കോതമംഗലം: ബക്കറ്റിലെ ചൂടുവെള്ളം മറിഞ്ഞ് പൊള്ളലേറ്റ് ചികിത്സയിലായിരുന്ന രണ്ടുവയസുകാരി മരിച്ചു. കോട്ടപ്പടി മുട്ടത്തുപാറ മേൽഭാഗത്തെ വീട്ടിൽ ലിജു-എൽബി ദമ്പതികളുടെ മകൾ ബിൽഗ മറിയം ലിജു (2) ആണ് മരിച്ചത്.
ഒരാഴ്ച മുമ്പായിരുന്നു ദാരുണമായ അപകടം. കുട്ടിയെ കുളിപ്പിക്കാനായി ബക്കറ്റിൽ ചൂടുവെള്ളം തയ്യാറാക്കി വച്ചിരുന്നു. അമ്മ മാറിയ സമയത്ത് കുട്ടി ബക്കറ്റിൽ പിടിച്ചതോടെ ബക്കറ്റ് അബദ്ധത്തിൽ മറിഞ്ഞു. ഇതോടെ ചൂടുവെള്ളം കുട്ടിയുടെ ദേഹത്തേക്ക് വീഴുകയായിരുന്നു.
ഞായറാഴ്ച രാവിലെയാണ് മരണം സംഭവിച്ചത്. പൊള്ളലേറ്റ കുട്ടിയെ ഉടൻ ആശുപത്രിയിൽ പ്രവേശിപ്പിച്ച് ചികിത്സ നൽകി. ചികിത്സയ്ക്കിടെ പിന്നീട് അണുബാധയുണ്ടായതിനെ തുടർന്ന് ആരോഗ്യനില വഷളാവുകയായിരുന്നു.
