കൊച്ചി: ഡയറിയിൽ എന്തോ പരതുന്ന ദിലീപ്… സമീപത്ത് ഒരു ചെറിയ ബാഗ്… മുഖത്ത് കണ്ണടയും അൽപ്പം നരകയറിത്തുടങ്ങിയ താടിയും. പക്വതയാർന്ന വ്യത്യസ്ത ഗെറ്റപ്പിലാണ് ദിലീപ്. താരം ഗൗരവമേറിയ എന്തോ കാര്യത്തിലാണ് ശ്രദ്ധ കേന്ദ്രീകരിച്ചിരിക്കുന്നതെന്ന സൂചന നൽകുന്ന ‘നീക്കം’ എന്ന ചിത്രത്തിന്റെ സെക്കൻഡ് ലുക്ക് പോസ്റ്റർ പുറത്ത്.
ജഗൻ ഷാജി കൈലാസ് സംവിധാനം ചെയ്യുന്ന ചിത്രത്തിന്റെ ഓണാശംസകൾ നേർന്നുകൊണ്ടാണ് സെക്കൻഡ് ലുക്ക് പുറത്തിറക്കിയത്. പോസ്റ്റർ പുറത്തിറങ്ങിയതിന് പിന്നാലെ ദിലീപിന്റെ കഥാപാത്രത്തെക്കുറിച്ചുള്ള ചർച്ചകൾ ആരാധകർക്കിടയിലും ചലച്ചിത്രവൃത്തങ്ങളിലും സജീവമായിരിക്കുകയാണ്. പ്രത്യേകിച്ച് ഡയറിയിൽ ദിലീപ് എന്താണ് തിരയുന്നതെന്ന ചോദ്യം തന്നെയാണ് പോസ്റ്റർ ഉയർത്തുന്ന പ്രധാന ദുരൂഹത.
ഒരു പൊലീസ് സ്റ്റേഷന്റെ പശ്ചാത്തലത്തിൽ പൂർണമായും ഇമോഷണൽ ത്രില്ലർ ഡ്രാമ ജോണറിലാണ് ‘നീക്കം’ ഒരുങ്ങുന്നത്. തുടക്കം മുതൽ ഉദ്വേഗത്തിന്റെ മുൾമുനയിലൂടെ സഞ്ചരിക്കുന്ന കഥയാണ് ചിത്രത്തിന്റേതെന്നാണ് അണിയറപ്രവർത്തകർ നൽകുന്ന സൂചന. ദിലീപ് ഇതുവരെ അവതരിപ്പിച്ച കഥാപാത്രങ്ങളിൽ നിന്ന് തികച്ചും വ്യത്യസ്തമായ ഒന്നായിരിക്കും ചിത്രത്തിലേതെന്നും ഒരു നടനെന്ന നിലയിൽ ഏറെ അഭിനയസാധ്യതകളുള്ള കഥാപാത്രമാണ് ഇതെന്നും അണിയറപ്രവർത്തകർ പറയുന്നു.
ഉർവ്വശി തീയേറ്റേഴ്സ്, പെൻ സ്റ്റുഡിയോസിനു വേണ്ടി ഡോ. ജയന്ത് ലാൽ ഗാദ, കാക്കാസ്റ്റോറീസ് എന്നീ ബാനറുകളിൽ സന്ദീപ് സേനൻ, അലക്സ് ഇ. കുര്യൻ എന്നിവർ ചേർന്നാണ് ചിത്രം നിർമിക്കുന്നത്. സംഗീത് സേനൻ, നിമിത ഫ്രാൻസിസ് എന്നിവർ കോ-പ്രൊഡ്യൂസർമാരാണ്. രഘു സുഭാഷ് ചന്ദ്രനാണ് കോ-പ്രൊഡ്യൂസർ.
സിദ്ദിഖ്, കലാഭവൻ ഷാജോൺ, ബിനു പപ്പു, ബിലാസ് ചന്ദ്രൻ, സാദിഖ്, ഡ്രാക്കുള സുധീർ, കോട്ടയം രമേഷ്, ശാരി, ഷെല്ലി തുടങ്ങിയവരും ചിത്രത്തിലെ പ്രധാന താരങ്ങളാണ്.
വിബിൻ ബാലചന്ദ്രന്റേതാണ് തിരക്കഥ. മുജീബ് മജീദ് സംഗീതവും അജയ് ഡേവിഡ് കാച്ചപ്പിള്ളി ഛായാഗ്രഹണവും നിർവഹിക്കുന്നു. സൂരജ് ഇ.എസ്. ആണ് എഡിറ്റിംഗ്. സന്തോഷ് രാമൻ പ്രൊഡക്ഷൻ ഡിസൈനറും റോണക്സ് സേവ്യർ മേക്കപ്പും സമീറ സനീഷ് കോസ്റ്റ്യൂം ഡിസൈനും നിർവഹിക്കുന്നു.
സ്യമന്തക് പ്രദീപാണ് ചീഫ് അസോസിയേറ്റ് ഡയറക്ടർ. മുകേഷ് വിഷ്ണു അസോസിയേറ്റ് ഡയറക്ടറാണ്. വിഘ്നേഷ് പ്രദീപാണ് സ്റ്റിൽസ്. യെല്ലോ ടൂത്താണ് ഡിസൈൻ. മനു ആലുക്കൽ പ്രൊജക്റ്റ് ഡിസൈനറും ബർണാഡ് തോമസ് പ്രൊഡക്ഷൻ എക്സിക്യൂട്ടീവും നോബിൾ ജേക്കബ്-ഏറ്റുമാനൂർ പ്രൊഡക്ഷൻ കൺട്രോളറുമാണ്.
തൊടുപുഴ, കൊച്ചി എന്നിവിടങ്ങളിലായി അറുപത് ദിവസത്തോളം നീണ്ട ചിത്രീകരണത്തോടെയാണ് ‘നീക്കം’ പൂർത്തിയാക്കിയത്. നിർമ്മാണ പ്രവർത്തനങ്ങൾ പൂർത്തിയായി വരുന്ന ചിത്രം ഒക്ടോബറിൽ ഉർവ്വശി തീയേറ്റേഴ്സ് പ്രദർശനത്തിനെത്തിക്കും.
ഡയറിയിൽ ദിലീപ് തിരയുന്നതെന്ത്? ബസ് കാത്തിരിപ്പ് കേന്ദ്രത്തിൽ ഒറ്റപ്പെട്ടിരിക്കുന്ന ആ കഥാപാത്രത്തിന്റെ ജീവിതത്തിൽ എന്താണ് സംഭവിച്ചത്? ചോദ്യങ്ങൾ ബാക്കിവെച്ചാണ് ‘നീക്കം’ സെക്കൻഡ് ലുക്ക് പ്രേക്ഷകരെ കാത്തിരിപ്പിക്കുന്നത്.
