കൊച്ചി: തായ്‌ക്വോണ്ടോ മത്സരത്തിനിടെ എതിരാളിയുടെ ചവിട്ടേറ്റ് തൃശ്ശൂര്‍ സ്വദേശിയായ പ്ലസ്ടു വിദ്യാര്‍ഥിക്ക് ഗുരുതര പരിക്ക്. പെരുമ്പിലാവ് സ്‌കൂളിലെ വിദ്യാര്‍ഥി ഫൈസ് അബ്ദുള്‍ ജലാലിനാണ് തലയ്‌ക്ക് പരിക്കേറ്റത്. നിലവില്‍ എറണാകുളത്തെ സ്വകാര്യ ആശുപത്രിയിലെ തീവ്രപരിചരണ വിഭാഗത്തില്‍ ചികിത്സയിലാണ്.
മഹാരാഷ്‌ട്രയില്‍ കഴിഞ്ഞ ദിവസം നടന്ന സിബിഎസ്ഇ സൗത്ത് സോണ്‍ തായ്‌ക്വോണ്ടോ മത്സരത്തിനിടെയാണ് സംഭവം. മത്സരത്തിനിടെ എതിരാളിയുടെ ചവിട്ടേറ്റ് ഫൈസ് നിലത്ത് വീഴുകയായിരുന്നു. പിന്നാലെ ബോധക്ഷയം സംഭവിച്ചതോടെ ഉടന്‍ അടുത്തുള്ള ആശുപത്രിയില്‍ പ്രവേശിപ്പിച്ചു.
ആരോഗ്യനില വഷളായതിനെ തുടര്‍ന്ന് പിന്നീട് എയര്‍ലിഫ്റ്റ് ചെയ്ത് എറണാകുളത്തെ ആശുപത്രിയിലെത്തിക്കുകയായിരുന്നു. വിദ്യാര്‍ഥിയുടെ തലയ്‌ക്ക് രക്തം കട്ടപിടിച്ചതായാണ് വിവരം. സംഭവത്തില്‍ മത്സരം നിയന്ത്രിച്ച റഫറിക്കെതിരെ ഗുരുതര ആരോപണവുമായി ഫൈസിന്റെ കുടുംബം രംഗത്തെത്തി. എതിരാളി ഫൗള്‍ പ്ലേ നടത്തിയിട്ടും റഫറി കൃത്യസമയത്ത് ഇടപെട്ടില്ലെന്നാണ് കുടുംബത്തിന്റെ ആരോപണം.
ഫൗള്‍ പ്ലേയെ തുടര്‍ന്ന് മത്സരം നിര്‍ത്തണമെന്ന് ഫൈസ് ആവശ്യപ്പെട്ടിരുന്ന ഘട്ടത്തിലാണ് എതിരാളി തലയ്‌ക്ക് ചവിട്ടിയതെന്നും കുടുംബം ആരോപിക്കുന്നു. റഫറി സമയത്ത് മത്സരം നിര്‍ത്തിയിരുന്നെങ്കില്‍ അപകടം ഒഴിവാക്കാമായിരുന്നുവെന്നാണ് കുടുംബത്തിന്റെ നിലപാട്.
സംഭവത്തില്‍ സിബിഎസ്ഇ ചെയര്‍മാന് കുടുംബം പരാതി നല്‍കിയിട്ടുണ്ട്. മത്സരത്തിന്റെ നടത്തിപ്പ്, റഫറിയുടെ ഇടപെടല്‍, സംഭവത്തിലേക്ക് നയിച്ച സാഹചര്യം എന്നിവയില്‍ വിശദമായ അന്വേഷണം വേണമെന്നാണ് കുടുംബത്തിന്റെ ആവശ്യം.
