ന്യൂഡൽഹി: സംസ്ഥാനത്തിന്റെ ഔദ്യോഗിക പേര് ഇനി ‘കേരളം’. സംസ്ഥാനത്തിന്റെ പേര് മാറ്റുന്നതിനുള്ള ബില്ലിൽ രാഷ്‌ട്രപതി ദ്രൗപദി മുർമു ഒപ്പുവച്ചു. ഇതോടെ പേര് മാറ്റത്തിനുള്ള നിയമനടപടികൾക്ക് അന്തിമ അംഗീകാരമായി.
സംസ്ഥാനത്തിന്റെ പേര് മാറ്റുന്നതിനുള്ള ബിൽ പാർലമെന്റിന്റെ ഇരുസഭകളും നേരത്തെ പാസാക്കിയിരുന്നു. രാഷ്ട്രപതിയുടെ അംഗീകാരം കൂടി ലഭിച്ചതോടെ ഇനി മുതൽ സംസ്ഥാനത്തിന്റെ ഔദ്യോഗിക രേഖകളിലും സർക്കാർ സംവിധാനങ്ങളിലും പേര് ‘കേരളം’ എന്നായിരിക്കും രേഖപ്പെടുത്തുക.
കേന്ദ്ര-സംസ്ഥാന സർക്കാരുകളുടെ ഔദ്യോഗിക രേഖകൾ, വിവിധ ഭരണസംവിധാനങ്ങൾ, സൈൻബോർഡുകൾ തുടങ്ങിയവയിൽ പേര് മാറ്റം ഘട്ടംഘട്ടമായി നടപ്പാക്കും. നിലവിൽ ഉപയോഗിക്കുന്ന പേരിന് പകരം മലയാളത്തിലും ഔദ്യോഗികമായി ‘കേരളം’ എന്ന പേര് ഉപയോഗിക്കും.
ഇംഗ്ലീഷ് രേഖകളിലും സംസ്ഥാനത്തിന്റെ പേര് ‘Kerala’ എന്നതിന് പകരം ‘Keralam’ എന്നാക്കി മാറ്റുന്നതിനുള്ള നടപടികൾ ഘട്ടംഘട്ടമായി നടപ്പാക്കും.
ഭാഷാപരവും ചരിത്രപരവുമായ സംസ്ഥാനത്തിന്റെ സ്വത്വവുമായി ബന്ധപ്പെട്ട് ദീർഘകാലമായി ഉയർന്നുവന്ന ആവശ്യത്തിനാണ് രാഷ്ട്രപതിയുടെ അംഗീകാരത്തോടെ ഇപ്പോൾ നിയമപരമായ പരിസമാപ്തി ലഭിച്ചിരിക്കുന്നത്.
