ദുബായ്: ലോകത്തെ ഏറ്റവും നിര്ണായകമായ സമുദ്ര വ്യാപാരപാതകളിലൊന്നായ ഹോര്മുസ് കടലിടുക്കില് വാണിജ്യ എണ്ണടാങ്കറിന് നേരെ റോക്കറ്റ് ആക്രമണമുണ്ടായതോടെ മിഡില് ഈസ്റ്റില് വീണ്ടും സംഘര്ഷഭീതി ഉയരുന്നു. ഒമാന് തീരത്തിന് സമീപം പുലര്ച്ചെയുണ്ടായ ആക്രമണത്തില് ടാങ്കറിന് തീപിടിച്ചെങ്കിലും ആളപായമോ പരിസ്ഥിതി നാശമോ റിപ്പോര്ട്ട് ചെയ്തിട്ടില്ല. സംഭവത്തെ തുടര്ന്ന് മേഖലയിലെ സമുദ്രസുരക്ഷയെക്കുറിച്ചുള്ള ആശങ്ക വീണ്ടും ശക്തമായിരിക്കുകയാണ്.
ബ്രിട്ടീഷ് സൈന്യത്തിന് കീഴിലുള്ള യുണൈറ്റഡ് കിംഗ്ഡം മാരിടൈം ട്രേഡ് ഓപ്പറേഷന്സ് സംഭവത്തെ സ്ഥിരീകരിച്ചു. പേര്ഷ്യന് ഗള്ഫിനെയും ഒമാന് ഉള്ക്കടലിനെയും ബന്ധിപ്പിക്കുന്ന ഹോര്മുസ് കടലിടുക്കിലൂടെ സഞ്ചരിക്കുകയായിരുന്ന ടാങ്കറാണ് ആക്രമണത്തിനിരയായത്. യുകെഎംടിഒയുടെ വിവരമനുസരിച്ച്, ഹോര്മുസ് കടലിടുക്കില് നിന്ന് തെക്കോട്ട് ഒമാന് ഉള്ക്കടലിലേക്ക് സഞ്ചരിക്കവെ ഒമാനിലെ ലിമയ്ക്ക് സമീപമാണ് റോക്കറ്റ് ടാങ്കറില് പതിച്ചത്. ഇതേ തുടര്ന്ന് കപ്പലില് തീപിടിക്കുകയായിരുന്നു. എന്നാല് സംഭവത്തെ തുടര്ന്ന് പരിസ്ഥിതിക്ക് ദോഷമൊന്നും സംഭവിച്ചിട്ടില്ലെന്ന് അധികൃതര് അറിയിച്ചു. ആക്രമണത്തിന്റെ സാഹചര്യങ്ങളും ഉറവിടവും കണ്ടെത്തുന്നതിനായി അന്വേഷണം ആരംഭിച്ചിട്ടുണ്ട്.
ആക്രമണത്തിന്റെ ഉത്തരവാദിത്വം ഇതുവരെ ഒരു സംഘടനയും ഏറ്റെടുത്തിട്ടില്ല. എങ്കിലും, സമീപ ദിവസങ്ങളില് ഇതേ മേഖലയില് സഞ്ചരിച്ചിരുന്ന മറ്റ് വാണിജ്യ കപ്പലുകള്ക്ക് നേരെയും സമാനമായ ആക്രമണങ്ങള് ഉണ്ടായിരുന്നുവെന്നും, അതിന് പിന്നില് ഇറാനാകാമെന്ന സംശയമാണ് സുരക്ഷാ ഏജന്സികള് ഉയര്ത്തുന്നത്. ഇതിനിടെ, ഹോര്മുസ് കടലിടുക്കിലൂടെ കടന്നുപോകുന്ന എണ്ണടാങ്കറുകള് ഇറാന് അംഗീകരിച്ച സമുദ്രമാര്ഗങ്ങള് മാത്രം ഉപയോഗിക്കണമെന്നും അല്ലെങ്കില് ‘ശക്തമായ തിരിച്ചടി’ നേരിടേണ്ടിവരുമെന്നും ഇറാന്റെ സംയുക്ത സൈനിക കമാന്ഡ് കഴിഞ്ഞ ജൂലൈ 2-ന് മുന്നറിയിപ്പ് നല്കിയിരുന്നു.
ഖതം അല്-അന്ബിയ സൈനിക കമാന്ഡ് പുറത്തിറക്കിയ ഈ മുന്നറിയിപ്പ് ലോകത്തിലെ ഏറ്റവും തിരക്കേറിയ എണ്ണഗതാഗത പാതകളിലൊന്നിലെ സുരക്ഷാ ആശങ്കകള് വര്ധിപ്പിച്ചിരുന്നു. അതേസമയം, ഇറാനും അമേരിക്കയും തമ്മിലുള്ള സംഘര്ഷം കുറയ്ക്കാനുള്ള നയതന്ത്ര ശ്രമങ്ങള് ഖത്തറിന്റെ മധ്യസ്ഥതയില് തുടരുന്നതിനിടെയാണ് പുതിയ ആക്രമണം നടന്നിരിക്കുന്നത്. ഇരു രാജ്യങ്ങളുടെയും പ്രതിനിധികള് അടുത്തിടെ ഖത്തറില് ചര്ച്ച നടത്തിയിരുന്നു. അതിന് പിന്നാലെ ഇറാന് മുന്നറിയിപ്പ് ശക്തമാക്കിയതിന്റെ കാരണം എന്താണെന്നത് ഇതുവരെ വ്യക്തമല്ല.
ലോകത്തിന്റെ എണ്ണവിതരണത്തില് നിര്ണായക പങ്കുവഹിക്കുന്ന ഹോര്മുസ് കടലിടുക്ക് വീണ്ടും സംഘര്ഷത്തിന്റെ കേന്ദ്രമാകുന്ന സാഹചര്യത്തില്, ഈ ആക്രമണം അന്താരാഷ്ട്ര തലത്തില് വലിയ ആശങ്കയ്ക്കാണ് ഇടയാക്കുന്നത്. സംഭവത്തിന് പിന്നില് ആരാണെന്നതും ആക്രമണത്തിന്റെ യഥാര്ഥ ലക്ഷ്യവും കണ്ടെത്താനുള്ള അന്വേഷണം പുരോഗമിക്കുകയാണ്.
