ന്യൂഡൽഹി: മുടിയുടെ നീളം കൊണ്ട് ലോക റെക്കോർഡ് സ്വന്തമാക്കി ഉത്തരാഖണ്ഡിലെ രേണു ധരിയാൽ. 8 അടി 10 ഇഞ്ച് (271.50 സെന്റിമീറ്റർ) നീളമുള്ള മുടിയുമായാണ് രേണു ഗിന്നസ് വേൾഡ് റെക്കോർഡിൽ ഇടം നേടിയത്. ഏപ്രിലിൽ ഹൽദ്വാനിയിൽ നടത്തിയ ഔദ്യോഗിക അളവെടുപ്പിലാണ് രേണുവിന്റെ മുടിക്ക് 271.50 സെന്റിമീറ്റർ നീളമുണ്ടെന്ന് സ്ഥിരീകരിച്ചത്.
ജീവിച്ചിരിക്കുന്ന വനിതയുടെ ഏറ്റവും നീളം കൂടിയ മുടി എന്ന റെക്കോർഡാണ് രേണു സ്വന്തമാക്കിയത്. ഇതോടെ യുക്രെയ്ൻ സ്വദേശിനി അലിയ നസിറോവയുടെ റെക്കോർഡും രേണു മറികടന്നു. നസിറോവയുടെ മുടിയുടെ നീളം 257.33 സെന്റിമീറ്ററായിരുന്നു. 14 സെന്റിമീറ്ററിലധികം അധിക നീളത്തിലാണ് രേണുവിന്റെ മുടി.
രേണുവിന്റെ മുടിയുടെ നീളം മറ്റൊരു റെക്കോർഡുമായി താരതമ്യം ചെയ്താലും അതിശയിപ്പിക്കുന്നതാണ്. ലോകത്തിലെ ഏറ്റവും ഉയരം കൂടിയ വ്യക്തിയായി അറിയപ്പെടുന്ന റോബർട്ട് വാഡ്ലോയുടെ ഉയരം 272 സെന്റിമീറ്ററായിരുന്നു. അതായത് രേണുവിന്റെ മുടിയുടെ നീളം വാഡ്ലോയുടെ ഉയരത്തോട് ഏതാണ്ട് തുല്യം.
2015 മുതൽ മുടി മുറിച്ചിട്ടില്ല
2015 മുതലാണ് രേണു തുടർച്ചയായി മുടി വളർത്തുന്നത്. ഇന്ത്യൻ സംസ്കാരത്തിൽ നീളമുള്ള മുടി സൗന്ദര്യത്തിന്റെയും പാരമ്പര്യത്തിന്റെയും പ്രതീകമാണെന്ന വിശ്വാസമാണ് മുടി വളർത്താൻ പ്രചോദനമായതെന്ന് രേണു പറയുന്നു. 2015ന് ശേഷം ഒരിക്കൽ പോലും മുടി മുറിച്ചിട്ടില്ലെന്നും അവർ വ്യക്തമാക്കി.
വർഷങ്ങളായി വളർത്തിയ മുടി ഇപ്പോൾ രേണുവിന്റെ വ്യക്തിത്വത്തിന്റെ ഭാഗമായി മാറിയിരിക്കുകയാണ്. നാട്ടിലും സമൂഹമാധ്യമങ്ങളിലും നീളമേറിയ മുടി ശ്രദ്ധ നേടിയതോടെയാണ് റെക്കോർഡ് സ്വന്തമാക്കാനുള്ള ശ്രമത്തിലേക്ക് രേണു എത്തിയത്.
കെമിക്കൽ ഉൽപ്പന്നങ്ങളോട് വിട; പ്രകൃതിദത്ത പരിചരണം
ഇത്രയും നീളമുള്ള മുടി സംരക്ഷിക്കുക അത്ര എളുപ്പമല്ല. മുടി കഴുകാനും കെട്ടുപിണഞ്ഞ ഭാഗങ്ങൾ വേർതിരിക്കാനും മണിക്കൂറുകൾ വേണ്ടിവരുന്നുണ്ടെന്ന് രേണു പറയുന്നു.
കെമിക്കൽ ഉൽപ്പന്നങ്ങൾ പരമാവധി ഒഴിവാക്കുകയാണ് രേണുവിന്റെ രീതി. വീട്ടിൽ തയ്യാറാക്കുന്ന പ്രകൃതിദത്ത എണ്ണകളും ഷാംപൂവുമാണ് പ്രധാനമായും ഉപയോഗിക്കുന്നത്. ഇവ തയ്യാറാക്കുന്ന രീതികളും മുടി സംരക്ഷണത്തിന്റെ രഹസ്യങ്ങളും സ്വന്തം യൂട്യൂബ് ചാനലിലൂടെ പങ്കുവയ്ക്കുന്നുണ്ട്. ക്ഷമയും സ്ഥിരതയുമാണ് ഇത്രയും നീളമുള്ള മുടി സംരക്ഷിക്കുന്നതിലെ പ്രധാന രഹസ്യമെന്നും രേണു പറയുന്നു.
സ്വന്തം നേട്ടത്തിലൂടെ ഉത്തരാഖണ്ഡിനും ഇന്ത്യയ്ക്കും കൂടുതൽ അംഗീകാരം ലഭിക്കണമെന്നാണ് രേണുവിന്റെ ആഗ്രഹം. പ്രകൃതിദത്ത സൗന്ദര്യവും ഇന്ത്യൻ പാരമ്പര്യവും പിന്തുടരാൻ മറ്റുള്ളവരെയും പ്രചോദിപ്പിക്കുകയാണ് ലക്ഷ്യമെന്നും രേണു പറയുന്നു.