തിരുവനന്തപുരം: പത്തനംതിട്ട, ആലപ്പുഴ, കോട്ടയം ജില്ലകളിലെ പ്രളയബാധിത മേഖലകളില് ജനങ്ങള് അതീവ ദുരിതം അനുഭവിക്കുന്ന സാഹചര്യത്തില് സംസ്ഥാന സര്ക്കാരിനെതിരെ രൂക്ഷ വിമര്ശനവുമായി ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര്. ദുരന്തനിവാരണത്തിലും ദുരിതാശ്വാസ പ്രവര്ത്തനങ്ങളിലും സര്ക്കാരിന് ഗുരുതരമായ ഏകോപനക്കുറവും അനാസ്ഥയുമാണ് പ്രകടമായതെന്ന് അദ്ദേഹം ആരോപിച്ചു.
ജനങ്ങള് പ്രളയക്കെടുതിയില് കഴിയുമ്പോള് മുഖ്യമന്ത്രി മറ്റ് പരിപാടികളിലും ഉദ്ഘാടനങ്ങളിലും തിരക്കിലായിരുന്നുവെന്നും അതിന്റെ പ്രത്യാഘാതമാണ് ഇപ്പോള് ദുരിതബാധിതര് അനുഭവിക്കുന്നതെന്നും രാജീവ് ചന്ദ്രശേഖര് പറഞ്ഞു. ബിജെപി പാര്ലമെന്ററി പാര്ട്ടി നേതാവ് ബി.ബി. ഗോപകുമാര് എം.എല്.എയുടെ നേതൃത്വത്തില് സംസ്ഥാന ജനറല് സെക്രട്ടറിമാരായ അഡ്വ. എസ്. സുരേഷ്, അനൂപ് ആന്റണി, സംസ്ഥാന വൈസ് പ്രസിഡന്റ് കെ. സോമന് എന്നിവരടങ്ങിയ സംഘം പ്രളയബാധിത പ്രദേശങ്ങളും ദുരിതാശ്വാസ ക്യാമ്പുകളും സന്ദര്ശിച്ച ശേഷമാണ് രാജീവ് ചന്ദ്രശേഖറിന്റെ പ്രതികരണം.
ദുരിതാശ്വാസ ക്യാമ്പുകളില് പോലും ആവശ്യമായ അടിസ്ഥാന സൗകര്യങ്ങള് ഒരുക്കാന് കഴിഞ്ഞിട്ടില്ലെന്ന് അദ്ദേഹം ആരോപിച്ചു. നിരവധി ക്യാമ്പുകളില് കുടിവെള്ളം, ശുചിത്വം, ആരോഗ്യസൗകര്യങ്ങള് എന്നിവ അപര്യാപ്തമാണെന്നും വെള്ളം കയറിയ മേഖലകളില് ആവശ്യമായ രക്ഷാബോട്ടുകള് പോലും ലഭ്യമല്ലെന്നും അദ്ദേഹം ചൂണ്ടിക്കാട്ടി. പ്രകൃതി ദുരന്തത്തേക്കാള് വലിയ ദുരിതമാണ് ഭരണകൂടത്തിന്റെ അനാസ്ഥ മൂലം ജനങ്ങള് നേരിടുന്നതെന്നും അദ്ദേഹം പറഞ്ഞു.
അതേസമയം, രക്ഷാപ്രവര്ത്തനങ്ങളിലും ദുരിതാശ്വാസ സാമഗ്രികളുടെ വിതരണത്തിലും ശുചീകരണ പ്രവര്ത്തനങ്ങളിലും ബിജെപി പ്രവര്ത്തകര് സജീവമായി രംഗത്തുണ്ടെന്നും രാജീവ് ചന്ദ്രശേഖര് വ്യക്തമാക്കി. കേരളത്തില് വര്ഷംതോറും ജനങ്ങള് ദുരിതാശ്വാസ ക്യാമ്പുകളിലേക്ക് മാറേണ്ടിവരുന്ന സാഹചര്യം പ്രകൃതിയുടെ മാത്രം സൃഷ്ടിയല്ലെന്നും പതിറ്റാണ്ടുകളായി മാറിമാറി ഭരിച്ച സര്ക്കാരുകളുടെ കെടുകാര്യസ്ഥതയും ആസൂത്രണക്കുറവും ശാശ്വത പ്രളയനിയന്ത്രണ സംവിധാനങ്ങള് നടപ്പാക്കുന്നതിലെ പരാജയവുമാണ് പ്രധാന കാരണമെന്നും അദ്ദേഹം വിമര്ശിച്ചു.
പ്രളയം കഴിഞ്ഞ് നഷ്ടപരിഹാരം പ്രഖ്യാപിക്കുന്നതില് മാത്രം സര്ക്കാര് ഒതുങ്ങരുത്. ശാസ്ത്രീയമായ വെള്ളപ്പൊക്ക നിയന്ത്രണ പദ്ധതികള്, നദികളുടെയും തോടുകളുടെയും സംരക്ഷണം, ഡ്രെയിനേജ് സംവിധാനങ്ങളുടെ നവീകരണം, സ്ഥിരം വെള്ളപ്പൊക്ക ഭീഷണി നേരിടുന്ന മേഖലകള്ക്കായി ദീര്ഘകാല അടിസ്ഥാനസൗകര്യ വികസനം എന്നിവ അടിയന്തരമായി നടപ്പാക്കണമെന്നും അദ്ദേഹം ആവശ്യപ്പെട്ടു.
ദുരിതബാധിതര്ക്ക് ആവശ്യമായ എല്ലാ സഹായങ്ങളും കാലതാമസം കൂടാതെ ഉറപ്പാക്കുകയും കേരളത്തിന് ശാശ്വത പ്രളയ പ്രതിരോധ സംവിധാനം ഒരുക്കുകയും ചെയ്യണമെന്ന് സംസ്ഥാന സര്ക്കാരിനോട് ബിജെപി സംസ്ഥാന അധ്യക്ഷന് ആവശ്യപ്പെട്ടു.
