തിരുവനന്തപുരം: കഴിഞ്ഞ ദിവസങ്ങളില് സംസ്ഥാനത്ത് പരക്കെ പെയ്ത കനത്ത മഴയുടെ തീവ്രത ഇന്ന് മുതല് കുറയുമെന്ന് കേന്ദ്ര കാലാവസ്ഥാ വകുപ്പ് അറിയിച്ചു. നിലവില് ആശങ്കപ്പെടേണ്ട സാഹചര്യമില്ലാത്തതിനാല് ഒരു ജില്ലയിലും റെഡ്, ഓറഞ്ച് അലര്ട്ടുകള് പ്രഖ്യാപിച്ചിട്ടില്ല. എന്നാല് വടക്കന് കേരളത്തിലെ മലപ്പുറം, കോഴിക്കോട്, വയനാട്, കണ്ണൂര്, കാസര്കോട് എന്നീ അഞ്ച് ജില്ലകളില് ജാഗ്രതയുടെ ഭാഗമായി യെല്ലോ അലര്ട്ട് നിലനില്ക്കുന്നുണ്ട്. വരും ദിവസങ്ങളിലും സംസ്ഥാനത്ത് ഇടവിട്ടുള്ള മിതമായ മഴ തുടരാനാണ് സാധ്യത.
വരും ദിവസങ്ങളില് ചില ജില്ലകളില് ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാല് കാലാവസ്ഥാ വകുപ്പ് യെല്ലോ അലര്ട്ട് പ്രഖ്യാപിച്ചിട്ടുണ്ട്. നാളെ മലപ്പുറം, കോഴിക്കോട്, വയനാട്, കണ്ണൂര്, കാസര്കോട് ജില്ലകളള്ക്കും വെള്ളി എറണാകുളം, തൃശ്ശൂര്, പാലക്കാട്, മലപ്പുറം ജില്ലകള്ക്കും മഴ മുന്നറിയിപ്പ് നല്കിയിട്ടുണ്ട്. ഈ പ്രദേശങ്ങളില് മുന്നറിയിപ്പുള്ളതിനാല് മലയോര മേഖലകളിലുള്ളവര് ജാഗ്രത പാലിക്കണമെന്ന് അധികൃതര് നിര്ദ്ദേശിച്ചു.
കേരളത്തില് മഴയുടെ ശക്തി കുറയുമ്പോഴും രാജ്യത്തിന്റെ മറ്റ് ഭാഗങ്ങളില് കാലവര്ഷം മുന്നേറുകയാണ്. വടക്കുകിഴക്കന് ഇന്ത്യന് സംസ്ഥാനങ്ങളുടെ അവശേഷിക്കുന്ന പ്രദേശങ്ങളിലും സിക്കിമില് പൂര്ണ്ണമായും കഴിഞ്ഞദിവസം കാലവര്ഷം എത്തിച്ചേര്ന്നു. ഇതിനുപുറമെ പശ്ചിമ ബംഗാളിന്റെ ഉപ-ഹിമാലയന് മേഖലകളിലും മണ്സൂണ് ഇതിനകം സജീവമായിട്ടുണ്ടെന്ന് കാലാവസ്ഥാ നിരീക്ഷകര് വ്യക്തമാക്കി.
