ഹൈദരാബാദ്: അന്താരാഷ്ട്ര ക്രിക്കറ്റില് നിന്ന് വിരമിക്കല് പ്രഖ്യാപിച്ച് ദിവസങ്ങള്ക്കുള്ളില് പുതിയ വേഷത്തില് ക്രിക്കറ്റിലേക്ക് തിരിച്ചെത്താനൊരുങ്ങി മുന് ഇന്ത്യന് താരം അജിങ്ക്യ രഹാനെ. ശ്രീലങ്കയ്ക്കെതിരായ രണ്ട് മത്സരങ്ങളടങ്ങിയ ടെസ്റ്റ് പരമ്പരയിലൂടെയാണ് 38കാരന് കമന്റേറ്ററായി പുതിയ ഇന്നിങ്സിന് തുടക്കമിടുന്നത്. ടെസ്റ്റ് ക്രിക്കറ്റിലെ തന്റെ അനുഭവസമ്പത്ത് ഇനി കമന്ററി ബോക്സില് പങ്കുവയ്ക്കാനാണ് രഹാനെയുടെ തീരുമാനം. ഇന്ത്യയുടെ ശ്രീലങ്കന് പര്യടനത്തിലെ ടെസ്റ്റ് മത്സരങ്ങളില് സോണി സ്പോര്ട്സ് നെറ്റ്വര്ക്കിനും സോണി ലിവിനുമായി കമന്ററി നടത്തുമെന്ന് താരം അറിയിച്ചു.
”ഇന്ത്യയുടെ ശ്രീലങ്കന് പര്യടനത്തില് ടെസ്റ്റ് കമന്ററിയില് അരങ്ങേറ്റം കുറിക്കുന്നതില് ഏറെ ആവേശമുണ്ട്. ടെസ്റ്റ് ക്രിക്കറ്റാണ് നമ്മുടെ കായിക ഇനത്തിന്റെ ഏറ്റവും ഉയര്ന്ന തലത്തിലുള്ള ഫോര്മാറ്റ്. ഇത്രയും വര്ഷം ഇന്ത്യക്കായി ഈ ഫോര്മാറ്റില് കളിച്ച ശേഷം മറ്റൊരു കാഴ്ചപ്പാടില് നിന്ന് മത്സരത്തെ കാണാന് കഴിയുന്നത് വലിയ അവസരമാണ്,” രഹാനെ പറഞ്ഞു.
മത്സരത്തിലെ തന്ത്രങ്ങളും തീരുമാനങ്ങളും നിര്ണായക നിമിഷങ്ങളും ആരാധകര്ക്ക് കൂടുതല് വ്യക്തമായി മനസിലാക്കാന് തന്റെ അനുഭവം പ്രയോജനപ്പെടുത്തുമെന്നും അദ്ദേഹം വ്യക്തമാക്കി. കുറച്ച് ദിവസങ്ങള്ക്ക് മുമ്പാണ് രഹാനെ അന്താരാഷ്ട്ര ക്രിക്കറ്റിലെ എല്ലാ ഫോര്മാറ്റുകളില് നിന്നും വിരമിക്കല് പ്രഖ്യാപിച്ചത്. സാമൂഹികമാധ്യമങ്ങളിലൂടെ പങ്കുവെച്ച വീഡിയോയിലൂടെയായിരുന്നു പ്രഖ്യാപനം.
ഇന്ത്യയ്ക്കായി 85 ടെസ്റ്റുകളില് നിന്ന് 5,077 റണ്സാണ് രഹാനെ നേടിയത്. 12 സെഞ്ചുറികളും 26 അര്ധസെഞ്ചുറികളും അദ്ദേഹത്തിന്റെ പേരിലുണ്ട്. ഇന്ത്യന് ടെസ്റ്റ് ടീമിന്റെ നായകനായും രഹാനെ തിളങ്ങിയിട്ടുണ്ട്. ഓസ്ട്രേലിയന് മണ്ണില് ഇന്ത്യയെ 2-1ന് ടെസ്റ്റ് പരമ്പര വിജയത്തിലേക്ക് നയിച്ച നായകന് എന്ന നേട്ടവും രഹാനെയ്ക്കുണ്ട്. ആറ് ടെസ്റ്റുകളില് ഇന്ത്യയെ നയിച്ചപ്പോള് നാല് മത്സരങ്ങളില് വിജയം നേടുകയും രണ്ട് മത്സരങ്ങള് സമനിലയിലാകുകയും ചെയ്തു. തോല്വി അറിയാതെയാണ് രഹാനെ ക്യാപ്റ്റന്സി അവസാനിപ്പിച്ചത്.
ഇന്ത്യയുടെ ശ്രീലങ്കന് പര്യടനത്തിലെ രണ്ട് മത്സരങ്ങളടങ്ങിയ ടെസ്റ്റ് പരമ്പര ഓഗസ്റ്റ് 15ന് ഗാള് ഇന്റര്നാഷണല് സ്റ്റേഡിയത്തില് ആരംഭിക്കും. രണ്ടാം ടെസ്റ്റ് ഓഗസ്റ്റ് 23ന് കൊളംബോയില് തുടങ്ങും. ലോക ടെസ്റ്റ് ചാമ്പ്യന്ഷിപ്പിന്റെ ഭാഗമായാണ് പരമ്പര നടക്കുന്നത്. കളിക്കാരനെന്ന നിലയില് ഇന്ത്യയുടെ വിജയങ്ങള്ക്കൊപ്പം നിന്ന രഹാനെ ഇനി കമന്ററി ബോക്സിലിരുന്ന് തന്റെ ക്രിക്കറ്റ് അറിവ് ആരാധകരുമായി പങ്കുവെക്കുമ്പോള്, ശ്രീലങ്കന് പരമ്പര അദ്ദേഹത്തിന്റെ കരിയറിലെ പുതിയ അധ്യായത്തിനും തുടക്കമാകും.
