കോട്ടയം: കോട്ടയം എരുമേലിയില് പാറമടയിലെ വെള്ളക്കെട്ടില് കുളിക്കാനിറങ്ങിയ രണ്ട് വിദ്യാര്ത്ഥികള് മുങ്ങിമരിച്ചു. ഞായറാഴ്ച വൈകുന്നേരമാണ് ദാരുണ സംഭവം നടന്നത്. എരുമേലി കൊടിത്തോട്ടം പാറമടയിലെ വെള്ളക്കെട്ടിലാണ് അപകടമുണ്ടായത്.
കൊടിത്തോട്ടം സ്വദേശികളായ ആഷ്ലിന് (18), ആഷര് (16) എന്നിവരാണ് മരിച്ചത്. അഞ്ച് പേരടങ്ങുന്ന സംഘമാണ് പാറമടയിലെ വെള്ളക്കെട്ടില് കുളിക്കാനിറങ്ങിയത്. ഇതിനിടെ ആഴമുള്ള ഭാഗത്തേക്ക് നീങ്ങിയ ആഷ്ലിനും ആഷറും വെള്ളത്തില് മുങ്ങിപ്പോവുകയായിരുന്നു.
സുഹൃത്തുക്കളും നാട്ടുകാരും ചേര്ന്ന് ഇരുവരെയും ഉടന് വെള്ളത്തില് നിന്ന് പുറത്തെടുത്ത് കാഞ്ഞിരപ്പള്ളി ജനറല് ആശുപത്രിയിലെത്തിച്ചെങ്കിലും ജീവന് രക്ഷിക്കാനായില്ല.
പാറമടകളിലെ സുരക്ഷിതമല്ലാത്ത വെള്ളക്കെട്ടുകളില് കുളിക്കരുതെന്ന മുന്നറിയിപ്പുകള് നിലനില്ക്കുന്നതിനിടെയാണ് വീണ്ടും രണ്ട് യുവജീവനുകള് ദുരന്തത്തിന് ഇരയായത്. സംഭവത്തില് പൊലീസ് തുടര്നടപടികള് ആരംഭിച്ചിട്ടുണ്ട്.
