ബാലസോര്‍: ആഗോള പ്രതിരോധ രംഗത്ത് ഇന്ത്യയുടെ കരുത്ത് വിളിച്ചോതുന്ന ഏറ്റവും പുതിയ ഭൂഖണ്ഡാന്തര ബാലിസ്റ്റിക് മിസൈല്‍ (ICBM) ‘അഗ്‌നി 6’ (Agni-VI) പരീക്ഷണത്തിനൊരുങ്ങുന്നതായി സൂചനകള്‍. ഒഡീഷയിലെ ബാലസോര്‍ ജില്ലയിലുള്ള ഡിആര്‍ഡിഒയുടെ (DRDO) സംയോജിത പരീക്ഷണ മേഖലയായ ചാന്ദിപൂര്‍ ഐടിആറില്‍ (ITR) ഇതിനായുള്ള പ്രാരംഭ നടപടികള്‍ ആരംഭിച്ചതായാണ് പ്രതിരോധ വൃത്തങ്ങളെ ഉദ്ധരിച്ച് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്യുന്നത്.
പരീക്ഷണത്തിന് മുന്നോടിയായി ലോഞ്ച് കോംപ്ലക്‌സ് 3 (LC3) പരിസരത്തുള്ള ഗ്രാമങ്ങളില്‍ നിന്ന് വലിയ രീതിയിലുള്ള ഒഴിപ്പിക്കലാണ് ജില്ലാ ഭരണകൂടം നടത്തുന്നത്. 3.5 കിലോമീറ്റര്‍ ചുറ്റളവിലുള്ള ഗ്രാമങ്ങളില്‍ നിന്നായി പതിനൊന്നായിരത്തിലധികം ജനങ്ങളെയും അവരുടെ വളര്‍ത്തുമൃഗങ്ങളെയും താല്‍ക്കാലിക സുരക്ഷിത ക്യാമ്പുകളിലേക്ക് മാറ്റിപ്പാര്‍പ്പിച്ചു. സുരക്ഷാ മുന്‍കരുതലുകളുടെ ഭാഗമായി ബാലസോര്‍, ഭദ്രക്, കേന്ദ്രപാര തീരങ്ങളിലെ മത്സ്യത്തൊഴിലാളികള്‍ക്ക് കടലില്‍ പോകുന്നതിന് കര്‍ശന വിലക്കേര്‍പ്പെടുത്തിയിട്ടുണ്ട്.
അടുത്തിടെ നടന്ന പ്രതിരോധ ഉച്ചകോടിയില്‍ ഡിആര്‍ഡിഒ ചെയര്‍മാന്‍ സമീര്‍ വി. കാമത്ത് അഗ്‌നി-6 പദ്ധതിയെക്കുറിച്ച് സുപ്രധാന സൂചനകള്‍ നല്‍കിയിരുന്നു. കേന്ദ്ര സര്‍ക്കാരിന്റെ അനുമതി ലഭിക്കുന്ന മുറയ്‌ക്ക് പരീക്ഷണവുമായി മുന്നോട്ട് പോകാന്‍ രാജ്യം പൂര്‍ണ്ണ സജ്ജമാണെന്നാണ് അദ്ദേഹം വ്യക്തമാക്കിയത്. ഇന്ത്യയുടെ കെ-5, കെ-6 സബ്മറൈന്‍ ലോഞ്ച്ഡ് ബാലിസ്റ്റിക് മിസൈലുകള്‍ക്കായി (SLBM) വികസിപ്പിച്ച അത്യാധുനിക സാങ്കേതികവിദ്യകള്‍ കൂടി സമന്വയിപ്പിച്ചാണ് അഗ്‌നി 6-ന്റെ എഞ്ചിനീയറിംഗ് ജോലികള്‍ പൂര്‍ത്തിയാക്കിയിരിക്കുന്നത്.
