ആംസ്റ്റര്വീന്: വനിതാ ഹോക്കി ലോകകപ്പില് ഇന്ത്യയുടെ മികച്ച പ്രതിരോധ പ്രകടനത്തിനും നിലവിലെ ഒളിമ്പിക് ചാമ്പ്യന്മാരായ നെതര്ലന്ഡ്സിനെ തടയാനായില്ല. യിബി ജാന്സനും ഫ്രെഡറിക്ക് മാറ്റ്ലയും പെനാല്റ്റി കോര്ണറിലൂടെ നേടിയ ഗോളുകളുടെ മികവില് നെതര്ലന്ഡ്സ് ഇന്ത്യയെ 2-0ന് തോല്പ്പിച്ചു. തോല്വിയോടെ ഇന്ത്യ ഗ്രൂപ്പില് ഒരു പോയിന്റില് തുടരുകയാണ്. അതേസമയം തുടര്ച്ചയായ മൂന്നാം ലോകകപ്പ് കിരീടം ലക്ഷ്യമിടുന്ന നെതര്ലന്ഡ്സ് സെമിഫൈനല് സ്ഥാനം ഉറപ്പിക്കുന്നതിന് അടുത്തെത്തി.
മത്സരത്തിന്റെ രണ്ടാം മിനിറ്റില് തന്നെ ജാന്സന് പെനാല്റ്റി കോര്ണര് ഗോളിലൂടെ ഡച്ച് ടീമിന് ലീഡ് നല്കി. അഞ്ചാം മിനിറ്റില് വീണ്ടും പെനാല്റ്റി കോര്ണര് ലഭിച്ചെങ്കിലും ജാന്സന്റെ ശ്രമം ബിച്ചു ദേവി മികച്ച രീതിയില് തടഞ്ഞു. തുടര്ന്ന് നെതര്ലന്ഡ്സ് തുടര്ച്ചയായി ആക്രമണം നടത്തിയെങ്കിലും ഇന്ത്യന് പ്രതിരോധവും ഗോള്കീപ്പര്മാരും അവസരങ്ങള് തടഞ്ഞുനിര്ത്തി. രണ്ടാം ക്വാര്ട്ടറില് ഇന്ത്യ കൂടുതല് പന്തടക്കവും മുന്നേറ്റവും കാട്ടി രണ്ട് പെനാല്റ്റി കോര്ണറുകള് സ്വന്തമാക്കിയെങ്കിലും ദീപികയുടെ ശ്രമങ്ങള് ഡച്ച് പ്രതിരോധം തടഞ്ഞു.
പിന്നീട് സവിത പൂനിയയും നിര്ണായക സേവുകളിലൂടെ ഇന്ത്യയെ മത്സരത്തില് നിലനിര്ത്തി. രണ്ടാം പകുതിയുടെ തുടക്കത്തില് ഇന്ത്യക്ക് ചില മികച്ച കൗണ്ടര് അറ്റാക്കുകള് ലഭിച്ചു. സുനെലിത ടോപ്പോയുടെ ശ്രമം തടയപ്പെട്ടതോടെ സമനില നേടാനുള്ള അവസരവും നഷ്ടമായി. 38-ാം മിനിറ്റില് ഫ്രെഡറിക്ക് മാറ്റ്ല പെനാല്റ്റി കോര്ണര് ഗോളാക്കി മാറ്റിയതോടെ നെതര്ലന്ഡ്സ് 2-0ന് മുന്നിലെത്തി. ശേഷിക്കുന്ന സമയത്ത് ഇന്ത്യ തിരിച്ചുവരാന് ശ്രമിച്ചെങ്കിലും ഡച്ച് പ്രതിരോധം വഴങ്ങിയില്ല. നെതര്ലന്ഡ്സിനായി പിയന് ഡിക്കെയുടെ ശ്രമം പോസ്റ്റില് തട്ടുകയും ചെയ്തു.
ഇന്ത്യയ്ക്ക് ഇനി ഓഗസ്റ്റ് 23 ഞായറാഴ്ച ഓസ്ട്രേലിയക്കെതിരെയാണ് അവസാന ഫേസ്-2 മത്സരം. സെമിഫൈനല് പ്രതീക്ഷ നിലനിര്ത്താന് ആ മത്സരത്തില് ജയം അനിവാര്യമായിരിക്കുകയാണ്. തോല്വിയുണ്ടായെങ്കിലും ശക്തരായ ലോക-ഒളിമ്പിക് ചാമ്പ്യന്മാര്ക്കെതിരെ ഇന്ത്യ പൂര്ണമായി കീഴടങ്ങാതെ നടത്തിയ പ്രതിരോധം ശ്രദ്ധേയമായി. എന്നാല് പാസിങ്ങിലും ഫിറ്റ്നസിലും ആക്രമണത്തിലെ റിസ്ക് എടുക്കുന്നതിലും ഇന്ത്യക്ക് ഇനിയും മെച്ചപ്പെടേണ്ടതുണ്ടെന്ന് മത്സരം വ്യക്തമാക്കുന്നു.
