ചെന്നൈ: തമിഴ്നാട് മുഖ്യമന്ത്രി ജോസഫ് വിജയ് പെരമ്പൂർ, തിരുച്ചിറപ്പള്ളി (കിഴക്ക്) നിയമസഭാ മണ്ഡലങ്ങളിൽ നിന്ന് നേടിയ തിരഞ്ഞെടുപ്പ് വിജയം ചോദ്യം ചെയ്ത് സമർപ്പിച്ച തിരഞ്ഞെടുപ്പ് ഹർജികൾ മദ്രാസ് ഹൈക്കോടതി ഫയലിൽ സ്വീകരിച്ചു. തമിഴ്നാട് കായിക മന്ത്രി ആധവ് അർജുന് വില്ലിവാക്കം മണ്ഡലത്തിൽ നിന്ന് നേടിയ വിജയത്തിനെതിരായ ഹർജികളും കോടതി പരിഗണനയ്ക്കെടുത്തു.
ജസ്റ്റിസ് വി. ലക്ഷ്മിനാരായണൻ അധ്യക്ഷനായ ബെഞ്ചാണ് ഹർജികൾ പരിഗണിച്ചത്. ഹർജികളിൽ ചില നടപടിക്രമപരമായ അപാകതകൾ കണ്ടെത്തിയ കോടതി, ഫോം-25 ഉൾപ്പെടെയുള്ള നിർബന്ധ നടപടിക്രമങ്ങൾ ഒരാഴ്ചയ്ക്കകം പൂർത്തിയാക്കാൻ ഹർജിക്കാരോട് നിർദേശിച്ചു. തുടർന്ന് മൂന്ന് ആഴ്ചയ്ക്കകം മറുപടി നൽകാവുന്ന നോട്ടീസ് നൽകാൻ രജിസ്ട്രിയോടും കോടതി നിർദേശിച്ചു.
തിരഞ്ഞെടുപ്പ് ഹർജികൾ കഴിയുന്നത്ര വേഗത്തിൽ, ആറുമാസത്തിനുള്ളിൽ തീർപ്പാക്കേണ്ടതുണ്ടെന്ന് കോടതി നിരീക്ഷിച്ചു. കോടതി വഴിയുള്ള നോട്ടീസിന് പുറമെ സ്വകാര്യ നോട്ടീസ് നൽകുന്നതിനും ഹർജിക്കാർക്ക് അനുമതി നൽകി.
വിജയിനെതിരെ നാല് ഹർജികൾ
മുഖ്യമന്ത്രി വിജയിനെതിരെ ആകെ നാല് തിരഞ്ഞെടുപ്പ് ഹർജികളാണ് സമർപ്പിച്ചിരിക്കുന്നത്. ഇതിൽ മൂന്ന് ഹർജികൾ പെരമ്പൂർ മണ്ഡലത്തിലെ വിജയത്തെയും ഒരു ഹർജി തിരുച്ചിറപ്പള്ളി (കിഴക്ക്) മണ്ഡലത്തിലെ വിജയത്തെയും ചോദ്യം ചെയ്യുന്നതാണ്.
മന്ത്രി ആധവ് അർജുന്റെ വില്ലിവാക്കം മണ്ഡലത്തിലെ വിജയത്തിനെതിരെ രണ്ട് തിരഞ്ഞെടുപ്പ് ഹർജികളും ഹൈക്കോടതിയുടെ പരിഗണനയിലാണ്.
ഹർജിയിലെ പ്രധാന ആരോപണങ്ങൾ
തിരുച്ചിറപ്പള്ളി (കിഴക്ക്) മണ്ഡലത്തിലെ ഡിഎംകെ സ്ഥാനാർഥിയായിരുന്ന ഇനിഗോ ഇരുദയരാജ് സമർപ്പിച്ച ഹർജിയിൽ, വിജയ് തന്റെ നാമനിർദേശ പത്രികയിൽ തനിക്കെതിരായ കേസുകളുടെ വിവരങ്ങൾ മറച്ചുവച്ചതായും തിരഞ്ഞെടുപ്പ് ചെലവുകളുടെ കൃത്യമായ കണക്ക് നൽകിയിട്ടില്ലെന്നും ആരോപിക്കുന്നു.
കൂടാതെ, തിരഞ്ഞെടുപ്പ് പ്രചാരണത്തിൽ കുട്ടികളെ പങ്കെടുപ്പിച്ചതിലൂടെ തിരഞ്ഞെടുപ്പ് ചട്ടലംഘനം നടന്നുവെന്നും ഹർജിയിൽ ആരോപണമുണ്ട്. വിജയിയുടെ തിരഞ്ഞെടുപ്പ് അസാധുവായി പ്രഖ്യാപിക്കണമെന്നും, ഹർജിക്കാരനെ വിജയിയായി പ്രഖ്യാപിക്കണമെന്നുമാണ് ആവശ്യപ്പെട്ടിരിക്കുന്നത്. ഹർജി നിലനിൽക്കുന്നതിനാൽ ട്രിച്ചി ഈസ്റ്റ് മണ്ഡലത്തിൽ ഉപതിരഞ്ഞെടുപ്പ് നടത്തരുതെന്നും ഹർജിയിൽ ആവശ്യപ്പെട്ടിട്ടുണ്ട്.
പശ്ചാത്തലം
2026 ഏപ്രിൽ 23-ന് നടന്ന തമിഴ്നാട് നിയമസഭാ തിരഞ്ഞെടുപ്പിൽ തമിഴഗ വെട്രി കഴകം (ടിവികെ) ഏറ്റവും വലിയ ഒറ്റക്കക്ഷിയായി ഉയർന്നെങ്കിലും വ്യക്തമായ ഭൂരിപക്ഷം ലഭിച്ചിരുന്നില്ല. തുടർന്ന് കോൺഗ്രസ്, വിസികെ, ഐയുഎംഎൽ, സിപിഎം, സിപിഐ തുടങ്ങിയ കക്ഷികളുടെ പിന്തുണയോടെ ടിവികെ സർക്കാർ രൂപീകരിക്കുകയായിരുന്നു.
മുഖ്യമന്ത്രി ജോസഫ് വിജയ് പെരമ്പൂർ, ട്രിച്ചി ഈസ്റ്റ് എന്നീ രണ്ട് മണ്ഡലങ്ങളിൽ മത്സരിച്ച് രണ്ടിടത്തും വിജയിച്ചിരുന്നു. പിന്നീട് ട്രിച്ചി ഈസ്റ്റ് മണ്ഡലം ഒഴിഞ്ഞതിനെ തുടർന്ന് അവിടെ ഉപതിരഞ്ഞെടുപ്പ് ആവശ്യമായി വന്നിരുന്നു.
