ന്യൂഡൽഹി: അയോധ്യ ശ്രീരാമ ജന്മഭൂമി തീർഥ ക്ഷേത്ര ട്രസ്റ്റിന്റെ ആദ്യ ചീഫ് എക്സിക്യൂട്ടീവ് ഓഫീസറായി (CEO) വിരമിച്ച എയർ മാർഷൽ ജിതേന്ദ്ര മിശ്രയെ നിയമിച്ചു. മുൻ വെസ്റ്റേൺ എയർ കമാൻഡ് മേധാവിയായിരുന്ന ജിതേന്ദ്ര മിശ്രയാണ് ഇനി രാമക്ഷേത്രത്തിന്റെ ഭരണപരമായ പ്രവർത്തനങ്ങൾക്ക് നേതൃത്വം നൽകുക.
38 വർഷത്തിലേറെ നീണ്ട ഇന്ത്യൻ വ്യോമസേനാ സേവന പരിചയമുള്ള ജിതേന്ദ്ര മിശ്ര നിരവധി സുപ്രധാന കമാൻഡ്, സ്റ്റാഫ് പദവികൾ വഹിച്ചിട്ടുണ്ട്. വെസ്റ്റേൺ എയർ കമാൻഡിന്റെ എയർ ഓഫീസർ കമാൻഡിംഗ് ഇൻ ചീഫ് ആയിരുന്നു. 2025 ജനുവരി ഒന്നിനാണ് അദ്ദേഹം വെസ്റ്റേൺ എയർ കമാൻഡിന്റെ ചുമതലയേറ്റത്.
ഫൈറ്റർ സ്ക്വാഡ്രൺ കമാൻഡർ, ചീഫ് ടെസ്റ്റ് പൈലറ്റ്, രണ്ട് മുൻനിര വ്യോമതാവളങ്ങളുടെ എയർ ഓഫീസർ കമാൻഡിംഗ്, എയർ ഹെഡ്ക്വാർട്ടേഴ്സിലെ വിവിധ സുപ്രധാന പദവികൾ എന്നിവയും അദ്ദേഹം വഹിച്ചിട്ടുണ്ട്. അതി വിശിഷ്ട സേവാ മെഡൽ, വിശിഷ്ട സേവാ മെഡൽ എന്നിവയും ലഭിച്ചിട്ടുണ്ട്.
മൂന്ന് പുതിയ ട്രസ്റ്റിമാരും
ഭരണപരമായ പുനഃസംഘടനയുടെ ഭാഗമായി ശ്രീരാമ ജന്മഭൂമി തീർഥ ക്ഷേത്ര ട്രസ്റ്റിലേക്ക് മൂന്ന് പുതിയ ട്രസ്റ്റിമാരെയും നിയമിച്ചു. ഡൽഹി സ്വദേശിയായ മഹേഷ് ഭഗ്ചന്ദ്ക, അയോധ്യ സ്വദേശിയായ മദൻ മോഹൻ പാണ്ഡെ, ഷിക്കോഹാബാദ് സ്വദേശിനി നിർമല യാദവ് എന്നിവരാണ് പുതിയ അംഗങ്ങൾ.
CEO നിയമനത്തിന് വിപുലമായ തിരഞ്ഞെടുപ്പ്
എഐ അധിഷ്ഠിത സ്ക്രീനിങ്ങും മാനുവൽ വിലയിരുത്തലും ഉൾപ്പെടുത്തിയ നടപടികളിലൂടെയാണ് CEOയെ തെരഞ്ഞെടുത്തത്. 5,585 പേരാണ് തസ്തികയിലേക്ക് അപേക്ഷിച്ചത്. ഇതിൽ 3,570 പേർ അപേക്ഷാ നടപടികൾ പൂർത്തിയാക്കി. 600 മാർക്കിന്റെ മൂല്യനിർണയ സംവിധാനത്തിൽ 470-ലധികം മാർക്ക് നേടിയവരെ അടുത്ത ഘട്ടത്തിലേക്ക് പരിഗണിച്ചു.
തുടർന്ന് 108 പേരുമായി വെർച്വൽ ആശയവിനിമയം നടത്തി. ഇതിൽനിന്ന് 16 പേരെ തെരഞ്ഞെടുത്ത് ഓഗസ്റ്റ് 11, 12 തീയതികളിൽ അയോധ്യയിൽ അന്തിമ അഭിമുഖം നടത്തി. വിരമിച്ച ജസ്റ്റിസ് പ്രമോദ് കോഹ്‌ലി, വിരമിച്ച ലെഫ്റ്റനന്റ് ജനറൽ വിഷ്ണുകാന്ത് ചതുർവേദി, സുരേഷ് ഹവാരെ എന്നിവർ ഉൾപ്പെട്ട മൂന്നംഗ സെർച്ച് കമ്മിറ്റിയാണ് തിരഞ്ഞെടുപ്പ് നടപടികൾക്ക് നേതൃത്വം നൽകിയത്.
ഓപ്പറേഷൻ സിന്ദൂരിന്റെ സമയത്ത് വെസ്റ്റേൺ എയർ കമാൻഡിന് നേതൃത്വം നൽകിയിരുന്ന ജിതേന്ദ്ര മിശ്രയുടെ ഭരണ-സൈനിക പരിചയം രാമക്ഷേത്ര ട്രസ്റ്റിന്റെ പുതിയ ചുമതലയിൽ നിർണായകമാകുമെന്നാണ് വിലയിരുത്തൽ.
