ധാക്ക: മുന് ബംഗ്ലാദേശ് ക്രിക്കറ്റ് താരം തമീം ഇഖ്ബാലിനെ ബംഗ്ലാദേശ് ക്രിക്കറ്റ് ബോര്ഡിന്റെ പുതിയ പ്രസിഡന്റായി ഔദ്യോഗികമായി തിരഞ്ഞെടുത്തു. കഴിഞ്ഞ ഏപ്രില് മാസത്തില് ബി.സി.ബി ഡയറക്ടര് ബോര്ഡ് സര്ക്കാര് പിരിച്ചുവിട്ടതിനെ തുടര്ന്ന് ബോര്ഡിന്റെ ഇടക്കാല തലവനായി പ്രവര്ത്തിച്ചു വരികയായിരുന്നു തമീം. 37-ാം വയസ്സില് ഈ പദവിയിലെത്തുന്നതോടെ ബംഗ്ലാദേശ് ക്രിക്കറ്റ് ബോര്ഡിന്റെ ചരിത്രത്തിലെ ഏറ്റവും പ്രായം കുറഞ്ഞ പ്രസിഡന്റ് എന്ന റെക്കോര്ഡും തമീം ഇഖ്ബാല് സ്വന്തമാക്കി.
കഴിഞ്ഞ വര്ഷം ഒക്ടോബറില് നടന്ന ബി.സി.ബി തിരഞ്ഞെടുപ്പുമായി ബന്ധപ്പെട്ട അഴിമതി ആരോപണങ്ങളെക്കുറിച്ച് അന്വേഷിച്ച അഞ്ചംഗ സമിതിയുടെ ശുപാര്ശയെ തുടര്ന്നാണ് ബോര്ഡ് പിരിച്ചുവിടാന് സര്ക്കാര് തീരുമാനിച്ചത്. മുന് ദേശീയ ക്യാപ്റ്റന് അമിനുല് ഇസ്ലാം ബുള്ബുളിന്റെ നേതൃത്വത്തിലുള്ള സമിതിയെ പിരിച്ചുവിട്ട ശേഷം പുതിയ തിരഞ്ഞെടുപ്പ് നടത്താന് ബി.സി.ബി തീരുമാനിക്കുകയായിരുന്നു. തുടര്ന്ന് ബോര്ഡിന്റെ കാര്യങ്ങള് നിയന്ത്രിക്കാന് രൂപീകരിച്ച 11 അംഗ അഡ്ഹോക് കമ്മിറ്റിയുടെ തലവനായി തമീമിനെ നിയോഗിച്ചു.
ബംഗ്ലാദേശ് ക്രിക്കറ്റ് ബോര്ഡ് നേരിടുന്ന കടുത്ത പ്രതിസന്ധികളെക്കുറിച്ച് തമീം ഇഖ്ബാല് വാര്ത്താസമ്മേളനത്തില് സംസാരിച്ചു. ‘കഴിഞ്ഞ ഒന്നര വര്ഷമായി ഇവിടെ നടന്ന കാര്യങ്ങള് ശരിയായ രീതിയിലല്ല. ഞാന് ആരെയും കുറ്റപ്പെടുത്താനോ വിരല് ചൂണ്ടാനോ ആഗ്രഹിക്കുന്നില്ല. ഈ സാഹചര്യത്തില് നിന്ന് നമുക്ക് പുറത്തുകടക്കണമെങ്കില് എല്ലാവരുടെയും പിന്തുണ ആവശ്യമാണ്, ഇത് ഒരാള്ക്ക് മാത്രമായി ചെയ്യാന് കഴിയുന്നതല്ല,’ തമീം പറഞ്ഞു.
ക്രിക്കറ്റ് ബോര്ഡിന് സംഭവിച്ച പ്രതിച്ഛായ നഷ്ടം പരിഹരിക്കേണ്ടതുണ്ടെന്നും, മാധ്യമങ്ങളുടെയും ആരാധകരുടെയും സര്ഗ്ഗാത്മകമായ വിമര്ശനങ്ങള് മികച്ച രീതിയില് പ്രവര്ത്തിക്കാന് സഹായിക്കുമെന്നും അദ്ദേഹം കൂട്ടിച്ചേര്ത്തു. എട്ട് വര്ഷങ്ങള്ക്ക് ശേഷം താന് വീണ്ടും പതിവായി മാധ്യമങ്ങളോട് സംസാരിക്കുമെന്നും തന്റെ പദ്ധതികളെക്കുറിച്ച് എല്ലാവരെയും അറിയിക്കുമെന്നും അദ്ദേഹം വ്യക്തമാക്കി.
ഭരണഘടനയില് വൈസ് പ്രസിഡന്റ് പദവി വേണമെന്ന നിര്ദേശം തമീം തന്നെയാണ് മുന്നോട്ടുവെച്ചത്. ഇതിന്റെ അടിസ്ഥാനത്തില് രണ്ട് വൈസ് പ്രസിഡന്റുമാരില് ഒരാളായി ഫഹീം സിന്ഹയെ ഐകകണ്ഠ്യേന തിരഞ്ഞെടുത്തു. രണ്ടാമത്തെ വൈസ് പ്രസിഡന്റിനെ നിലവില് തിരഞ്ഞെടുത്തിട്ടില്ല. ഭാവിയില് ആവശ്യമായി വന്നാല് കൂടുതല് പേരെ നിയമിക്കുമെന്നും ബോര്ഡ് ഇപ്പോള് ഈ തീരുമാനത്തിലാണ് എത്തിയിരിക്കുന്നതെന്നും തമീം അറിയിച്ചു.
അഭ്യന്തര തര്ക്കങ്ങളും ഭരണപരമായ വീഴ്ചകളും കാരണം ബി.സി.ബിയില് വലിയ അസംതൃപ്തി നിലനിന്നിരുന്നു. കഴിഞ്ഞ ദിവസങ്ങളില് പല ഡയറക്ടര്മാരും രാജിവെച്ചതും ഇതിന്റെ സൂചനയായിരുന്നു. ട്വന്റി-20 ലോകകപ്പിനിടെയുണ്ടായ ചില വിവാദ സംഭവങ്ങളാണ് ക്രിക്കറ്റ് ബോര്ഡില് പെട്ടെന്നുള്ള ഈ നേതൃമാറ്റത്തിന് വഴിയൊരുക്കിയതെന്നാണ് സൂചന.
