പത്തനംതിട്ട: ജില്ലയില് വീശിയടിച്ച ശക്തമായ കാറ്റിലും കനത്ത മഴയിലും തണ്ണിത്തോട് സെന്റ് ബെനഡിക്ട് എംഎസ്സി ഹൈസ്കൂള് കെട്ടിടത്തിന് വന് നാശനഷ്ടം. സ്കൂള് കെട്ടിടത്തിന്റെ രണ്ടാം നിലയുടെ മേല്ക്കൂര കനത്ത ആഘാതത്തില് പൂര്ണ്ണമായും ഇളകിമാറി ദൂരേക്ക് പറന്നുപോവുകയായിരുന്നു. ഞായറാഴ്ച ഉച്ചയ്ക്ക് 12:30 ഓടെയാണ് നാടിനെ നടുക്കിയ ഈ സംഭവം ഉണ്ടായത്.
പതിവായി ക്ലാസുകള് നടക്കുന്ന പ്രധാന കെട്ടിടത്തിന്റെ മേല്ക്കൂരയാണ് തകര്ന്നുവീണത്. അപകടം നടന്നത് ഞായറാഴ്ചയായതിനാല് സ്കൂളിന് അവധിയായിരുന്നു. ക്ലാസ് മുറികളില് വിദ്യാര്ത്ഥികളോ അധ്യാപകരോ ഇല്ലാതിരുന്നതുകൊണ്ട് മാത്രമാണ് വലിയൊരു ദുരന്തം തലനാരിഴയ്ക്ക് ഒഴിവായത്.
