തിരുവനന്തപുരം: സംസ്ഥാനത്തെ രൂക്ഷമായ വൈദ്യുതി പ്രതിസന്ധിക്ക് താല്ക്കാലിക ആശ്വാസമായി 200 മെഗാവാട്ട് വൈദ്യുതി വാങ്ങാന് കേരള സംസ്ഥാന വൈദ്യുതി ബോര്ഡിന് (കെഎസ്ഇബി) വൈദ്യുതി റഗുലേറ്ററി കമ്മിഷന് അനുമതി നല്കി. ഞായറാഴ്ച മുതല് ഒരു വര്ഷത്തേക്കാണ് കരാര്. യൂണിറ്റിന് 5.96 രൂപ നിരക്കില് രാത്രികാല ആവശ്യത്തിനായാണ് വൈദ്യുതി വാങ്ങുക.
വൈദ്യുതി ക്ഷാമം ദീര്ഘകാലാടിസ്ഥാനത്തില് പരിഹരിക്കാന് സംസ്ഥാനത്ത് പുതിയ വൈദ്യുത പദ്ധതികളുടെ സാധ്യതകള് വിശദമായി പഠിക്കുമെന്ന് കെഎസ്ഇബി ചെയര്മാന് ഡോ. എം.ജി. രാജമാണിക്യം അറിയിച്ചു. ചീമേനി താപവൈദ്യുത നിലയവും അതിരപ്പിള്ളി ജലവൈദ്യുത പദ്ധതിയും പഠനപരിധിയില് ഉള്പ്പെടുമെന്നും, എന്നാല് തുടര്നടപടികള് സര്ക്കാര് നയത്തിന്റെ അടിസ്ഥാനത്തിലായിരിക്കുമെന്നും അദ്ദേഹം വ്യക്തമാക്കി.
ഉപഭോക്താക്കള്ക്ക് അധിക സാമ്പത്തികഭാരം ഉണ്ടാക്കാതിരിക്കാനാണ് ബോര്ഡിന്റെ ശ്രമമെന്നും, കൂടിയ വിലയ്ക്ക് വൈദ്യുതി വാങ്ങേണ്ടിവന്നാലും നിലവില് വൈദ്യുതി നിരക്ക് വര്ധിപ്പിക്കില്ലെന്നും ചെയര്മാന് പറഞ്ഞു. അതേസമയം, സംസ്ഥാനത്തെ വൈദ്യുതി ക്ഷാമത്തിന് മഴ ശക്തിപ്പെടുകയും അണക്കെട്ടുകളില് ജലനിരപ്പ് ഉയരുകയും ചെയ്യേണ്ട സാഹചര്യമാണുള്ളത്. എല്നിനോ പ്രതിഭാസവും ആശങ്ക ഉയര്ത്തുന്ന ഘടകമായി തുടരുകയാണ്. നിലവിലെ പ്രതിസന്ധി പരിഹരിക്കാന് സര്ക്കാര് തലത്തില് ദീര്ഘകാല പദ്ധതികള് സംബന്ധിച്ച വ്യക്തമായ ചര്ച്ചകള് നടക്കുന്നില്ലെന്ന വിമര്ശനവും ശക്തമാകുന്നുണ്ട്.
