മെക്സിക്കോ സിറ്റി: ലോകകപ്പില് ചരിത്രനേട്ടവുമായി ആതിഥേയരായ മെക്സിക്കോ പ്രീക്വാര്ട്ടറിലേക്ക്. കനത്ത മഴയും ഇടിമിന്നലും കാരണം ഒരു മണിക്കൂര് വൈകി ആരംഭിച്ച മത്സരത്തില് ഇക്വഡോറിനെ എതിരില്ലാത്ത രണ്ട് ഗോളിന് കീഴടക്കിയാണ് മെക്സിക്കോ അവസാന എട്ടിലേക്കുള്ള ടിക്കറ്റ് ഉറപ്പിച്ചത്.
22-ാം മിനിറ്റില് ജൂലിയന് ക്വിനോനെസാണ് ആതിഥേയര്ക്ക് ലീഡ് സമ്മാനിച്ചത്. റോബര്ട്ടോ അല്വാരഡോയുടെ മനോഹരമായ ത്രൂ പാസ് സ്വീകരിച്ച ക്വിനോനെസ് ഇടതുവശത്ത് നിന്ന് തൊടുത്ത ഷോട്ട് ഇക്വഡോര് ഗോള്കീപ്പറെ കീഴടക്കി വലയിലെത്തി. ഒന്പത് മിനിറ്റുകള്ക്കുശേഷം ക്വിനോനെസിന്റെ അസിസ്റ്റില് റൗള് ജിമെനെസ് ഗോള് നേടിയതോടെ മെക്സിക്കോയുടെ ലീഡ് ഇരട്ടിയായി.
മത്സരത്തിലുടനീളം പന്തടക്കത്തിലും അവസരങ്ങള് സൃഷ്ടിക്കുന്നതിലും മെക്സിക്കോ വ്യക്തമായ ആധിപത്യം പുലര്ത്തി. പ്രത്യാക്രമണങ്ങളിലൂടെ ഇക്വഡോര് ഭീഷണി ഉയര്ത്തിയെങ്കിലും മെക്സിക്കന് പ്രതിരോധവും ഗോള്കീപ്പര് റൗള് റെഗലേയും ഉറച്ചുനിന്നു. മത്സരത്തില് മെക്സിക്കോ പ്രതിരോധനിര 54 ക്ലിയറന്സുകള് നടത്തിയതും ശ്രദ്ധേയമായി.
മത്സരത്തിന്റെ അവസാനഘട്ടത്തില് ഇക്വഡോര് താരം പിയറോ ഹിന്കാപിയെ വാര് പരിശോധനയ്ക്ക് പിന്നാലെ ചുവപ്പ് കാര്ഡ് കണ്ട് പുറത്തായി. ഇതോടെ ഇക്വഡോറിന്റെ തിരിച്ചുവരവ് പ്രതീക്ഷകള്ക്കും അവസാനമായി. 1986-ന് ശേഷം ആദ്യമായാണ് മെക്സിക്കോ ലോകകപ്പിലെ ഒരു നോക്കൗട്ട് മത്സരം വിജയിക്കുന്നത്. അന്നും ആതിഥേയരായിരുന്ന മെക്സിക്കോ, 40 വര്ഷത്തെ കാത്തിരിപ്പിനാണ് ഇപ്പോള് വിരാമമിട്ടത്.
ഗ്രൂപ്പ് ഘട്ടവും പ്രീക്വാര്ട്ടറും ഉള്പ്പെടെ ഇതുവരെ ഒരു ഗോള് പോലും വഴങ്ങാതെയാണ് മെക്സിക്കോയുടെ മുന്നേറ്റം. ആസ്റ്റക്ക സ്റ്റേഡിയത്തില് കളിച്ച അവസാന 10 ലോകകപ്പ് മത്സരങ്ങളിലും തോല്വി അറിയാത്ത റെക്കോഡും അവര് നിലനിര്ത്തി. അതേസമയം, മെക്സിക്കോയുടെ 17-കാരന് ഗില്ബെര്ട്ടോ മോറ മറ്റൊരു ചരിത്രനേട്ടവും സ്വന്തമാക്കി. ലോകകപ്പ് നോക്കൗട്ട് മത്സരത്തില് ആദ്യ ഇലവനില് ഇറങ്ങുന്ന ഏറ്റവും പ്രായം കുറഞ്ഞ രണ്ടാമത്തെ താരമായാണ് മോറയുടെ പേര് ചരിത്രപുസ്തകത്തില് ഇടംപിടിച്ചത്. പ്രീക്വാര്ട്ടറില് ഇംഗ്ലണ്ട്-ഡിആര് കോംഗോ മത്സരത്തിലെ വിജയികളെയാണ് മെക്സിക്കോ നേരിടുക.
