ബാഴ്സലോണ: ഫുട്ബോള് മൈതാനത്തെ കരുത്തനായ പ്രതിരോധതാരമായിരുന്ന ജെറാഡ് പിക്വെ ഇനി ചെസ് ലോകത്തും കരുനീക്കാനൊരുങ്ങുന്നു. മുന് സ്പാനിഷ് താരം ഗ്ലോബല് ചെസ് ലീഗിലെ ഫയേഴ്സ് അമേരിക്കന് ഗാംബിറ്റ്സ് ഫ്രാഞ്ചൈസിയില് നിക്ഷേപം നടത്തി. മുന് ഇന്ത്യന് ക്രിക്കറ്റ് താരം രവിചന്ദ്രന് അശ്വിനും ഉടമസ്ഥാവകാശമുള്ള ഫ്രാഞ്ചൈസിയാണിത്. എര്ലിങ്ങ് ഹാളണ്ടിന്റെ പാത പിന്തുടര്ന്നാണ് പിക്വെയുടെയും ചെസ് ലോകത്തേക്കുള്ള വരവ്. സ്പോര്ട്സ്, മീഡിയ കമ്പനിയായ കോസ്മോസിന്റെ സ്ഥാപകന് കൂടിയായ പിക്വെയുടെ പുതിയ നീക്കം ചെസ്സിന്റെ ആഗോള വളര്ച്ചയ്ക്കുള്ള സാധ്യതകള് മുന്നില്ക്കാണുന്നതാണ്.
ഫ്രാഞ്ചൈസി ലീഗുകള്, ഡിജിറ്റല് ഉള്ളടക്കം, സ്പോണ്സര്ഷിപ്പുകള്, സ്ട്രീമിങ് പ്ലാറ്റ്ഫോമുകള് തുടങ്ങിയവയിലൂടെ ചെസ്സിനെ പരമ്പരാഗത ബോര്ഡ് ഗെയിം എന്നതില്നിന്ന് ആഗോള കായിക ഉല്പ്പന്നമാക്കി മാറ്റാനുള്ള ശ്രമങ്ങളുടെ ഭാഗമായാണ് പിക്വെയുടെ നിക്ഷേപത്തെ വിലയിരുത്തുന്നത്. മുന് ഇന്ത്യന് ക്രിക്കറ്റ് താരം രവിചന്ദ്രന് അശ്വിനും അമേരിക്കന് ഗാംബിറ്റ്സിന്റെ ഓഹരി ഉടമയാണ്. സെപ്റ്റംബറില് ബെംഗളൂരുവില് നടക്കുന്ന ഗ്ലോബല് ചെസ് ലീഗിന്റെ നാലാം പതിപ്പില് അമേരിക്കന് ഗാംബിറ്റ്സ് മത്സരിക്കും.
ചെസ് മേഖലയിലേക്ക് നിക്ഷേപം നടത്തുന്ന രണ്ടാമത്തെ പ്രമുഖ ഫുട്ബോള് താരമാണ് പിക്വെ. നേരത്തെ നോര്വേ ചെസിലും ടോട്ടല് ചെസ് ലോക ചാമ്പ്യന്ഷിപ്പിലും മാഞ്ചസ്റ്റര് സിറ്റി താരം എര്ലിങ് ഹാളണ്ട് നിക്ഷേപം നടത്തിയിരുന്നു. ഫുട്ബോളിലും ബിസിനസ് രംഗത്തും വ്യത്യസ്ത മേഖലകളില് സാന്നിധ്യമറിയിച്ച പിക്വെയുടെ പുതിയ നീക്കം ചെസ്സിനും കായികലോകത്തെ പ്രമുഖ താരങ്ങള്ക്കുമിടയിലെ ബന്ധം കൂടുതല് ശക്തമാക്കുന്നതാണ്.
