കൊച്ചി: ഒരു പുഞ്ചിരി… പക്ഷേ ആ പുഞ്ചിരിക്ക് പിന്നിൽ എന്താണ് ഒളിച്ചിരിക്കുന്നത്? കയ്യിൽ ചോരപുരണ്ട കഠാര. മുന്നിൽ നിഗൂഢതകൾ നിറഞ്ഞ ഒരു പുസ്തകം. അതിലേക്ക് കഠാര കുത്തിയിറക്കുന്ന ജയസൂര്യ. കൗതുകവും ആശ്ചര്യവും ഒപ്പം അൽപ്പം ഭീതിയും സമ്മാനിക്കുന്ന പുതിയ ലുക്കുമായി ‘മായൻ’ അണിയറപ്രവർത്തകർ നടൻ ജയസൂര്യയ്ക്ക് ജന്മദിന സമ്മാനം നൽകിയിരിക്കുകയാണ്.
ജയസൂര്യയുടെ ജന്മദിനത്തോടനുബന്ധിച്ചാണ് ‘മായൻ’ പുതിയ പോസ്റ്റർ പുറത്തുവിട്ടത്. പുഞ്ചിരിച്ചുകൊണ്ട് നിഗൂഢതകളുടെ ഭാരം പേറുന്ന പുസ്തകത്തിലേക്ക് കഠാര കുത്തിയിറക്കുന്ന താരത്തിന്റെ രൂപം ഇതിനോടകം തന്നെ സിനിമാപ്രേമികൾക്കിടയിൽ വലിയ ചർച്ചകൾക്ക് വഴിയൊരുക്കിയിട്ടുണ്ട്.
എന്താണ് ആ പുസ്തകം? കഠാരയിൽ പുരണ്ടിരിക്കുന്ന ചോര ആരുടേത്? ജയസൂര്യയുടെ കഥാപാത്രം എന്ത് രഹസ്യമാണ് ഒളിപ്പിക്കുന്നത്? പോസ്റ്റർ ഉത്തരങ്ങളൊന്നും നൽകുന്നില്ല. പകരം കൂടുതൽ ചോദ്യങ്ങളാണ് ഉയർത്തുന്നത്.
‘മായൻ’ പ്രഖ്യാപിച്ചതു മുതൽ തന്നെ ചിത്രത്തിന്റെ പ്രമേയത്തെക്കുറിച്ച് പലതരത്തിലുള്ള അഭ്യൂഹങ്ങൾ പ്രേക്ഷകർക്കിടയിലുണ്ട്. വിപരീത ആരാധനാക്രമങ്ങൾ പിന്തുടരുന്ന സമൂഹങ്ങളുടെ കഥ ഫാന്റസി ത്രില്ലർ പശ്ചാത്തലത്തിൽ അവതരിപ്പിക്കുന്ന ചിത്രമാണെന്നാണ് അണിയറപ്രവർത്തകർ നൽകുന്ന സൂചന. മലയാള സാഹിത്യത്തിലും മറ്റും പരാമർശിക്കപ്പെട്ടിട്ടുള്ള ‘കറുത്തച്ചനൂട്ട്’ എന്ന വിഷയവുമായി ചിത്രത്തിന് ബന്ധമുണ്ടാകുമോ എന്ന ചർച്ചകളും നേരത്തെ സജീവമായിരുന്നു. എന്നാൽ ‘മായൻ’ ആ വിഷയത്തെ അടിസ്ഥാനമാക്കിയുള്ള സിനിമയാണെന്ന് അണിയറപ്രവർത്തകർ ഔദ്യോഗികമായി സ്ഥിരീകരിച്ചിട്ടില്ല.
മമ്മൂട്ടി ചിത്രം ‘കളങ്കാവൽ’ ഒരുക്കിയ ജിതിൻ കെ. ജോസാണ് ‘മായൻ’ സംവിധാനം ചെയ്യുന്നത്. ‘കളങ്കാവലി’ന് ശേഷം ജിതിൻ കെ. ജോസും ജയസൂര്യയും ഒന്നിക്കുന്ന ചിത്രം എന്ന പ്രത്യേകതയും ‘മായൻ’ സ്വന്തമാക്കുന്നു. മാജിക് മൂൺ പ്രൊഡക്ഷൻസിന്റെ ബാനറിൽ രാജീവ് ഗോവിന്ദനാണ് ചിത്രം നിർമ്മിക്കുന്നത്. ‘ഓർഡിനറി’, ‘അനാർക്കലി’ എന്നീ ശ്രദ്ധേയ ചിത്രങ്ങൾക്ക് ശേഷം മാജിക് മൂൺ പ്രൊഡക്ഷൻസ് ഒരുക്കുന്ന മൂന്നാമത്തെ ചിത്രമാണിത്.
റാഫിയും ജിതിൻ കെ. ജോസും ചേർന്നാണ് ചിത്രത്തിന്റെ തിരക്കഥ ഒരുക്കുന്നത്. ജയസൂര്യയ്ക്കൊപ്പം വിജയ് ബാബു, നൈല ഉഷ, നിരഞ്ജന അനൂപ്, അർഷാ ബൈജു, ജിബിൻ ഗോപിനാഥ്, മുബിൻ എം. റാഫി, വൈഷ്ണവി എന്നിവരും പ്രധാന കഥാപാത്രങ്ങളെ അവതരിപ്പിക്കുന്നു.
ചിത്രത്തിന്റെ ഛായാഗ്രഹണം ഫൈസൽ അലിയും സംഗീതം മുജീബ് മജീദുമാണ് നിർവഹിക്കുന്നത്. എഡിറ്റിംഗ് പ്രവീൺ കുമാർ. ലൈൻ പ്രൊഡ്യൂസർ രോഹിത് ആർ. നായർ. പ്രൊഡക്ഷൻ കൺട്രോളർ ദീപക് പരമേശ്വരൻ. പി.ആർ.ഒ വാഴൂർ ജോസ്.
ഇതിനകം തന്നെ ചിത്രീകരണം പുരോഗമിക്കുന്ന ‘മായന്റെ’ പശ്ചാത്തലവും കഥാപാത്രങ്ങളുമൊക്കെ അണിയറപ്രവർത്തകർ അതീവ രഹസ്യമായാണ് സൂക്ഷിക്കുന്നത്. ഉസ്ബെക്കിസ്ഥാനിൽ ആദ്യ ഷെഡ്യൂൾ പൂർത്തിയാക്കിയ ചിത്രത്തിന്റെ തുടർചിത്രീകരണം കേരളത്തിലെ കുട്ടിക്കാനം, മൂന്നാർ, വാഗമൺ, കോട്ടയം മേഖലകളിലായി നടക്കുന്നതായി റിപ്പോർട്ടുകളുണ്ട്.
പോസ്റ്ററിൽ ഒരു കാര്യം മാത്രം വ്യക്തമാണ്—‘മായൻ’ എന്തോ ഒളിപ്പിക്കുന്നുണ്ട്. ആ രഹസ്യം ഒരു ആരാധനാക്രമത്തിന്റേതാണോ, അദൃശ്യശക്തികളുടേതാണോ, അതോ അതിലും ഇരുണ്ട മറ്റൊരു ലോകത്തിന്റേതാണോ എന്നറിയാൻ ഇനി സിനിമയുടെ അടുത്ത അപ്ഡേറ്റുകൾക്കായി കാത്തിരിക്കണം.
