മുംബൈ: മഹാരാഷ്ട്രയില് അന്താരാഷ്ട്ര സ്വര്ണ്ണക്കടത്ത് സംഘത്തെ വിജയകരമായി തകര്ത്ത് ഡയറക്ടറേറ്റ് ഓഫ് റവന്യൂ ഇന്റലിജന്സ്. മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തില് നടത്തിയ ‘ഓപ്പറേഷന് ഗോള്ഡന് നെക്സസ്’ എന്ന പ്രത്യേക പരിശോധനയിലൂടെയാണ് സംഘം വലയിലായത്. അഞ്ച് കോടി രൂപയോളം വിലമതിക്കുന്ന 3.2 കിലോഗ്രാം വിദേശ സ്വര്ണ്ണമാണ് അധികൃതര് പിടിച്ചെടുത്തത്.
സംഭവവുമായി ബന്ധപ്പെട്ട് മൂന്ന് വിദേശ യാത്രക്കാരും മൂന്ന് വിമാനത്താവള ജീവനക്കാരും സ്വര്ണ്ണം വാങ്ങാനെത്തിയ ഒരാളും ഉള്പ്പെടെ ഏഴ് പേരെ ഡി.ആര്.ഐ അറസ്റ്റ് ചെയ്തു. ബംഗ്ലാദേശ്, ശ്രീലങ്ക എന്നിവിടങ്ങളില് നിന്നുള്ള ട്രാന്സിറ്റ് യാത്രക്കാരാണ് പിടിയിലായ കടത്തുകാര്.
വിമാനത്താവള ജീവനക്കാരുടെ സഹായത്തോടെയാണ് സംഘം കടത്ത് നടത്തിയിരുന്നതെന്ന് ഉദ്യോഗസ്ഥര് വ്യക്തമാക്കി. വിദേശത്ത് നിന്നെത്തിയ ക്യാരിയര്മാര് തങ്ങളുടെ ശരീരത്തിനുള്ളില് ഒളിപ്പിച്ചാണ് സ്വര്ണ്ണം വിമാനത്താവളത്തില് എത്തിച്ചത്. തുടര്ന്ന് പിടിക്കപ്പെടാതെ ഇത് വിമാനത്താവളത്തിന് പുറത്തേക്ക് കടത്താനും അടുത്തയാള്ക്ക് കൈമാറാനും വിമാനത്താവള ജീവനക്കാര് ഇവര്ക്ക് സൗകര്യമൊരുക്കുകയായിരുന്നുവെന്ന് ഡി.ആര്.ഐ ഉദ്യോഗസ്ഥര് അറിയിച്ചു. പ്രതികളെ വിശദമായി ചോദ്യം ചെയ്തുവരികയാണ്.
