പെരുമ്പാവൂർ: ദേശീയ വായനാദിനത്തോടനുബന്ധിച്ച് പെരുമ്പാവൂർ പ്രഗതി അക്കാദമിയിൽ ജൂൺ 18 മുതൽ ജൂലൈ 18 വരെ നീണ്ടുനിൽക്കുന്ന വായനമാസാചരണത്തിന് തുടക്കമായി. വിദ്യാർഥികളിൽ വായനാശീലം വളർത്തുകയും മലയാള സാഹിത്യത്തിന്റെ പാരമ്പര്യവും വിജ്ഞാനസംസ്കാരവും പരിചയപ്പെടുത്തുകയും ചെയ്യുക എന്ന ലക്ഷ്യത്തോടെയാണ് വിവിധ പരിപാടികൾ സംഘടിപ്പിച്ചത്.
“താളിയോലകളിൽ നിന്ന് ആധുനിക പുസ്തകങ്ങളിലേക്ക് – അറിവിന്റെ യാത്ര ഒരിക്കലും അവസാനിക്കുന്നില്ല” എന്ന സന്ദേശം ഉയർത്തിപ്പിടിച്ച് സംഘടിപ്പിച്ച Pragati Speaks on National Reading Day പരിപാടി ശ്രദ്ധേയമായി. ലൈബ്രറി ഹാളിൽ നടന്ന ചടങ്ങിൽ വിദ്യാർഥികൾ “ഓരോ ദിവസവും വായനാദിനമായി തീരട്ടെ; വായനയുടെ ശക്തി മനസ്സിലാക്കി അത് എന്റെ ജീവിതവ്രതമാക്കി സ്വീകരിക്കുന്നു” എന്ന പ്രതിജ്ഞയെടുത്തു.
മാനേജിങ് ഡയറക്ടർ ഡോ. ഇന്ദിരാ രാജൻ, “ദിവസവും വായനയ്ക്കായി ഒരുമണിക്കൂർ മാറ്റിവയ്ക്കൂ; അത് നിങ്ങളെ അറിവിന്റെ കേന്ദ്രമാക്കി മാറ്റും” എന്ന മുൻ രാഷ്ട്രപതി ഡോ. എ.പി.ജെ. അബ്ദുൾ കലാമിന്റെ വാക്കുകൾ പങ്കുവെച്ചുകൊണ്ട് വായനയുടെ പ്രാധാന്യം വിശദീകരിച്ചു. താളിയോല ഗ്രന്ഥങ്ങളുടെ ചരിത്രം, നിർമ്മാണരീതി, സംരക്ഷണ മാർഗങ്ങൾ, മലയാള സാഹിത്യത്തിന്റെ വളർച്ചയിൽ അവ വഹിച്ച പങ്ക് എന്നിവ വിദ്യാർഥികൾക്ക് പരിചയപ്പെടുത്തുകയും താളിയോലകളുടെ മാതൃകകൾ പ്രദർശിപ്പിക്കുകയും ചെയ്തു.
പരിപാടിയുടെ ഭാഗമായി വിദ്യാർഥികൾ തയ്യാറാക്കിയ കൈയെഴുത്ത് മാസിക പ്രകാശനം ചെയ്തു. വായനമാസാചരണത്തിന്റെ ഭാഗമായി പുസ്തകപരിചയം, കഥപറച്ചിൽ, വായനാക്കുറിപ്പ് തയ്യാറാക്കൽ, പോസ്റ്റർ നിർമാണം, ക്വിസ് മത്സരം, പുസ്തകമേള, പുസ്തകപ്രദർശനം എന്നിവയും സംഘടിപ്പിക്കുമെന്ന് പ്രിൻസിപ്പൽ സുചിത്ര ഷൈജിത് അറിയിച്ചു. വായനയിലൂടെ അറിവും മൂല്യബോധവും വളർത്തിയെടുക്കാനും പാരമ്പര്യത്തെയും നവീന വായനാസംസ്കാരത്തെയും കൂട്ടിയിണക്കാനുമുള്ള ശ്രമങ്ങളുടെ ഭാഗമായാണ് പരിപാടികൾ ഒരുക്കിയിരിക്കുന്നതെന്ന് അക്കാദമി അധികൃതർ വ്യക്തമാക്കി.
