സിന്സിനാറ്റി: യുഎസ് ഓപ്പണിന് മുന്നോടിയായി ലോക ഒന്നാം നമ്പര് താരം ജാനിക് സിന്നറിന് വലിയ തിരിച്ചടി. വലത് കാല്മുട്ടിലെ പരിക്കിനെ തുടര്ന്ന് സിന്സിനാറ്റി മാസ്റ്റേഴ്സില് നിന്ന് താരം പിന്മാറി. സീസണിലെ അവസാന ഗ്രാന്ഡ് സ്ലാമിന് ആഴ്ചകള് മാത്രം ശേഷിക്കെയാണ് ഇറ്റാലിയന് താരത്തിന്റെ പിന്മാറ്റം. ഇതോടെ യുഎസ് ഓപ്പണില് പൂര്ണ ഫിറ്റ്നസോടെ സിന്നര് ഇറങ്ങുമോ എന്ന ആശങ്ക ശക്തമായി.
വലത് കാല്മുട്ടിലെ അസ്വസ്ഥത തുടരുന്നതിനാല് മത്സരിക്കാന് താന് ഇതുവരെ പൂര്ണ സജ്ജനായിട്ടില്ലെന്ന് സിന്നര് വ്യക്തമാക്കി. ഡോക്ടര്മാരുമായും മെഡിക്കല് സംഘവുമായും നടത്തിയ പരിശോധനകള്ക്ക് ശേഷമാണ് സിന്സിനാറ്റിയില് നിന്ന് പിന്മാറാനുള്ള തീരുമാനമെടുത്തതെന്നും താരം അറിയിച്ചു. സിന്നറിന്റെ വലത് കാല്മുട്ടിനെക്കുറിച്ചുള്ള ആശങ്കകള് ശക്തമായത് മിലാനിലെ സ്പെഷ്യലിസ്റ്റ് ക്ലിനിക്കില് താരം മണിക്കൂറുകളോളം പരിശോധനകള്ക്ക് വിധേയനായതോടെയാണ്. ഏകദേശം നാല് മണിക്കൂറോളം നീണ്ട പരിശോധനകള്ക്ക് ശേഷമാണ് സിന്സിനാറ്റി മാസ്റ്റേഴ്സില് കളിക്കേണ്ടതില്ലെന്ന തീരുമാനത്തിലേക്ക് താരം എത്തിയത്.
യുഎസ് ഓപ്പണിന് മുമ്പ് മത്സരപരിചയം കുറയുന്നതാണ് സിന്നറിനെ സംബന്ധിച്ച പ്രധാന ആശങ്ക. പരിക്കില് നിന്ന് പൂര്ണമായി മുക്തനായി ന്യൂയോര്ക്കിലെത്തുക എന്നതാണ് ഇനി താരത്തിന്റെ മുന്നിലുള്ള ലക്ഷ്യം. സിന്നറിനൊപ്പം മറ്റൊരു സൂപ്പര് താരമായ കാര്ലോസ് അല്കാരസിന്റെ കാര്യത്തിലും ആശങ്ക തുടരുകയാണ്. വലത് കൈത്തണ്ടയിലെ പരിക്കില് നിന്ന് പൂര്ണമായി മുക്തനാകാത്തതിനാല് അല്കാരസും സിന്സിനാറ്റി മാസ്റ്റേഴ്സില് നിന്ന് പിന്മാറി.