പാലക്കാട്: പാലക്കാട് ചാലിശ്ശേരിയിലെ സർക്കാർ ജനകീയാരോഗ്യ കേന്ദ്രത്തിൽ ഡ്യൂട്ടിയിലിരിക്കെ നഴ്സിന് അണലിയുടെ കടിയേറ്റു. ചാവക്കാട് സ്വദേശിനിയായ മിസിരിയയ്ക്കാണ് വിഷപ്പാമ്പിന്റെ കടിയേറ്റത്. സംഭവത്തെ തുടർന്ന് ഗുരുതരാവസ്ഥയിലായ ഇവരെ കുന്നംകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു.
എസ്റ്റേറ്റ്പടിയിൽ പ്രവർത്തിക്കുന്ന ജനകീയാരോഗ്യ കേന്ദ്രത്തിൽ കഴിഞ്ഞ ദിവസമാണ് സംഭവം നടന്നത്. ഡ്യൂട്ടിക്കിടെ ആരോഗ്യകേന്ദ്രത്തിനുള്ളിലായിരുന്നു അണലി കടിച്ചതെന്നാണ് വിവരം.
പെരുമണ്ണൂർ, കൂറ്റനാട്, എസ്റ്റേറ്റ്പടി തുടങ്ങിയ പ്രദേശങ്ങളിൽ നിന്നായി ദിവസേന നൂറുകണക്കിന് രോഗികൾ ചികിത്സ തേടിയെത്തുന്ന ആരോഗ്യകേന്ദ്രത്തിലാണ് സംഭവം ഉണ്ടായത്. ആരോഗ്യ സ്ഥാപനത്തിനുള്ളിൽ തന്നെ വിഷപ്പാമ്പ് കടന്നെത്തി ജീവനക്കാരിക്ക് കടിയേറ്റ സംഭവം പ്രദേശത്ത് ആശങ്കയ്ക്കിടയാക്കിയിട്ടുണ്ട്.
സംഭവത്തെ തുടർന്ന് ആരോഗ്യകേന്ദ്രത്തിലെ സുരക്ഷാ സംവിധാനങ്ങളും പരിസര ശുചിത്വവും സംബന്ധിച്ച് കൂടുതൽ ജാഗ്രത വേണമെന്ന ആവശ്യവും ഉയരുന്നുണ്ട്.