തിരുവനന്തപുരം: പൊലീസ് ഉദ്യോഗസ്ഥർ ഔദ്യോഗിക യൂണിഫോമിൽ മതപരമായ ചടങ്ങുകളിലും ആഘോഷങ്ങളിലും പങ്കെടുക്കരുത് എന്ന് സംസ്ഥാനത്തെ പൊലീസിന് കർശന നിർദേശം.
ഈ നിർദേശം ഉൾപ്പെടുത്തി ഡിജിപിയുടെ പുതിയ സർകുലർ ഇറങ്ങി, . ഉദ്യോഗസ്ഥർക്കെതിരെ ലഭിച്ച നിരവധി പരാതികളുടെ അടിസ്ഥാനത്തിലാണ് നടപടി.
പൊലീസ് ഉദ്യോഗസ്ഥർ ഔദ്യോഗിക വേഷത്തിൽ വിവിധ മതപരിപാടികളിൽ പങ്കെടുക്കുകയും, അതിന്റെ ദൃശ്യങ്ങൾ റീൽസായി ചിത്രീകരിച്ച് സമൂഹമാധ്യമങ്ങളിൽ പങ്കുവെക്കുകയും ചെയ്ത സംഭവങ്ങൾ ശ്രദ്ധയിൽപ്പെട്ടിരുന്നു. ഇതോടെയാണ് ഡിജിപി കർശന നിർദേശവുമായി രംഗത്തെത്തിയത്.
ഔദ്യോഗികമായി ക്രമസമാധാന ചുമതല നിർവഹിക്കുന്ന സാഹചര്യങ്ങൾ ഒഴികെ, യൂണിഫോം ധരിച്ച് മതചടങ്ങുകളിലോ ആഘോഷങ്ങളിലോ പങ്കെടുക്കാൻ പാടില്ലെന്ന് സർകുലറിൽ വ്യക്തമാക്കുന്നു.
സിവിൽ പൊലീസ് ഉദ്യോഗസ്ഥർ മുതൽ ഉന്നത ഉദ്യോഗസ്ഥർ വരെയുള്ള എല്ലാവർക്കും നിർദേശം ബാധകമാണ്. പൊലീസ് സേനയുടെ നിഷ്പക്ഷത നിലനിർത്തുന്നതിനാണ് ഈ നടപടിയെന്ന് പറയപ്പെടുന്നു.
