സൂറിച്ച്: ആധുനിക ഫുട്ബോള് ചരിത്രത്തിലെ ഏറ്റവും ശ്രദ്ധേയമായ ശബ്ദങ്ങളിലൊന്നായ പ്ലാസ്റ്റിക് ഹോണ് ‘വുവുസേല’കള്ക്ക് 2026 ലോകകപ്പില് വിലക്ക്. ഫിഫ പുറത്തിറക്കിയ പുതിയ സ്റ്റേഡിയം പെരുമാറ്റച്ചട്ടത്തിന്റെ ഭാഗമായാണ് ഈ തീരുമാനം. ഇതോടെ കാനഡ, മെക്സിക്കോ, അമേരിക്ക എന്നീ രാജ്യങ്ങളിലായി നടക്കാനിരിക്കുന്ന ലോകകപ്പ് മത്സരങ്ങള് കാണാനെത്തുന്ന ആരാധകര്ക്ക് വുവുസേലകള് സ്റ്റേഡിയത്തിനകത്തേക്ക് കൊണ്ടുപോകാന് അനുവാദമുണ്ടാകില്ല. 2010-ലെ ദക്ഷിണാഫ്രിക്കന് ലോകകപ്പിന്റെ പ്രധാന അടയാളങ്ങളിലൊന്നായിരുന്നു ഈ പ്ലാസ്റ്റിക് ഹോണുകള്.
സ്റ്റേഡിയത്തിലെ സുരക്ഷ ഉറപ്പാക്കുന്നതിനും ആരാധകരുടെ പെരുമാറ്റം നിയന്ത്രിക്കുന്നതിനുമുള്ള മാര്ഗ്ഗനിര്ദ്ദേശങ്ങളുടെ ഭാഗമായാണ് ഫിഫ നിരോധിത വസ്തുകളുടെ പട്ടിക പുറത്തുവിട്ടത്. ലോകകപ്പ് ടിക്കറ്റുള്ള ഓരോ വ്യക്തിയും ഈ സ്റ്റേഡിയം പെരുമാറ്റച്ചട്ടം കര്ശനമായി പാലിക്കാന് ബാധ്യസ്ഥരാണെന്ന് ഫിഫയുടെ നിയമരേഖകളില് വ്യക്തമാക്കുന്നു. വുവുസേലകള്ക്ക് പുറമെ വിസിലുകള്, എയര് ഹോണുകള്, അമിത ശബ്ദമുണ്ടാക്കുന്ന മറ്റ് ഉപകരണങ്ങള് എന്നിവയും സ്റ്റേഡിയങ്ങളില് നിരോധിച്ചിട്ടുണ്ട്.
ഏത് വശത്തുനിന്നും അളന്നാല് 12 സെന്റിമീറ്ററിലധികം വലിപ്പമുള്ള സംഗീതോപകരണങ്ങള് സ്റ്റേഡിയത്തില് കയറ്റണമെങ്കില് സംഘാടകരില് നിന്ന് മുന്കൂട്ടി എഴുതി തയ്യാറാക്കിയ അനുമതി വാങ്ങണം. ഡ്രോണുകള്, പുനരുപയോഗിക്കാവുന്ന വാട്ടര് ബോട്ടിലുകള് എന്നിവയും നിരോധിത വസ്തുക്കളുടെ പട്ടികയിലുണ്ട്. ഏതൊരു വസ്തുവും സ്റ്റേഡിയത്തിനകത്തേക്ക് പ്രവേശിപ്പിക്കണമോ വേണ്ടയോ എന്ന കാര്യത്തില് ഫിഫയ്ക്കും സ്റ്റേഡിയം-ഗവണ്മെന്റ് അധികൃതര്ക്കുമായിരിക്കും അന്തിമ തീരുമാനമെടുക്കാനുള്ള അവകാശം.
വെറുമൊരു നിരോധിത വസ്തു എന്നതിലുപരി ലോകകപ്പ് ചരിത്രത്തില് വലിയൊരു സ്ഥാനമുള്ള ഉപകരണമാണ് വുവുസേല. 2010-ലെ ദക്ഷിണാഫ്രിക്കന് ലോകകപ്പിന്റെ പ്രധാന ഐഡന്റിറ്റിയായി മാറിയത് സ്റ്റേഡിയങ്ങളില് നിന്ന് ഉയര്ന്നുകേട്ട വുവുസേലകളുടെ നിര്ത്താതെയുള്ള ശബ്ദമായിരുന്നു. 2010 ലോകകപ്പ് കാലത്ത് വുവുസേലകള്ക്ക് ലഭിച്ച ജനപ്രീതിയെക്കുറിച്ച് ഫിഫ ലോകകപ്പ് ആസ്ഥാനം അടുത്തിടെ തങ്ങളുടെ എക്സ് (ട്വിറ്റര്) ഹാന്ഡിലിലൂടെ പങ്കുവെച്ചിരുന്നു. ദക്ഷിണാഫ്രിക്കന് ലോകകപ്പിലെ വര്ണ്ണപ്പൊലിമയും ഊര്ജ്ജസ്വലതയും ആ അദ്ഭുത ശബ്ദവും ഓര്മ്മിക്കുന്ന ആരാധകര്ക്ക്, ഈ നിരോധനത്തോടെ 2026 ലോകകപ്പ് തികച്ചും വ്യത്യസ്തമായ ഒരു അനുഭവമായിരിക്കും സമ്മാനിക്കുക.
