തിരുവനന്തപുരം: വർക്കലയിൽ നിന്ന് കാണാതായിരുന്ന രണ്ട് വിദ്യാർഥികളെ കണ്ടെത്തി. ഇന്ന് പുലർച്ചെ കല്ലമ്പലത്തിന് സമീപം ഞെക്കാട്ടുവെച്ചാണ് ഇരുവരെയും സുരക്ഷിതരായി കണ്ടെത്തിയത്. അഞ്ച് ദിവസമായി തുടരുന്ന അന്വേഷണത്തിനൊടുവിലാണ് വിദ്യാർഥികളെ കണ്ടെത്താൻ പൊലീസിന് കഴിഞ്ഞത്.
കഴിഞ്ഞ ജൂൺ 30-നാണ് വിദ്യാർഥികൾ വീട്ടിൽ നിന്ന് സ്കൂളിലേക്ക് പോയത്. എന്നാൽ കുട്ടികൾ സ്കൂളിൽ എത്തിയിരിന്നില്ല. തുടർന്ന് കുടുംബം വർക്കല പൊലീസിൽ പരാതി നൽകുകയായിരുന്നു.
പരാതിയുടെ അടിസ്ഥാനത്തിൽ പൊലീസ് കേസെടുത്ത് അന്വേഷണം ആരംഭിച്ചു. സി.സി.ടി.വി ദൃശ്യങ്ങൾ, മൊബൈൽ ഫോൺ വിവരങ്ങൾ, സുഹൃത്തുക്കളിൽ നിന്ന് ലഭിച്ച വിവരങ്ങൾ എന്നിവ കേന്ദ്രീകരിച്ചായിരുന്നു അന്വേഷണം. കുട്ടികളെ കണ്ടെത്തുന്നതിനായി പ്രത്യേക അന്വേഷണസംഘവും രൂപീകരിച്ചിരുന്നു.
വിദ്യാർഥികൾ എങ്ങനെ കല്ലമ്പലത്ത് എത്തി, ഈ ദിവസങ്ങളിൽ എവിടെയായിരുന്നു, ആരുടെയെങ്കിലും സഹായം ലഭിച്ചിരുന്നോ തുടങ്ങിയ കാര്യങ്ങളിൽ പൊലീസ് വിശദമായ അന്വേഷണം ആരംഭിച്ചിട്ടുണ്ട്. കുട്ടികളുടെ മൊഴി രേഖപ്പെടുത്തിയ ശേഷമേ കാണാതാകലിന് പിന്നിലെ സാഹചര്യങ്ങളെക്കുറിച്ച് വ്യക്തത ലഭിക്കുകയുള്ളൂവെന്ന് അന്വേഷണ ഉദ്യോഗസ്ഥർ അറിയിച്ചു. സംഭവത്തിന്റെ എല്ലാ വശങ്ങളും പരിശോധിച്ച ശേഷമേ കൂടുതൽ വിവരങ്ങൾ പുറത്തുവിടാനാകൂവെന്നും പൊലീസ് അറിയിച്ചു.
