സൂര്യപേട്ട്: തെലങ്കാനയിലെ സൂര്യപേട്ട് ജില്ലയില് സ്വകാര്യ ട്രാവല്സ് ബസ് സഞ്ചരിച്ചുകൊണ്ടിരുന്ന ട്രക്കില് ഇടിച്ചുണ്ടായ അപകടത്തില് ആറ് പേര് മരിച്ചു. നിരവധി പേര്ക്ക് ഗുരുതരമായി പരിക്കേറ്റു. ബുധനാഴ്ച പുലര്ച്ചെ 5.20ഓടെ ദുര്ഗാപുരം സ്റ്റേജിന് സമീപമാണ് അപകടമുണ്ടായത്. ഹൈദരാബാദില് നിന്ന് വിജയവാഡയിലേക്ക് പോവുകയായിരുന്ന ബസാണ് ട്രക്കില് ഇടിച്ചത്. അപകടസമയത്ത് ബസില് 43 യാത്രക്കാരുണ്ടായിരുന്നു. ഇടിയുടെ ആഘാതത്തില് നിരവധി പേര്ക്ക് പരിക്കേറ്റു.
പരിക്കേറ്റവരെ ഉടന് സമീപത്തെ ആശുപത്രികളില് പ്രവേശിപ്പിച്ച് ചികിത്സ നല്കി. മരിച്ചവരുടെ മൃതദേഹങ്ങള് പോസ്റ്റ്മോര്ട്ടത്തിനായി മോര്ച്ചറിയിലേക്ക് മാറ്റി. അപകടത്തിലേക്ക് നയിച്ച സാഹചര്യം സംബന്ധിച്ച് പൊലീസ് അന്വേഷണം ആരംഭിച്ചു. അപകടത്തിന്റെ കൃത്യമായ കാരണം കണ്ടെത്താനുള്ള നടപടികളും പുരോഗമിക്കുകയാണ്. സംഭവത്തില് തെലങ്കാന മുഖ്യമന്ത്രി രേവന്ത് റെഡ്ഡി ദുഃഖം രേഖപ്പെടുത്തി. മരിച്ചവരുടെ കുടുംബാംഗങ്ങളുടെ ദുഃഖത്തില് പങ്കുചേരുന്നതായി മുഖ്യമന്ത്രി അറിയിച്ചു.
പരിക്കേറ്റവര്ക്ക് മികച്ച ചികിത്സ ഉറപ്പാക്കാന് ആവശ്യമായ എല്ലാ നടപടികളും സ്വീകരിക്കാന് മുഖ്യമന്ത്രി ചീഫ് സെക്രട്ടറിക്ക് നിര്ദേശം നല്കി. മരിച്ചവരുടെ കുടുംബങ്ങള്ക്കും പരിക്കേറ്റവര്ക്കും ആവശ്യമായ സഹായം ലഭ്യമാക്കണമെന്നും അധികൃതര്ക്ക് നിര്ദേശം നല്കിയിട്ടുണ്ട്.