കൊല്ലം: മുൻ ഗതാഗത മന്ത്രി കെ.ബി. ഗണേഷ് കുമാറിനെ എൻഎസ്എസ് ഡയറക്ടർ ബോർഡിൽ നിന്ന് ഒഴിവാക്കിയതിനെ തുടർന്ന് പത്തനാപുരം താലൂക്ക് എൻഎസ്എസ് യൂണിയൻ ഭാരവാഹികൾ ആഹ്ലാദ പ്രകടനം നടത്തി. യൂണിയൻ ഓഫിസിൽ മധുരപലഹാരങ്ങൾ വിതരണം ചെയ്ത് തീരുമാനം ആഘോഷിച്ചു.
പത്തനാപുരം താലൂക്ക് യൂണിയൻ പ്രസിഡന്റ് കരിക്കത്തിൽ തങ്കപ്പൻ പിള്ളയുടെ നേതൃത്വത്തിലാണ് ആഘോഷ പരിപാടി നടന്നത്. ഗണേഷ് കുമാർ സമുദായത്തിനായി കാര്യമായ സംഭാവനകൾ ചെയ്തിട്ടില്ലെന്നും, അംഗങ്ങളിൽ നിന്ന് പണം പിരിച്ചുവെന്നതടക്കം ആരോപണങ്ങൾ ഉണ്ടെന്നും അദ്ദേഹം പ്രതികരിച്ചു.
അതേസമയം, എൻഎസ്എസ് ഡയറക്ടർ ബോർഡിലെ തീരുമാനം സംഘടനാ ചട്ടപ്രകാരമാണെന്ന് ജനറൽ സെക്രട്ടറി ജി. സുകുമാരൻ നായർ വ്യക്തമാക്കി. ബോർഡിലെ അംഗങ്ങളുടെ കാലാവധി പൂർത്തിയായതിനാലാണ് പുനഃസംഘടന നടന്നതെന്നും, നിയമവിരുദ്ധമായി ഒന്നും നടന്നിട്ടില്ലെന്നും അദ്ദേഹം പറഞ്ഞു.
“ചട്ടവിരുദ്ധമായ എന്തെങ്കിലും നടന്നിട്ടുണ്ടെങ്കിൽ ഗണേഷ് കുമാർ കോടതിയെ സമീപിക്കട്ടെ,” എന്നും സുകുമാരൻ നായർ പ്രതികരിച്ചു.
സംഘടനയിൽ ജനാധിപത്യവിരുദ്ധ നടപടികൾ നടക്കുന്നതായി ഗണേഷ് കുമാർ ആരോപിച്ചിരുന്നുവെങ്കിലും, നിലവിലെ പുനഃസംഘടന നിയമാനുസൃതമാണെന്നാണ് എൻഎസ്എസ് നേതൃത്വം വ്യക്തമാക്കുന്നത്.
ഒമ്പത് ഡയറക്ടർ ബോർഡ് അംഗങ്ങളുടെ കാലാവധി കഴിഞ്ഞതിനെ തുടർന്നാണ് പുനഃസംഘടന നടന്നത്. ഇതിൽ എട്ട് അംഗങ്ങൾക്ക് അംഗത്വം പുതുക്കി നൽകിയപ്പോൾ ഗണേഷ് കുമാറിനെ ഒഴിവാക്കി. പകരം കുന്നത്തൂർ എൻഎസ്എസ് താലൂക്ക് യൂണിയൻ പ്രസിഡന്റ് വി.ആർ.കെ. ബാബുവിനെ ബോർഡിൽ ഉൾപ്പെടുത്തി.
