പ്രകാരം എയിംസ് അനുവദിച്ചിട്ടുള്ളതെന്നും അദ്ദേഹം ചൂണ്ടിക്കാട്ടി. ‘മുന്‍പ് പിണറായി വിജയനോടും ഇക്കാര്യം വ്യക്തമാക്കിയിരുന്നു’. ഒരു വിമാനയാത്രയ്‌ക്കിടയില്‍ വെച്ച് മുഖ്യമന്ത്രി പിണറായി വിജയനെ നേരില്‍ കണ്ടപ്പോഴും താന്‍ ഈ വിഷയം സംസാരിച്ചിരുന്നു.
കേന്ദ്രം ആവശ്യപ്പെടുന്നതുപോലെ അഞ്ച് വ്യത്യസ്ത സ്ഥലങ്ങളുടെ പട്ടിക നല്‍കിയാല്‍ മാത്രമേ എയിംസ് എന്ന ആവശ്യം ഗൗരവമായി മുന്നോട്ട് കൊണ്ടുപോകാന്‍ സാധിക്കൂ എന്ന് മുഖ്യമന്ത്രിയെ ധരിപ്പിച്ചിരുന്നു. ‘എയിംസ് എന്നത് ഒരു ഗവണ്‍മെന്റിന്റെ മാത്രം ആവശ്യമല്ല, മറിച്ച് സാധാരണക്കാരായ ജനങ്ങളുടെ വലിയൊരു ആവശ്യമാണ്. ജനങ്ങളുടെ ആ അത്യാവശ്യം മനസ്സിലാക്കിക്കൊണ്ട് സംസ്ഥാന സര്‍ക്കാര്‍ ഇത്തരമൊരു നല്ല തീരുമാനം എടുത്തതില്‍ വലിയ സന്തോഷമുണ്ട്. കേരളത്തിന് എയിംസ് ലഭ്യമാക്കുന്നതിനായുള്ള പോരാട്ടങ്ങളുമായി ശക്തമായി മുന്നോട്ട് പോകും.’ എന്നും അദ്ദേഹം പറഞ്ഞു.