നിലവിലുള്ള അഗ്‌നി-5 മിസൈലുകളേക്കാള്‍ വലിപ്പമേറിയതാണെങ്കിലും, ആധുനിക കമ്പോസിറ്റ് മെറ്റീരിയലുകള്‍ ഉപയോഗിച്ചതിനാല്‍ അഗ്‌നി-6ന് ഭാരം കുറവായിരിക്കും. നാല് ഘട്ടങ്ങളുള്ള (Four-stage) ഈ മിസൈലിന്റെ പ്രധാന സവിശേഷതകള്‍ ഇവയാണ്, ഒരേസമയം പത്തിലധികം ആണവ യുദ്ധമുനകള്‍ വ്യത്യസ്ത ലക്ഷ്യസ്ഥാനങ്ങളിലേക്ക് ഒരേ സമയം തൊടുത്തുവിടാന്‍ കഴിയുന്ന ‘MIRV’, ‘MARV’ സാങ്കേതികവിദ്യകള്‍ ഇതിലുണ്ടാകും. റഡാറുകളില്‍ പെടാത്ത പ്രത്യേക കോട്ടിങ് ഉള്ളതിനാല്‍ ചൈനയുടെ HQ 19, അമേരിക്കയുടെ THAAD, റഷ്യയുടെ S-500 തുടങ്ങിയ അത്യാധുനിക മിസൈല്‍ പ്രതിരോധ സംവിധാനങ്ങളുടെ കണ്ണുവെട്ടിക്കാന്‍ ഇതിന് സാധിക്കും.
8,000 മുതല്‍ 12,000 കിലോമീറ്ററിലധികം ദൂരപരിധിയുള്ള ഈ മിസൈല്‍ അന്തര്‍വാഹിനികളില്‍ നിന്നും കരയില്‍ നിന്നും ഒരേപോലെ വിക്ഷേപിക്കാന്‍ കഴിയും. ആണവാക്രമണമുണ്ടായാല്‍ ശത്രുവിന് ചിന്തിക്കാന്‍ പോലുമാകാത്ത വേഗതയില്‍ തിരിച്ചടി നല്‍കുക (Second-strike capability) എന്ന ലക്ഷ്യത്തോടെയാണ് ഇന്ത്യ ഈ ഐസിബിഎം സാങ്കേതികവിദ്യ വികസിപ്പിക്കുന്നത്.
നിലവില്‍ അമേരിക്ക, റഷ്യ, ചൈന, വടക്കന്‍ കൊറിയ എന്നീ നാല് രാജ്യങ്ങള്‍ക്ക് മാത്രമാണ് 12,000 കിലോമീറ്ററിന് മുകളില്‍ ദൂരപരിധിയുള്ള ഭൂഖണ്ഡാന്തര മിസൈല്‍ ശേഷിയുള്ളത് (ഫ്രാന്‍സും ബ്രിട്ടനും അന്തര്‍വാഹിനികളില്‍ നിന്നുള്ള മിസൈലുകള്‍ മാത്രമാണ് ഉപയോഗിക്കുന്നത്). അഗ്‌നി 6 പൂര്‍ണ്ണ സജ്ജമാകുന്നതോടെ അമേരിക്ക ഉള്‍പ്പെടെയുള്ള ലോകത്തെ ഏത് വന്‍ശക്തി രാജ്യവും ഇന്ത്യയുടെ മിസൈല്‍ പരിധിക്കുള്ളിലാകും. പ്രതിരോധ രംഗത്തെ വന്‍ശക്തികളുടെ കുത്തക തകര്‍ക്കുന്ന ഈ പരീക്ഷണത്തിന്റെ ഔദ്യോഗിക പ്രഖ്യാപനത്തിനായാണ് രാജ്യം ഇപ്പോള്‍ കാത്തിരിക്കുന്നത്. പരീക്ഷണം നടക്കുന്നതോടെ മിസൈലിന്റെ കൂടുതല്‍ സാങ്കേതിക വിവരങ്ങള്‍ പുറത്തുവരുമെന്നാണ് പ്രതീക്ഷിക്കുന്നത്.
