കൊച്ചി: സിഎംആര്‍എല്‍-എക്സാലോജിക് സാമ്പത്തിക ഇടപാട് കേസില്‍ വാര്‍ത്താക്കുറിപ്പ് ഇറക്കിയത് സ്വാഭാവിക നടപടിയാണെന്ന് എന്‍ഫോഴ്സ്മെന്റ് ഡയറക്ടറേറ്റ് (ഇഡി). വീണ വിജയന്‍ അനധികൃത പണമിടപാടുകള്‍ നടത്തിയതിന് കൃത്യമായ തെളിവുകളുണ്ടെന്നും വാര്‍ത്താക്കുറിപ്പില്‍ പരാമര്‍ശിച്ചത് അന്വേഷണത്തിലെ കണ്ടെത്തലുകളാണെന്നും ഇഡി വ്യക്തമാക്കി. കേസില്‍ കൂടുതല്‍ ചോദ്യം ചെയ്യല്‍ ഉടന്‍ ഉണ്ടായേക്കുമെന്നും ഇഡി സൂചന നല്‍കി.
വീണയ്‌ക്കെതിരെ ഇഡി വാര്‍ത്താക്കുറിപ്പ് പുറത്തിറക്കിയത് അസാധാരണ നടപടിയാണെന്നായിരുന്നു മുന്‍ മുഖ്യമന്ത്രി പിണറായി വിജയന്റെ പ്രതികരണം. വീണ തന്റെ മകളായതിനാലാണ് അന്വേഷണങ്ങളെല്ലാം നടക്കുന്നതെന്ന ആരോപണവും പിണറായി ഉന്നയിച്ചിരുന്നു. വാര്‍ത്താക്കുറിപ്പില്‍ തന്റെ പേരും പദവിയും പരാമര്‍ശിച്ചതിനെയും അദ്ദേഹം വിമര്‍ശിച്ചു. മുഹമ്മദ് റിയാസിന്റെ ബാങ്ക് അക്കൗണ്ടിലേക്ക് പണം മാറ്റിയെന്ന ആരോപണം ശരിയല്ലെന്നും പിണറായി വിജയന്‍ കഴിഞ്ഞ ദിവസം വാര്‍ത്താസമ്മേളനത്തില്‍ പറഞ്ഞിരുന്നു.
തനിക്കോ മകള്‍ക്കോ കുടുംബത്തിലെ മറ്റാര്‍ക്കെങ്കിലുമോ ഹവാല ഇടപാടുകളില്ലെന്നും അദ്ദേഹം വ്യക്തമാക്കി. ”തന്റെ കൈകള്‍ ശുദ്ധമാണ്, ഇനിയും ശുദ്ധമായിരിക്കും” എന്നായിരുന്നു പിണറായി വിജയന്റെ അവകാശവാദം. കേസില്‍ ഇഡിയുടെ തുടര്‍നടപടികള്‍ നിര്‍ണായകമാകും.
