ഇറ്റാനഗര്: അരുണാചല് പ്രദേശിലെ കുരുംഗ് കുമേ ജില്ലയില് നേരിയ ഭൂചലനം. റിക്ടര് സ്കെയിലില് 2.9 തീവ്രത രേഖപ്പെടുത്തിയ ഭൂചലനം വൈകിട്ട് 5.37.58നാണ് ഉണ്ടായത്. നാഷണല് സെന്റര് ഫോര് സീസ്മോളജി ആണ് വിവരം പുറത്തുവിട്ടത്. ഭൂമിക്കടിയില് 10 കിലോമീറ്റര് ആഴത്തിലാണ് ഭൂചലനത്തിന്റെ പ്രഭവകേന്ദ്രം. 28.158 ഡിഗ്രി വടക്കന് അക്ഷാംശത്തിലും 93.421 ഡിഗ്രി കിഴക്കന് രേഖാംശത്തിലുമാണ് പ്രഭവകേന്ദ്രം കണ്ടെത്തിയത്. ഇറ്റാനഗറില് നിന്ന് ഏകദേശം 120 കിലോമീറ്റര് വടക്കായാണ് സ്ഥലം.
നേരിയ പ്രകമ്പനം പ്രദേശത്ത് അനുഭവപ്പെട്ടെങ്കിലും ആളപായമോ പരിക്കുകളോ കെട്ടിടങ്ങള്ക്ക് നാശനഷ്ടമോ ഇതുവരെ റിപ്പോര്ട്ട് ചെയ്തിട്ടില്ല. കഴിഞ്ഞ ഏതാനും ആഴ്ചകളായി വടക്കുകിഴക്കന് ഇന്ത്യയിലും ഹിമാലയന് മേഖലയിലും ഭൂചലനങ്ങള് റിപ്പോര്ട്ട് ചെയ്യുന്നുണ്ട്. ഭൂകമ്പ സാധ്യത കൂടുതലുള്ള ഈസ്റ്റേണ് ഹിമാലയന് മേഖലയിലാണ് അരുണാചല് പ്രദേശ് സ്ഥിതി ചെയ്യുന്നത്. കുരുംഗ് കുമേയിലെ ഭൂചലനത്തിന് ഏതാനും ആഴ്ചകള്ക്ക് മുമ്പ് ഓഗസ്റ്റ് ആറിന് അപ്പര് സിയാങ് ജില്ലയില് 5.1 തീവ്രതയുള്ള ഭൂചലനം രേഖപ്പെടുത്തിയിരുന്നു.
ഇതുമായി താരതമ്യം ചെയ്യുമ്പോള് കഴിഞ്ഞ ദിവസം ഉണ്ടായ ഭൂചലനത്തിന്റെ തീവ്രത കുറവാണ്. 2.9 തീവ്രതയുള്ള ഭൂചലനം സാധാരണയായി ചെറിയ പ്രകമ്പനമായാണ് കണക്കാക്കപ്പെടുന്നത്. എങ്കിലും മേഖലയില് തുടരുന്ന ഭൂകമ്പ പ്രവര്ത്തനങ്ങളുടെ പശ്ചാത്തലത്തില് സംഭവത്തെ നിരീക്ഷിച്ചുവരികയാണ്.
