കൊല്ക്കത്ത: നഗരത്തിലെ യാത്രാസൗകര്യങ്ങള് മെച്ചപ്പെടുത്തുന്നതിനും ആധുനികവല്ക്കരിക്കുന്നതിനുമായി കൊല്ക്കത്ത മെട്രോയിലേക്ക് അടുത്ത 4-5 വര്ഷത്തിനുള്ളില് 60 പുതിയ തലമുറ (ന്യൂ ജനറേഷന്) ട്രെയിനുകള് എത്തിക്കുമെന്ന് കേന്ദ്ര റെയില്വേ മന്ത്രി അശ്വിനി വൈഷ്ണവ് അറിയിച്ചു. കൊല്ക്കത്ത മെട്രോ സ്റ്റേഷന് സന്ദര്ശന വേളയിലും തുടര്ന്ന് നടത്തിയ ട്രെയിന് യാത്രയിലുമാണ് മന്ത്രി ഇക്കാര്യം വ്യക്തമാക്കിയത്.
കൊല്ക്കത്ത നഗരത്തിലെ ഗതാഗത സൗകര്യങ്ങള് വര്ദ്ധിപ്പിക്കുന്നതിനായി വലിയ ശ്രമങ്ങളാണ് നടത്തിവരുന്നതെന്ന് അദ്ദേഹം പറഞ്ഞു. ‘പദ്ധതികള് മുന്നോട്ടുപോകുന്നതിനനുസരിച്ച് കൊല്ക്കത്തയിലെ യാത്രാസൗകര്യങ്ങളും കൂടുതല് മെച്ചപ്പെടും. വരും വര്ഷങ്ങളില് പൂര്ണ്ണമായും പുതിയ തലമുറയില്പ്പെട്ട ട്രെയിനുകളാകും കൊല്ക്കത്ത മെട്രോയ്ക്ക് ലഭിക്കുക,’ കേന്ദ്രമന്ത്രി കൂട്ടിച്ചേര്ത്തു.
മെട്രോ വികസനത്തിനൊപ്പം കൊല്ക്കത്ത നഗരത്തെ ബന്ധിപ്പിച്ചുകൊണ്ട് പുതിയ ‘വാട്ടര് മെട്രോ’ സംവിധാനം വരുന്നുവെന്ന് പശ്ചിമ ബംഗാള് മുഖ്യമന്ത്രി സുവേന്ദു അധികാരി പ്രഖ്യാപിച്ചു. ഇതോടെ ജലഗതാഗത അധിഷ്ഠിത നഗര ശൃംഖല നടപ്പിലാക്കുന്ന ഇന്ത്യയിലെ 18-ാമത്തെ നഗരമായി കൊല്ക്കത്ത മാറും. കേന്ദ്ര സര്ക്കാരിന്റെ ‘സാഗര്മാല 2’ പദ്ധതിക്ക് കീഴില് വിപുലമായ സമുദ്ര-അടിസ്ഥാന സൗകര്യ വികസന പദ്ധതികളും മുഖ്യമന്ത്രി പ്രഖ്യാപിച്ചു.
വാര്ത്താ സമ്മേളനത്തില് സംസാരിച്ച മുഖ്യമന്ത്രി സുവേന്ദു അധികാരി, സാഗര്മാല 2 പദ്ധതിയില് സംസ്ഥാന സര്ക്കാര് സജീവമായി പങ്കാളികളാകാന് തീരുമാനിച്ചതായി അറിയിച്ചു. തീരദേശ വികസനം, മത്സ്യബന്ധന അടിസ്ഥാന സൗകര്യങ്ങള്, ദ്വീപ് വികസനം തുടങ്ങിയ മേഖലകളില് ശ്രദ്ധ കേന്ദ്രീകരിച്ച് അടുത്ത അഞ്ച് വര്ഷത്തിനുള്ളില് 22,700 കോടി രൂപയുടെ പദ്ധതി നിര്ദ്ദേശങ്ങളാണ് സംസ്ഥാനം തയ്യാറാക്കുന്നത്.
‘മുന് സര്ക്കാര് കേന്ദ്ര സര്ക്കാരിന്റെ പല പ്രധാന പദ്ധതികളിലും സജീവമായി സഹകരിച്ചിരുന്നില്ല. അതിന്റെ ഫലമായി സാഗര്മാല 1 പദ്ധതിയുടെ ഭാഗമാകാനുള്ള അവസരം നമുക്ക് നഷ്ടമായി. എന്നാല് കഴിഞ്ഞ ദിവസം പ്രധാനമന്ത്രി സാഗര്മാല 2 പദ്ധതിക്ക് അനുമതി നല്കിയതോടെ ഈ പദ്ധതിയില് പങ്കുചേരാന് ഞങ്ങള് തീരുമാനിച്ചു. അടുത്ത അഞ്ച് വര്ഷത്തിനുള്ളില് നടപ്പിലാക്കുന്നതിനായി 22,700 കോടി രൂപയുടെ പദ്ധതികളാണ് സംസ്ഥാനം ഒരുക്കുന്നത്.’ അദ്ദേഹം പറഞ്ഞു.
നേരത്തെ, സംസ്ഥാന സെക്രട്ടറിയേറ്റായ ‘നബന്ന’യില് എത്തിയ കേന്ദ്രമന്ത്രി അശ്വിനി വൈഷ്ണവിനെ മുഖ്യമന്ത്രി സുവേന്ദു അധികാരി സ്വീകരിച്ചിരുന്നു. കേന്ദ്ര-സംസ്ഥാന സര്ക്കാരുകളുടെ സംയുക്ത നീക്കത്തിലൂടെ കൊല്ക്കത്തയുടെ ഗതാഗത-അടിസ്ഥാന സൗകര്യ മേഖലകളില് വലിയ മാറ്റങ്ങളാണ് വരും വര്ഷങ്ങളില് പ്രതീക്ഷിക്കുന്നത്.
