തൃശ്ശൂർ/കോഴിക്കോട്: കുറ്റിപ്പുറത്ത് നടന്ന ബസ് അപകടത്തെ സർക്കാർ അതീവ ഗൗരവത്തോടെയാണ് കാണുന്നതെന്ന് ഗതാഗത മന്ത്രി സി.പി. ജോൺ പറഞ്ഞു. തൃശ്ശൂരിൽ മാധ്യമങ്ങളോട് സംസാരിക്കുകയായിരുന്നു മന്ത്രി. അപകടത്തിന്റെ കാരണങ്ങൾ കണ്ടെത്തുന്നതിനായി പോസ്റ്റ് ക്രാഷ് എൻക്വയറി പുരോഗമിക്കുകയാണെന്നും ഇത്തരത്തിലുള്ള അപകടങ്ങൾ ഇനി ആവർത്തിക്കാതിരിക്കാൻ ശക്തമായ നടപടികൾ സ്വീകരിക്കുമെന്നും അദ്ദേഹം വ്യക്തമാക്കി.
മഴക്കാലത്ത് സംസ്ഥാനത്തുടനീളം കർശന വേഗനിയന്ത്രണം നടപ്പാക്കുമെന്നും നിയമലംഘനം നടത്തുന്ന വാഹനങ്ങൾക്കെതിരെ ശക്തമായ നടപടി സ്വീകരിക്കുമെന്നും മന്ത്രി പറഞ്ഞു.
അതേസമയം, അപകടത്തിൽ മരിച്ച കോഴിക്കോട് പെരുവയൽ ചെറുകുളത്തൂർ പാറയിലെ മാവന്നൂർ പടിക്കൽ വൈഷ്ണവിന്റെ മൃതദേഹം സംസ്കരിച്ചു. പുതുതായി നിർമ്മിച്ച വീടിന് സമീപം പ്രത്യേകം തയ്യാറാക്കിയ സ്ഥലത്തായിരുന്നു സംസ്കാര ചടങ്ങുകൾ. രാവിലെ പത്ത് മണിയോടെയാണ് ചടങ്ങുകൾ ആരംഭിച്ചത്.
അന്ത്യാഞ്ജലി അർപ്പിക്കാൻ സമൂഹത്തിന്റെ വിവിധ മേഖലകളിൽ നിന്നായി നൂറുകണക്കിന് ആളുകൾ എത്തി. വൈഷ്ണവിന്റെ സഹോദരൻ വൈശാഖും മറ്റ് അടുത്ത ബന്ധുക്കളും ചേർന്നാണ് ചിതയ്ക്ക് തീകൊളുത്തിയത്. അപകടസമയത്ത് വൈഷ്ണവിനൊപ്പം ബസിലുണ്ടായിരുന്ന തിരുവിതാംകൂർ ദേവസ്വം ബോർഡ് ജീവനക്കാരനായ സഹോദരൻ വൈശാഖിനും നിസ്സാര പരിക്കേറ്റിരുന്നു.
