തിരുവനന്തപുരം: ഓണക്കാലത്തെ യാത്രാ തിരക്ക് പരിഗണിച്ച് കേരളത്തിലേക്കും തിരിച്ചും 112 പ്രത്യേക ട്രെയിന്‍ സര്‍വീസുകള്‍ പ്രഖ്യാപിച്ച് ഇന്ത്യന്‍ റെയില്‍വേ. യാത്രക്കാരുടെ വര്‍ധിച്ച ആവശ്യകത കണക്കിലെടുത്താണ് വിവിധ റെയില്‍വേ സോണുകള്‍ അധിക സര്‍വീസുകള്‍ ഏര്‍പ്പെടുത്തിയിരിക്കുന്നത്. പ്രഖ്യാപിച്ച 112 സര്‍വീസുകളില്‍ 54 എണ്ണം ദക്ഷിണ റെയില്‍വേയും 58 എണ്ണം മറ്റ് റെയില്‍വേ സോണുകളുമാണ് നടത്തുന്നത്.
ചെന്നൈ സെന്‍ട്രല്‍, താംബരം, ചെന്നൈ എഗ്മോര്‍, മംഗളൂരു സെന്‍ട്രല്‍ എന്നിവിടങ്ങളില്‍ നിന്ന് കൊല്ലത്തേക്കും തിരുവനന്തപുരത്തേക്കും തിരിച്ചുമാണ് പ്രധാന പ്രത്യേക സര്‍വീസുകള്‍. ഇതിന് പുറമെ ബെംഗളൂരു, മൈസൂരു, ഹുബ്ബള്ളി, ഹൈദരാബാദ്, ചെര്‍ലപ്പള്ളി എന്നിവിടങ്ങളില്‍ നിന്നുമുള്ള പ്രത്യേക ട്രെയിനുകളും ഓണക്കാലത്ത് സര്‍വീസ് നടത്തും. കേരളത്തിലേക്ക് അവധിക്കാലത്ത് എത്തുന്ന യാത്രക്കാരുടെ തിരക്ക് നിയന്ത്രിക്കുന്നതിനും യാത്ര സുഗമമാക്കുന്നതിനുമാണ് പ്രത്യേക സര്‍വീസുകള്‍ ക്രമീകരിച്ചതെന്ന് റെയില്‍വേ അറിയിച്ചു.
