വാഷിംഗ്ടണ്: ഇറാന്റെ പരമാധികാരി ആയത്തുള്ള മൊജ്തബ ഖമേനിയുടെ ഒളിവുകേന്ദ്രം എവിടെയെന്ന് അറിയാന് ‘വലിയ സാധ്യതയുണ്ടെന്ന്’ അമേരിക്കന് പ്രസിഡന്റ് ഡൊണാള്ഡ് ട്രംപ്. ഫെബ്രുവരിയില് നടന്ന ആക്രമണത്തില് ഖമേനിക്ക് ‘അതീവ ഗുരുതരമായി പരിക്കേറ്റിട്ടുണ്ടെന്നും’ ട്രംപ് അവകാശപ്പെട്ടു. ഒരു പ്രമുഖ ചാനല് പരിപാടിക്ക് നല്കിയ അഭിമുഖത്തിലാണ് ട്രംപ് ഇറാന്റെ നിലവിലെ രാഷ്ട്രീയ സാഹചര്യങ്ങളെക്കുറിച്ചും ഭരണത്തലവന്റെ ആരോഗ്യനിലയെക്കുറിച്ചും നിര്ണ്ണായക വിവരങ്ങള് പങ്കുവെച്ചത്.
ഖമേനി നിലവില് എവിടെയാണെന്ന് വ്യക്തമായി അറിയാമോ എന്ന ചോദ്യത്തിന്, സുരക്ഷാ കാരണങ്ങളാല് കൃത്യമായ സ്ഥലം വെളിപ്പെടുത്താന് അദ്ദേഹം വിസമ്മതിച്ചു. ‘അദ്ദേഹം എവിടെയാണെന്ന് എനിക്കറിയാമോ ഇല്ലയോ എന്ന് വ്യക്തമാക്കാന് ഞാന് ആഗ്രഹിക്കുന്നില്ല. എങ്കിലും എനിക്ക് അത് അറിയാന് വലിയ സാധ്യതയുണ്ട്,’ ട്രംപ് പറഞ്ഞു. ഖമേനി നിലവില് ഇറാന് ഉള്ളില്ത്തന്നെയാണോ എന്ന ചോദ്യത്തോടും പ്രതികരിക്കാന് ട്രംപ് തയ്യാറായില്ല.
ഫെബ്രുവരി 28-ന് യുദ്ധത്തിന്റെ തുടക്കത്തില് ഉണ്ടായ വ്യോമാക്രമണത്തിലാണ് മൊജ്തബ ഖമേനിക്ക് ഗുരുതരമായി പരിക്കേറ്റത്. മുന് പരമാധികാരിയും മൊജ്തബയുടെ പിതാവുമായ അലി ഖമേനിയും നിരവധി മുതിര്ന്ന സൈനിക ഉദ്യോഗസ്ഥരും കൊല്ലപ്പെട്ട അതേ ആക്രമണത്തിലായിരുന്നു ഇത്. അതിനുശേഷം അദ്ദേഹം പൊതുവേദികളില് പ്രത്യക്ഷപ്പെട്ടിട്ടില്ല. ഔദ്യോഗിക മാധ്യമങ്ങളിലൂടെ പുറത്തുവരുന്ന ചില രേഖാമൂലമുള്ള സന്ദേശങ്ങള് മാത്രമാണ് അദ്ദേഹത്തിന്റേതായി നിലവിലുള്ളത്.
ഗുരുതരമായി പരിക്കേറ്റിട്ടും ഭരണപരമായ കാര്യങ്ങളില് ഇടപെടുകയും പ്രസ്താവനകള് ഇറക്കുകയും ചെയ്യുന്ന ഖമേനിയുടെ തീരുമാനത്തില് ഒരുതരം ‘ധീരത’ ഉണ്ടെന്ന് ട്രംപ് അഭിപ്രായപ്പെട്ടു. തന്റെ പിതാവിനേക്കാള് കൂടുതല് പ്രായോഗികമായി ചിന്തിക്കുന്ന ആളാണ് പുതിയ ഇറാന് ഭരണത്തലവനെന്നും ട്രംപ് വിശേഷിപ്പിച്ചു. ‘അദ്ദേഹം ചെറുപ്പമാണ്, കൂടുതല് യുക്തിസഹമായി ചിന്തിക്കുന്ന ആളാണെന്നാണ് ഞാന് കരുതുന്നത്.
പരിക്കേറ്റിട്ടും, ഇത്രയും ഗുരുതരമായ അവസ്ഥയിലും അമേരിക്കയുമായുള്ള ചര്ച്ചകളെക്കുറിച്ച് അദ്ദേഹം സംസാരിക്കുന്നുണ്ട്. സാധാരണയായി ഇത്രയും വലിയ പരിക്കേറ്റവര് മറ്റ് കാര്യങ്ങളിലാകും ശ്രദ്ധ കേന്ദ്രീകരിക്കുക. അതുകൊണ്ട് തന്നെ അതിലൊരു ധീരതയുണ്ട്,’ ട്രംപ് കൂട്ടിച്ചേര്ത്തു. ഖമേനിയുമായി നേരിട്ട് കൂടിക്കാഴ്ച നടത്താന് തനിക്ക് താല്പ്പര്യമുണ്ടെന്ന് ട്രംപ് കഴിഞ്ഞ ആഴ്ച വ്യക്തമാക്കിയിരുന്നു.
ഇറാന് തങ്ങളുടെ ആണവ പദ്ധതികള് താല്ക്കാലികമായി നിര്ത്തിവെക്കാന് സമ്മതിച്ചിട്ടുണ്ടെന്നും ട്രംപ് അവകാശപ്പെട്ടിരുന്നു. എന്നാല്, ആണവ പദ്ധതിയതുമായി ബന്ധപ്പെട്ട ട്രംപിന്റെ ഈ വാദങ്ങളെ ഇറാന് ഭരണകൂടം ഉടന് തന്നെ തള്ളിക്കളയുകയും ചെയ്തു. ഇരു രാജ്യങ്ങളും തമ്മിലുള്ള സമാധാന ചര്ച്ചകള് ഇപ്പോഴും അനിശ്ചിതത്വത്തിലാണ്.
