ബെംഗളൂരു: കർണാടക പ്രദേശ് യൂത്ത് കോൺഗ്രസ് മുൻ അധ്യക്ഷനും ശാന്തിനഗർ എംഎൽഎ എൻ.എ. ഹാരിസിന്റെ മകനുമായ മുഹമ്മദ് ഹാരിസ് നാലപ്പാട് രണ്ടാമതും വിവാഹിതനായി. കൊടഗു ജില്ലയിലെ മടിക്കേരിക്കു സമീപമുള്ള കൂർഗ് വൈൽഡർനസ് റിസോർട്ടിൽ നടന്ന നിക്കാഹ് ചടങ്ങിൽ രാഷ്‌ട്രീയ-സിനിമാ മേഖലയിലെ പ്രമുഖർ പങ്കെടുത്തു.
കൊടഗു ജില്ലാ കോൺഗ്രസ് കമ്മിറ്റി ജനറൽ സെക്രട്ടറിയും മടിക്കേരി അർബൻ ഡെവലപ്‌മെന്റ് അതോറിറ്റി മുൻ ചെയർമാനുമായ എസ്.ഐ. മുനീർ അഹമ്മദിന്റെ മകൾ മലീഹ ഫാത്തിമയാണ് വധു. നിയമബിരുദധാരിയായ മലീഹ നിലവിൽ അമേരിക്ക ആസ്ഥാനമായി പ്രവർത്തിക്കുന്ന പ്രമുഖ ബഹുരാഷ്‌ട്ര കമ്പനിയിൽ ജോലി ചെയ്യുകയാണ്.
ഇരുകുടുംബങ്ങളും തമ്മിലുള്ള ദീർഘകാല സൗഹൃദത്തിന്റെ പശ്ചാത്തലത്തിലാണ് വിവാഹം നടന്നത്. കുടുംബങ്ങളുടെ പൂർണ സമ്മതത്തോടെയാണ് വിവാഹം തീരുമാനിച്ചതെന്ന് അടുത്ത വൃത്തങ്ങൾ അറിയിച്ചു.
ഓഗസ്റ്റ് 15 മുതൽ 20 വരെ അഞ്ച് ദിവസങ്ങളിലായാണ് വിവാഹാഘോഷങ്ങൾ സംഘടിപ്പിച്ചത്. ഓഗസ്റ്റ് 16ന് ഉച്ചയോടെയാണ് നിക്കാഹ് ചടങ്ങുകൾ നടന്നത്. തുടർന്ന് ഓഗസ്റ്റ് 17ന് ക്ഷണിക്കപ്പെട്ട അതിഥികൾക്കായി പ്രത്യേക വിവാഹ സൽക്കാരവും ഒരുക്കി. വിവാഹച്ചടങ്ങുകൾക്കായി റിസോർട്ടിലെ 104 മുറികളും പൂർണമായി ബുക്ക് ചെയ്തിരുന്നു. സുരക്ഷയും സ്വകാര്യതയും മുൻനിർത്തി പൊതുജനങ്ങൾക്ക് പ്രവേശനം അനുവദിച്ചിരുന്നില്ല.
കർണാടക ഉപമുഖ്യമന്ത്രി ഡി.കെ. ശിവകുമാർ ഭാര്യയ്‌ക്കൊപ്പമാണ് ചടങ്ങിൽ പങ്കെടുത്തത്. എംഎൽഎ ഡോ. മന്തർ ഗൗഡ, കർണാടക മുഖ്യമന്ത്രി സിദ്ധരാമയ്യയുടെ രാഷ്‌ട്രീയ സെക്രട്ടറി എ.എസ്. പൊന്നണ്ണ തുടങ്ങിയ പ്രമുഖ രാഷ്‌ട്രീയ നേതാക്കളും വിവാഹാഘോഷങ്ങളിൽ പങ്കെടുത്തു.
മുഹമ്മദ് ഹാരിസിന്റെ ആദ്യ വിവാഹത്തിലെ ഭാര്യ സംരീൻ ആണ്. ആദ്യ വിവാഹത്തിന് ശേഷമാണ് മലീഹ ഫാത്തിമയുമായുള്ള രണ്ടാം വിവാഹം നടന്നത്. സ്വകാര്യതയ്‌ക്ക് ഏറെ പ്രാധാന്യം നൽകിയായിരുന്നു ഇത്തവണത്തെ വിവാഹച്ചടങ്ങുകൾ സംഘടിപ്പിച്ചത്.
