ന്യൂഡല്‍ഹി: കേരളത്തിന്റെ അടിസ്ഥാന സൗകര്യ വികസനത്തിനും കര്‍ഷക ക്ഷേമത്തിനുമായി ബി.ജെ.പി സംസ്ഥാന നേതൃത്വം ഡല്‍ഹിയില്‍ കേന്ദ്രമന്ത്രിമാരുമായി നിര്‍ണായക കൂടിക്കാഴ്ചകള്‍ നടത്തി. ബി.ജെ.പി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍ എം.എല്‍.എയുടെ നേതൃത്വത്തിലുള്ള സംഘമാണ് കേന്ദ്ര റെയില്‍വേ മന്ത്രി അശ്വിനി വൈഷ്ണവ്, കാര്‍ഷിക മന്ത്രി ശിവരാജ് സിംഗ് ചൗഹാന്‍ എന്നിവരെ കണ്ട് ചര്‍ച്ച നടത്തിയത്.
കേന്ദ്ര റെയില്‍വേ മന്ത്രിയുമായി നടത്തിയ കൂടിക്കാഴ്ചയില്‍ നേമം (തിരുവനന്തപുരം സൗത്ത്) ടെര്‍മിനല്‍ പദ്ധതിയുടെ സമഗ്ര വികസനമാണ് പ്രധാനമായും ചര്‍ച്ചയായത്. പദ്ധതിയുടെ തുടര്‍നടപടികള്‍ വേഗത്തിലാക്കുമെന്ന് കേന്ദ്രമന്ത്രി ഉറപ്പുനല്‍കിയതായി നേതാക്കള്‍ അറിയിച്ചു. റെയില്‍വേ പാസഞ്ചര്‍ അമിനിറ്റീസ് കമ്മിറ്റി മുന്‍ ചെയര്‍മാന്‍ പി.കെ. കൃഷ്ണദാസും ഈ കൂടിക്കാഴ്ചയില്‍ പങ്കെടുത്തു. സംസ്ഥാനത്തെ റെയില്‍വേ സ്റ്റേഷനുകളുടെ നവീകരണം, പുതിയ സ്റ്റോപ്പുകള്‍ അനുവദിക്കല്‍, യാത്രാസൗകര്യങ്ങള്‍ വര്‍ദ്ധിപ്പിക്കല്‍ തുടങ്ങിയ ആവശ്യങ്ങളും മന്ത്രിക്ക് മുന്നില്‍ സമര്‍പ്പിച്ചു. കേരളത്തിലെ ജനങ്ങള്‍ക്ക് ലോകോത്തര യാത്രാസൗകര്യങ്ങള്‍ ഉറപ്പാക്കുകയാണ് തങ്ങളുടെ ലക്ഷ്യമെന്ന് രാജീവ് ചന്ദ്രശേഖര്‍ വ്യക്തമാക്കി.
തുടര്‍ന്ന് കേന്ദ്ര കൃഷി-കര്‍ഷകക്ഷേമ മന്ത്രി ശിവരാജ് സിംഗ് ചൗഹാനുമായി കൃഷി ഭവനില്‍ വെച്ച് സംഘം കൂടിക്കാഴ്ച നടത്തി. തിരുവനന്തപുരം മേയര്‍ അഡ്വ. വി.വി. രാജേഷും ചര്‍ച്ചയില്‍ പങ്കെടുത്തു. കേരളത്തിലെ കര്‍ഷകര്‍ നേരിടുന്ന കടുത്ത പ്രതിസന്ധികളും കാര്‍ഷിക മേഖലയിലെ വെല്ലുവിളികളും കേന്ദ്രമന്ത്രിയുടെ ശ്രദ്ധയില്‍പ്പെടുത്തി. കഴിഞ്ഞ പത്ത് വര്‍ഷമായി സംസ്ഥാനം ഭരിച്ച ഇടത് സര്‍ക്കാരും പ്രതിപക്ഷമായ കോണ്‍ഗ്രസും കര്‍ഷകരുടെ പ്രശ്‌നങ്ങളോട് ഉദാസീനമായ സമീപനമാണ് സ്വീകരിച്ചതെന്ന് ബി.ജെ.പി അധ്യക്ഷന്‍ കുറ്റപ്പെടുത്തി. കര്‍ഷകര്‍ക്ക് അര്‍ഹമായ നീതി ഉറപ്പാക്കാന്‍ കേന്ദ്ര സര്‍ക്കാരിന്റെ ശക്തമായ ഇടപെടലും സഹായവും അദ്ദേഹം അഭ്യര്‍ത്ഥിച്ചു.
അടിസ്ഥാന സൗകര്യ വികസനത്തിലൂടെയും കാര്‍ഷിക നവീകരണത്തിലൂടെയും വികസിത കേരളം എന്ന ലക്ഷ്യം കൈവരിക്കാനുള്ള പദ്ധതികളാണ് കേന്ദ്രമന്ത്രിമാരുമായി പങ്കുവെച്ചതെന്നും, സംസ്ഥാനത്തിന്റെ ക്ഷേമത്തിനായുള്ള പ്രവര്‍ത്തനങ്ങള്‍ കൂടുതല്‍ ശക്തമായി മുന്നോട്ട് കൊണ്ടുപോകുമെന്നും ബി.ജെ.പി നേതൃത്വം അറിയിച്ചു.
